Yisaaya 57 - EBBAIBBO EMBOOSI YA NASAAE

Ohwiinamiraanga ebiloongaloongwe hw'Abaisiraeli hukayirwa

¹ Omuundu muluungifu afwa, nae abulao odeebayo daawe. Abaandu b'esisa bamalwao, nae abulao osimanyire. Olwohuba omuundu muluungifu achia ohuwonisibwa mu masira kalikwaao.

² Abo abakeendera mu buluungifu nibahafwe, baheengire mu muleembe; mani bawuluuhire yibeyaliise.

³ Musude aambi, mu heengerwe omusaano eng'we abaana b'abalosi, eng'we abebulanwa b'abacheke neende ab'abadaamba.

⁴ Wiina mweene yi mubayiraho? Wiina mweene yi muli ohwechisyuula mani mwaamulomalomaho nimumuchalaasa? Eng'we abonooni, haandi abaana b'abebachirisi.

⁵ Muli neende esiwonya sy'ohwiinamira ebiloongaloongwe ebiri sa aasi w'emisaala, neende aasi wa buli musaala muhoongo. Eng'we abeetera abaana beeng'we mu mahooho, aasi w'enjafwa ch'olwaanda.

⁶ Mutusa amakina makwalaafu mu lwaanda, amakina komu hooho mani mwaakenamiraanga ako, mani ako niko omukabo kweeng'we; ako niko kamuyaanira ebiyaanwa by'ohung'wa; niko kamuleetera ebiyaanwa by'emwo. Mubaasa muti nimuhola mutyo, esyo sisangaasa ese?

⁷ Mwaala ebitaanda byeeng'we hu ngulu ndeeyi, mani eyo niyo yimuniina ohuchia ohuyaanira ebiyaanwa byeeng'we.

⁸ Muta ebiloongaloongwe bimwiinamiraanga emukoongo w'enjiki cheeng'we; olwohuba, muundehere ao, mani mwaluula obuliri bweeng'we. Mani nimuniina nae hu sitaanda syeeng'we sitakalafu, yimwosanire nabo ebbeyi. Mwekoomba ebitaanda byaabwe, haandi mwakwiisira ohwo obuluwo bw'obwekoombi bweeng'we.

⁹ Mwebaha amafuta k'esing'aari neende eby'esing'aari biingi, mani nimuchia ohwiinamira Moleki nasaae. Mutuma bawamwaanda beeng'we eyale muno, mani nibeehirira ohwoola kata emakoombe.

¹⁰ Mwejoongia abeene nimukoonya banasaae baandi, nae haba simuwaamo omwooyo mani mwaboola muti, “Hunyaahanirasa buhaya”; mani haba simwawaamo amaani daawe.

¹¹ Omwaami ateeba ati, “Banasaae siina beene bamutya mutyo, mani mwaambacha, haandi mwaanjibirira elalira mani mwahaya ohumbaasaho kata nabudiidi?” Mwaakama ohunjisamo oluyaali, olwohuba ndabuweera-buwuleera ebiha byoosi?

¹² Munyala ohubaasa muti bi muhola biluungifu haandi bilai nibyo, nae njia ohuta alafu esaambo cheeng'we, mani ebiloongaloongwe bi muhola haba sibichia hubahoonya kata.

¹³ Mani nimulira nimwekongooya ohunyoola obuhoonyi, lehe ebiloongaloongwe bi mwebuusaho bibahoonye!

Omwaami asuubisa ohuhoonya neende ohuwonia amachuuni

¹⁴ Omwaami aboola ati, “Muteeo engira, muteeo engira. Mutuseo osyohwegumulaho mu ngira y'abaandu baange.”

¹⁵ Olwohuba ow'Aakulu haandi Omwoolerefu mweene haandi Oyo oliwo endaalo choosi, ow'eriita Lyoolerefu aboola ati; “Ese menya abuundu w'aakulu haandi Awoolerefu.” Haandi mba mu baandu baloonga haandi ab'emyooyo kyeefunaake, mani mbakobosemo omwooyo neende esuubi, haandi ohukobosamo omwooyo kwo wefunaake.

¹⁶ Olwohuba haba siinjia huboolobya endaalo choosi, oba ohunyoolera endaalo choosi. Olwohuba omwooyo kuchia ohuundulamo, mani ese omweene ndahababeere obulamu.

¹⁷ Olwohuba baanyoolesa neende ebyonoono byaabwe, neende okuliira kwaabwe; mani ese njia ohubasaandya olwohuba ndakisa obweeni bwaange haandi ndamala ohunyoolera. Mani niboomya emitwa mu saambo ch'emyooyo kyaabwe kyeene.

¹⁸ “Mbweene engeri chibeyiriramo, nae njia ohubawonia. Njia ohubeemereramo, mani mbahoonye, nemye emyooyo abo abalira.”

¹⁹ Omwaami aboola ati, “Niise oberesa abaandu boosi omuleembe, ab'eyale neende aambi. Mani ese njia ohubawonia.

²⁰ Nae abaandi babi, bali koti enyaanja yiiyire; olwohuba haba siyinyala ohuyenjeera. Efwiinda chaayo chisiingisa ebikoha neende obuduhulu.

²¹ Abahola-mbi haba sibaba neende omuleembe.” Nasaae waange nilwo lu aboola.