Ohubwiihulirwa 9 - EBBAIBBO EMBOOSI YA NASAAE

¹ Bulaanu malaika wa hataanu yesi yeecha yoobba eturumbete yae. Mani ndaabona eng'ining'ini yira eyali niyikwiire hu syaalo, niyibereswa olufunguo lw'ekotero. (Ano niwo abuundu ali siri aasi muno mu loba yi misaambwa kyali nikyabooyerwa ohwoola lu chiriheengerwa omusaango kumaliirihayo.)

² Eng'ining'ini eyo yeecha yekulawo ekotero elyo, mani omwoosi nikubbwomooha erwaanyi nikuyituliramo, okufwaanana neende omwoosi kutula hu syoosyo sihoongo muno. Obulafu bw'elyuuba alala neende emboo byeecha byaamaliyisibwa neende omwoosi kwali nikutula mu kotero elyo.

³ Esike enyiingi chosi chachaaka ohwiiha aasi hu syaalo nichitula aakulu mu mwoosi okwo. Chosi chabeereswa amaani kali nasilala neende ak'engoberanyaanja.

⁴ Esike echo chaabolerwa chitalumaho kata hu lunyaasi lwoosi, oba hu musaala kwoosi, oba hu simera syoosi. Chali chitekeheebwe ohuluma abaandu boong'ene, abali nibataali neende omuhuuri kwa Nasaae hu bweeni bwaabwe.

⁵ Nae esike chino haba sichafukiirirwa ohwiita abaandu bano daawe. Nae chali nichiboleerwe ohusaandya sa abaandu bano hulw'embaka y'emyoosi kitaanu kyoong'ene. Nae obuchuuni bwali nibweema hu huboneresa hw'esike echo, hwali nihwaakana neende obuchuuni bweema hu huluma hw'engoberanyaanja.

⁶ Mu myoosi chitaanu echo abaandu abo bachia ohuba nibekoombaanga ohufwa, nae ohufwa haba sihucha hwiichiraho yibali daawe. Bachia ohwekoombaanga bati bafwe, nae ohufwa huchia ohubeeruhaanga sa nihubatulaho.

⁷ Esike chira chali nichifwaanana neende efaraasi chitekeheebwe ohuchaaka ohulwaana ebiita. Hu mitwe kyaacho hwaliho ebiindu byafwanaanga koti ekofia ch'obutuki ech'esaabbu, nae obweeni bwaabwe bwafwananaanga koti obweeni bw'abaandu.

⁸ Efwiiri lyacho lyali nilifwaanana neende efwiiri ly'abahasi, nae ameeno kaacho kali nikafwaanana neende ameeno k'edalang'i.

⁹ Ebirifu byaachio byali nibibwihiibweho ebiindu bifwaana koti ehuumba chohu birifu ch'echuma, nae esiyooka syali nisiholwa neende embaya chaachio, syali koti esiyoka siholwaanga neende ebigaari biingi bihweswaanga neende efaraasi nibiiruha nibichia ohulwaana ebiita.

¹⁰ Chalichiingi neende emihira neende eminwa ebifwaanana neende eby'engoberanyaanja, mani chali nichicha ohwehoonyeraanga emihira chaachio echalimo amaani k'ohuboniaabonia abaandu abo hulw'emyoosi kitaanu emilaamba.

¹¹ Chali chiri neende omutuki wali n'achituka, owali niye malaika owali naali neende obunyala bwoosi mu kotero elyo. Eliita lyae mu lulimi Luibburania nilyo, Abbadoni. Nae mu lulimi Lugiriki, nilyo, Apolyooni (esyeekesa mbwe, “Omusihirisi.”)

¹² Esinyaasyo sitaangira siweere. Luunyuma lwasino, haandi yiriyo ebinyaaso biindi bibiri ebichia ohwiicha.

¹³ Mani bulaanu malaika wa hasaasaba yesi yemao yoobba eturumbete yae. Mani ndaawulira ekono litulira mu koona chine ch'alutaari y'esaabbu yali niyiri mu moni wa Nasaae.

¹⁴ Ekono elyo lyali niliboolera malaika wa hasaasaba wula liti, “Lehuula bamalaika bane bala ababoyerwa hu mwaalo muhoongo Ewufuraate!”

¹⁵ Mani, bamalaika bane bala beecha balehuulwa. Haandi esaa yeene yino, ey'oludaalo lweene luno, olw'omwoosi kweene kuno, neende omwaaka kweene kuno, bali nibamala ohutekehwa ohwiita esituundu silala hu bituundu bidatu sy'abaandu boosi.

¹⁶ Mani ndaboolerwa obuungi bw'ab'amaye balwaani. Boosi alala bali emilioni emia chibiri enaamba.

¹⁷ Nae muhuboneherwa hwaange, ese ndeecha ndaabona efaraasi echo, neende abeerusi bachio. Bali nibefwaalire, ehuumba chohu birifu ch'amabbaati echa ranjaayi koti omuliro, bbulu koti safire, haandi namuki koti maratutu. Emitwe ch'efaraasi echo chalichiingi nichifwaana neende emitwe ch'edalang'i, nae haandi mu minwa chaachio mwali nimutulaangamo omuliro, omwoosi, neende maratutu.

¹⁸ Esituundu silala hu bituundu bidatu by'abaandu byeetwa neende endwaae sihirisi chidatu chira. Omuliro, omwoosi, neende maratutu nibyo ebyali nibitulaanga mu minwa ch'efaraasi chira.

¹⁹ Olwohuba amaani k'efaraasi chira kali nikali mu minwa chaachio neende mi mihira chaachio. Emihira chaachio chali nichifwaanana neende enjuha chiriho emitwe, mani efaraasi chino, cheehoonyeraanga emihira chino ohunyaala abaandu.

²⁰ Abaandu boosi abali badoong'ereo, abali nibateeterwe neende amalwaae kano, haba sibakaluuhana baatula hu misaambwa. Haandi haba sibaakama ohwiinamiraanga ebiloongaloongwe, oba ebiindu byaholwa mu saabbu, mu feesa, mu mugasa, mu makina, neende mu mbaao, ebiindu bitanyala ohubona, ohuwulira, oba ohukeenda daawe.

²¹ Kata haba sibeyolobyaho obwiiti bwaabwe, obulakusi bwaabwe, obucheke bubi, oba obwiibi bwaabwe.