Sekaria 11 - EBBAIBBO EMBOOSI YA NASAAE

Ohuwaambwa hw'abatuki baalaba

¹ Yikulao emilyaango kyao, ewe Lebbanooni, hu muliro kunyale ohusaamba nikukwiisira aasi emituumba kyao!

² Lira mani ochereenjese, eng'we emisaala kya saipuraasi emiseengese kimalire ohukwa aasi; emisaala ky'oluyaali ekyo kimalire ohunyaasiha! Lira haandi ochereenjese, eng'we emituumba kya Bbasani esichaha syadidya muno esyo simalire ohutemwa siwereere aasi.

³ Abeemeresi balirira aakulu mu sibeera; oluyaali lwaabwe lumalire ohwaakama! Mani tekeeresaho owulire ohuhuumula hw'edalang'i; esichaha sy'edaala lyacho eliri hu lwaasi lwa Yorodaani limalire ohusihiriswa!

Abaayi babiri

⁴ Omwaami Nasaae waange yamboleere ati, “Weehole koti omwaayi w'amakoondi kachia ohwiitwa.

⁵ Abeeneko nibo abakeeta mani baabulaho esibonereso syoosi sibanyoola. Bakusa enyama mani baamala baboola bati, Omwaami afumisibwe! Efwe huli abayiinda! Kata abaayi baako beene bosi sibanyala baakakwiira esisa daawe.”

⁶ (Omwaami yaboola ati, “Ese siinjia hukwiira omuundu yeesi oli hu syaalo esisa daawe. Ese mweene niise ochia ohutechaanga abaandu boosi mu bunyala bw'abeemeresi baabwe. Abeemeresi bano nibo abachia ohusakuula esyaalo sino, naange siinjia ohusionia ohutula hu bunyala bwaabwe daawe.”)

⁷ Abo boosi abakulaanga haandi abakusaanga amakoondi nibo bandahalaabaniranga, mani ndeehola omwaayi w'amakoondi kali nikachia ohwiitwa. Ese ndabukula esaala chibiri: lulala ndalulaanga endi “Embabaasi” nae oluundi ndalulaanga “Obulala.” Ndachaaka ohwayaanga amakoondi ako.

⁸ Ese ndajoong'era abaayi baandi bala badatu, abali nibaasyuula, ndaabeerusa hu mulimo boosi mu mwoosi mulala kwoong'ene.

⁹ Ndaboolera ebyaayo bino endi, “Ese haba siinja hwemeeda ohuba omwaayi weeng'we daawe. Leha ako akafwa kafwe sa. Leha abo abahoyere ohusihiriswa basihiriswe. Haandi abo abachia ohudoong'ao bachia ohwiitanaanga abeene-hu-beene.”

¹⁰ Bulaanu ese ndeemao ndaabukula olusaala lulaangwa mbwe “Embabaasi” mani ndaalufunaka, ohuheengamo Endagaano yi Omwaami yali yahola neende ebyaalo byoosi.

¹¹ Mani katyo, Endagaano eyo yaheengwamo hu ludaalo lweene olwo. Abo abakulaanga neende abakusaanga amakoondi bali ni baandeereho sa emoni, haandi bali nibamanya bati Omwaami naali ohulomalomaanga naabitira mu biindu bi ndaholaanga.

¹² Ese ndeemao ndaababoolera endi “Nikali mbwe mujama, muumberese omusaara kwaange. Nae nimutadaha, mani mukwedoong'isire sa.” Mani baanduunga ebituundu amahumi kadatu eby'efeesa koti omusaara kwaange.

¹³ Omwaami haandi yamboolera ati, “Ewe bibukule mani obibiihe mu syaaki sy'Enyuumba ya Nasaae.” Ndabukula ebituundu amahumi kadatu by'efeesa bira obukusi buhiramo bu babaasa bati nibwo obuunjera mani ni mbita mu syaaki sy'Enyuumba ya Nasaae.

¹⁴ Ndafunaka olusaala lwa habiri, olwo olwali nilulaangwa mbwe “Obulala” mani obulala bwa Yuda neende Yisiraeli bwahalihanamo.

¹⁵ Omwaami yamboolera ati, “Haandi ehabi liindi, weehole koti omwaayi, nae hu luno obe omwaayi musiru.

¹⁶ Ese ndata omwaayi wuundi mu bunyala bw'ebyaayo byaange, nae haba sahoonyaangaho amakoondi kaange kali ohutiisibwa neende ohusihirira daawe; kata haba sakonyaangaho echiba nichikotere daawe, kata ohuleraanga echio echiba ni chinyaaliihe daawe, kata ohulisaanga enamu chidaha olya daawe. Mubweyaango bw'ebyo, yeedinya ohulichaanga enyama ch'amakoondi kahiramo obukinu kata yoola neende ohuchihoboolaangaho ebirekeyi byachio byosi.

¹⁷ Mani omwaayi mumayaanu oyo chimwaakaanire! Olwohuba yajwaang'a amakoondi kae. Ebiita bicha ohumumaliramo elalira amaani kae. Omuhono kwae okwo kuchia ohuwololoha, haandi emoni yae y'omuhono musaacha yicha ohuwofulira elalira.”