Sekaria 2 - EBBAIBBO EMBOOSI YA NASAAE

Ohuboneherwa omukoye kupiima ebiindu

¹ Mu hubwiihulirwa huundi, ese ndabona omusaacha wuundi naali neende omukoye kupiima ebiindu mu muhono kwae.

² Naange ndateeba endi, “Ewe oli ohuchia yeena bweene?” Nae yangobolamo ati, “Ngaandi njia ohupiima Yerusalemu, mbone obuleeyi bwasyo koti bwaaka neende obubaambali bwasyo koti bwaaka.”

³ Bulaanu ndabona haandi malaika wula owalichiingi naali ohulomalomaanga naange naatulayo niyeecha mu moni, nae haandi malaika wuundi yesi niyeecha ohubukaanana nae.

⁴ Malaika wataangira wula yaboolera owuundi oyo ati, “Ewe yiruha bwaangu mani ochie oboolere omusaacha muraaga oyo oli neende olusya lukeraanga oti yicha ohubaao abaandu abaangi muno alala neende ebituke ebibitiirifu mu Yerusalemu sibe esibaambali muno esitanyala ohwoombahwaho ebida daawe.

⁵ Omwaami yamala ohusuubisa omweene ati niye ochia ohuba esida syasyo esy'omuliro esyebodohaanie esiko esyo ohusilwaaniraanga, haandi mbwe omweene achia ohusimenyaangamo neende oluyaali lwae lwoosi.”

Abawaambe bali ohulaangwa bakobole mu ngo omwo

⁶ Omwaami aboola ati, “Eng'we yiruhe mutule mu syaalo sy'emukulu, olwohuba ese malire ohubabaambulira eyale ohwaaka koti enyaande chine choosi ech'ekulu, olwohuba Omwaami niye olomaloome.

⁷ Mwiiruhire Siyooni, eng'we mweesi abamenya alala neende omuhaana wa Bbabbilooni.

⁸ Buli muundu ohuhuyaho aba ali koti oyo ohuyire esyo esiihiriramo engaanga.” Mani Omwaami w'Obunyala bwoosi niye owaanduma neende emboosi yino yiti eyiri ebyaalo byali ni byafumaalira abaandu bae:

⁹ “Omwaami mweene niye ochia ohuhulwaania, mani wesi ofumaalirwe neende abaandu balichiingi abahalaabani bao.” Sino nisyahakweeo sityo, ao niwo yi buli muundu yeesi achia ohumanyira ati hane, Omwaami w'Obunyala bwoosi niye owaanduma.

¹⁰ Omwaami yaboola ati, “Yembe nimweehoya, eng'we abaandu ba Yerusalemu! Ese mbao njicha ohumenya alala naang'we!”

¹¹ Esiha syeene esyo, ebyaalo biingi bicha ohwiichiaanga eyiri Omwaami nibyeehola abaandu bae. Omweene achia ohumenyaanga alala naang'we, mani munyala ohumanya muti hane omweene oyo niye owaanduma yi muli.

¹² Ehabi liindi haandi Yuda syeehole esiindu sy'Omwaami syae sihira hu biindi mu syaalo syae silafu, nae Yerusalemu syeehole esiko si yaheera ohuhiraho ebiindi byoosi.

¹³ Wuleera chi, buli muundu, mu moni w'Omwaami, olwohuba ali ohwiichia naatula abuundu wae woolerefu yi yamenya.