Yisaaya 19 - EBBAIBBO EMBOOSI YA NASAAE

Nasaae achia ohusaandya Misiri

¹ Bino nibyo ebiindu bilomalomwa hu Misiri. Bone, Omwaami yehaale hu maleesi keeruha embiro ch'amaani mani yeecha mu Misiri. Mani ebiloongaloongwe bya Misiri byahateengerehere mu moni wae; haandi Abamisiri bahaweemo amaani.

² Mani njia ohusiingisa ebiita akatikaati w'Abamisiri neende Abamisiri basyaabwe, mani bachia ohulwaana, buli muundu alwaanie mwaanang'ina, haandi buli muundu alwaanie owaasye, esiko sichia ohulwaania esiko syaasye, haandi obwaami bulwaanie obwaami bwaasye.

³ Ndahadoondobanie ebiindu bi Bamisiri badaha ohuhola mani mbamalemo amaani, haandi ebiindu bi batekeha ohuhola haba sibyahabitemo. Bachia ohweteeba hu biloongaloongwe byaabwe neende hu balakusi baabwe, neende hu misaambwa kyaabwe neende abo abalomalomera emisaambwa kyaabwe.

⁴ Mani njia ohuleha Abamisiri batukwe neende omwaami mwaalaba muno; haandi omutuki mwaalaba muno niye ochia ohubatuka. Omwaami w'Obunyala niye oboola.

⁵ Mani amaachi k'omwaalo kwa Naili kachia ohuhama; mani omwaalo kuchia ohuhama mani kwoomerere.

⁶ Mani emitaro kyakwo kyahawunye, haandi amasaga k'omwaalo Naili kuli mu Misiri kachia ohuhendeera kala-kala mani kahame, amadutu neende amakada bichia ohubola.

⁷ Sibulao esiindu syahamere hu ndulo w'omwaalo kwa Naili, hu genya ly'omwaalo kwa Siira, haandi buli siindu sibahataake hu ndulo w'omwaalo kwa Siira syahoome, omuyaka kwahasiwuuche, mani syasihirira elalira.

⁸ Abanaabi baheyendeherere mani baalira, abo boosi abaloba mu mwaalo kwa Naili; abo boosi abateka eng'eeni neende enjero sibulao esiindu sibahanyooleenge.

⁹ Abo abaluha ebiindu ohutula mu bukoohwe baheeralihire, neende abo abasona engubo ch'epaamba byahabahae mani baateng'eng'ala.

¹⁰ Abo abali esiiro ch'esyaalo bahasaasakule, haandi abo abapaangiswaanga ohuhola emirimo baheewunamire mani babula esuubi lyoosi.

¹¹ Abeemeresi aba Sowani beeholere abasiru beene; abakeraki baberesa omutuki wa Misiri amakesi bulaanu bakeraka eby'obusiru bwereere. Muboolera mutye omutuki wa Misiri muti, “Ndi omwaana w'abaandu bakesi, omwaana w'abatuki ba hale?”

¹² Ewe omutuki wa Misiri, bulaanu abaandu bahuberesa amakesi bali yeena? Leha nibamanyire, bahuboolere esiindu si Omwaami w'Obunyala atekeheere Misiri.

¹³ Abeemeresi ba Sowani baweeremo amakesi, neende abo abahulira Mefisi bawuungire; abo abahahoonyere enono nibo abakosere Misiri.

¹⁴ Omwaami abateeremo omwooyo kuwuungya; mani bakerere Misiri syadandaamira mu buli siindu sisihola koti lu mumeesi aterera mu biindu byaasalire mani yadandaamira.

¹⁵ Mani mu syaalo sy'e Misiri, sibulamo esiindu si muundu muhuluundu kata omuyere, omweemeresi kata yibatuka, sibanyala ohuhola esirimo obuhoonyi.

Misiri syaheenamire Omwaami

¹⁶ Ebiha ebyo nibyahoole, Abamisiri bahatye koti abahasi. Bahakweemo oluteengo mani batye nibahabone Omwaami w'Obunyala n'akoloole omuhono kwae ohubasaandya.

¹⁷ Mani esyaalo sya Buyudaaya syahakwiise oluteengo mu Bamisiri. Buli muundu owahawulire nibabilomalomaho yahaticheenge sa, hulw'esichiririrwa si Omwaami w'Obunyala atekeehe ohubakwiisaho.

¹⁸ Ebiha ebyo nibyahoole, wahabeeo ebiko bitaanu mu syaalo sy'e Misiri ebilomaloma olulimi Lukanaani, abaandu baamwo baheelayire nibafukiirira mu Omwaami w'Obunyala. Esiko silala hu biko ebyo syahalaangwe siti, “Esiko sy'Elyuuba.”

¹⁹ Ebiha ebyo nibyahoole, wahabeeo alutaari y'Omwaami mu syaalo sy'e Misiri, haandi hu lwaaho lw'esyaalo esyo, hwahabeeho esiiro ly'ekina libombahira Omwaami.

²⁰ Obwo nibwo obwahabe obulolero bweekesa haandi obwomiisa buti Omwaami w'Obunyala ali mu syaalo sy'e Misiri. Abamisiri nibahafwiinyirirwe mani baalirira Omwaami, yahabatumire obuhoonyi bw'amaani ohubakayirira neende ohubawonia.

²¹ Omwaami mweene yaheyekese mani Abamisiri bamumanye. Mu biha ebyo, Abamisiri bahamanye haandi beenamira Omwaami, mani nibamuyaanira ebiyaanwa neende ebiyaanwa bisaambwa. Baheeyamire Omwaami haandi booseresa obweyamo bwaabwe.

²² Mani Omwaami yahasaandye Abamisiri, nae haandi yahawonie abo bayahabe nasaandiisye. Mani bahakobole eyiri Omwaami, mani yahawulire ohwekongooya hwaabwe haandi yahabawonie.

²³ Ebiha ebyo nibyahoole, wahabeeo engira hoongo ohutula mu Misiri ohuchia mu Asiria. Abasiria baheeche mu Misiri, haandi Abamisiri bachia mu Asiria. Mani Abamisiri neende Abasiria baheenamire Omwaami.

²⁴ Ebiha ebyo nibyahoole, Yisiraeli syahabe nasilala neende Misiri neende Asiria. Ebyaalo bidatu ebyo byahaberese esyaalo syoosi ehabi,

²⁵ olwohuba Omwaami w'Obunyala yahasibe ehabi n'aboola ati, “Misiri esyaalo syaange, neende Asiria esyaalo si ndaloonga, neende Yisiraeli esyaalo sindedoolere ohuba esyaange, binyoole ehabi.”