Yisaaya 25 - EBBAIBBO EMBOOSI YA NASAAE

Olweembo lw'ohufumia Omwaami

¹ Ewe Omwaami, niiwe Nasaae waange; njia ohuhufumia, njia ohufumia eliita lyao; olwohuba oholere eby'amayia ebyo biwatekeha ohutula hale, byadyeeri haandi by'elalira.

² Olwohuba osihiriise esiko, ofunaake-funaake ebida byasyo; edooho ly'abateende haba sirisisiiri esiko haandi siryahakaluhemo ohwoombahwa daawe.

³ Mani abaandu b'amaani bachia ohuhwiisamo oluyaali; haandi ebiko by'ebyaalo byaalaba bichia ohuhutichaanga.

⁴ Olwohuba oli obwiiruhiro bw'amaani obw'abamanani, obwiiruhiro bw'amaani obwaab'obudahano bali mu bidinyu, obweyikamo bu baandu bawoneramo omuyaka, haandi esiiniha si baandu baonera omubasu; olwohuba etima ly'abaandu baalaba liri koti efula yikwa hu sida niyirimo omuyaka kw'amaani,

⁵ haandi etima lyaabwe liri koti obubafu mu syaalo syoomu.

Omwaami atekeha esidyaalo

⁶ Hu Lugulu lwa Siyooni luno, Omwaami w'Obunyala achia ohutekehera abaandu boosi esidyaalo, esidyaalo sy'ebyohulya binulu, esidyaalo sy'amalwa malai keene.

⁷ Hu lugulu luno, Omwaami achia ohumalirao engisa yibwihire abaandu boosi neende ebyaalo byoosi.

⁸ Omwaami w'Obunyala achia ohusihirisiraho ohufwa huweereo elalira, haandi Omwaami Nasaae achia ohweeya amasika koosi mu moni waabwe; haandi achia ohumalao esoni hu baandu bali nacho mu syaalo syoosi. Olwohuba Omwaami mweene niye olomaloome.

⁹ Mani bino nibyahaholehane, bahaboole bati, “Bone, wuno niye Nasaae weefwe; niye yi hubeere huliindire, huti atuwonie. Wuno niye Omwaami; yi hubeere nihuliindire; lehe husangaale haandi hweehoye olwohuba atuwoniisye.”

Nasaae achia ohusaandya Moabbu

¹⁰ Omwaami achia ohuliinda Olugulu luno Siyooni, nae Abamoabbu bahaseenakirwe abuundu ano koti lu bunyaasi buseenakirwa nibabusiiha mu liina ohuholwamo embolera.

¹¹ Bahabaambule amahono kaabwe koti lu muundu osoga lw'abaambula amahono, nae Omwaami achia ohubamalamo ohwepaaha hwaabwe neende obukodyo bwaabwe, mani amahono kaabwe ako kabule obuhoonyi.

¹² Omwaami achia ohusihirisa ebiko byaabwe haandi alikule ebida byaabwe bileeyi bikwe aasi hu loba, mani byeehole olufu lweene.