Yakobbo 3 - EBBAIBBO EMBOOSI YA NASAAE

Ohutuka olulimi

¹ Basyaange, abaangi mweeng'we muteholanga ohuba abeekesa. Olwohuba mumanyire muti efwe abeekesa bachia ohutuheengera omusaango neende obwaalaba ohuhiraho abaandu baandi.

² Efwe fweesi ebiha bihira obuungi hudoondobana nihuhola ebibi. Nae omuundu yeesi owutadondobana mu nomanoma yae, oyo aba omuluungifu elalira, onyala ohutuka obulamu bwae bwoosi.

³ Nihuta olusaala luundi mu munwa kw'efaraasi, lukera chaatuwulira mani hwanyala ohuchiyira chaachia yi hudaha yoosi.

⁴ Oba bonereho hu meeri chosi. Kata achahaba ehoongo chityo, nichiiruswa neende omuyaka kw'amaani, chitukwa neende engasi ndiidi, mani chaachia buli abuundu woosi yi otuka adaha.

⁵ Olulimi lwosi luli lutyo. Kata neende niluli ahatuundu hadiidi muno ah'omubiri, nae lunyala ohwefumia hulw'ebiindu bihoongo bi lulomaloma. Baaseho koti lu muliro mudiidi kunyala ohusaamba esichaha sihoongo.

⁶ Olulimi lwosi luli koti omuliro. Lweechula ebibi ebiingi. Olulimi situundu sy'omubiri kweefwe nae lunyaasa omubiri kwoosi. Haandi olweene olwo nilwo oluwaambia omuliro hu mubiri kwoosi nilukutusa mu nyaanja y'omuliro.

⁷ Omuundu anyala ohutuka ebiloonge byoosi, ebisolo biteende neende amayoni, ebisolo byambaaka neende eng'eeni mani yaabihola byaloongoyala.

⁸ Nae abulao omuundu yeesi onyala ohutuka olulimi. Olulimi lubi haandi silutukiha, mani lweechula obusiba bwiita.

⁹ Hwehoonyera olulimi lweefwe ohufumia Omwaami haandi Seefwe, haandi hwehoonyera olulimi lweefwe lweene olwo ohubwaaba omuundu waloongwa mu fwaani ya Nasaae.

¹⁰ Mu munwa mulala omwo nimwo omutula ohufumia Nasaae neende ohubwaaba abaandu. Basyaange, sino haba sisihoyera ohuba sityo,

¹¹ Mubaasa muti mu sulo ndala, munyala ohutulamo amaachi malai neende amaachi malulu?

¹² Basyaange, mubaasa muti omutuli kunyala ohwaamaho emiseituuni, oba omusabbiibbu kwaamaho emituli? Kata esulo y'amaachi k'omuunyu haba siyinyala husoohamo amaachi malai.

Amakesi katula aakulu

¹³ Wiina mweeng'we omukesi haandi omanyire ebiindu? Lehe yeekeserenge amakesi kae neende ohumanya hwae mu bulamu bwae buluungifu, neende mu biholwa byae biholerwa mu buloonga neende mu makesi.

¹⁴ Nae mu myooyo kyeeng'we nimuba nimweechulamo ehali-hali bi neende obwiimani, mani muleheenge ohweniinia neende ohweebacha nimuyiingania obwadyeeri.

¹⁵ Obukesi buno haba sibufwaanana neende obwo obwiiha ohutula Muukulu daawe, nae bw'esyaalo nibwo, obutaali obunadiini, obw'omusaambwa.

¹⁶ Olwohuba aali ehalihaali neende obwiimani, ao wosi aliwo ohutabuha neende ebibi by'engeri choosi.

¹⁷ Nae amakesi katula Muukulu kataangira ohuba amoolerefu; haandi kaleeta omuleembe, haandi kalimo obuloonga, neende ohudeeba hu baandu baandi; keechulamo esisa mani keebula ebiholwa bilai. Haba sikalimo mwooyo mubi, oba obwebachirisi.

¹⁸ Haandi abo abaleeta omuleembe banyoolamo obwadyeeri bwataakwa mu mireembe kino.