Yobbu 10 - EBBAIBBO EMBOOSI YA NASAAE

¹ “Obulamu bwaange buusinyire; njia ohwekanyiirisa ataali ohutya eyiri ebidinyu byaange; njia ohulomaloma ohweema hu buchuuni buli mu mwooyo kwaange.

² Njia ohuboolera Nasaae endi, otaaheengera omusaango kuuhira nae leha manye esikera niwufwaambya.

³ Sihubonehera bulai ewe ohufwiinyirira, ohulekeeresa omulimo kw'amahono kao mani wasaangaalira endekeha ch'abonooni?

⁴ Ewe oli neende emoni koti ech'omuundu? Ewe obona koti lu muundu abona?

⁵ Endaalo chao chiri koti endaalo ch'omuundu, oba emyaaka kyao kyaaba koti emyaaka ky'omuundu,

⁶ hu ewe oteeberese hu obubi bwaange haandi okonyerese ebyonoono byaange,

⁷ kata wahaba noomanyire oti mbulaho omusaango, haandi abulao omuundu onyala ohuununula ohutula mu muhono kwao?

⁸ Ewe omweene niiwe owanoonga neende amahono kao; haandi bulaanu wungaluhaniire ohuusihirisa.

⁹ Yichulisa oti wanoonga ohutula mu loba; haandi ochia ohuungalusa mu lufu ehabi liindi?

¹⁰ Ewe haba siwanjuha erwaanyi koti amabeere haandi waasacha wamuumba koti amafuta?

¹¹ Wambwiihaho esihoba neende enyama, haandi wanyonga alala neende amakuumba neende emisi.

¹² Wamberesa obulamu haandi waaheera muno; haandi oliindire muno obulamu bwaange.

¹³ Nae ebiindu bino wabikisa koti esyaama mu mwooyo kwao; manyire endi syali esichiiririrwa syalyo.

¹⁴ Niihola esyonoono, ochia ohundehaliirisa, mani haba soocha ohuundeheramo ebyonoono byaange.

¹⁵ Niimba omuhola-mbi, leha kanyoole! Niimba omuluungifu, haba siinyala kata ohusiingisa aakulu omutwe kwaange, olwohuba esoni chiinjichuuleho mani ndatingaala hu buchuuni bwaange.

¹⁶ Nae nindeniinia ndooma omutwe, wunyiima koti edalang'i, mani waahola eby'amayia biinjuunia;

¹⁷ Wuuseeta buyaaha mani niwusaandya, haandi wemeeda ohunyoolerera; wusiindihira buyaaha emikaanda-nende-emikaanda ky'amaye ohunwaania.

¹⁸ “Lwasiina wandusa mu nda? Mba ndafwa niteebulwa,

¹⁹ mba ndaafwa hu ndahatula sa endi mu nda, mani bangiinga nibambitiirisa sa nibaanjira mu ng'ani.

²⁰ Endaalo ch'obulamu bwaange ndiidi muno. Ndehe mbe, mani nyooleho esangaalo diidi

²¹ nisisiiri ohuchia yi ndahabe endaalo choosi ataali ohukaluha, mu syaalo sy'engisa neende esiirima sya titititi,

²² mu syaalo sy'engisa neende obudoondobanu, yi bulafu buli koti esiirima siingi.”