Ohubwiihulirwa 8 - EBBAIBBO EMBOOSI YA NASAAE

Omuhuuri kwa hataanu-na-habiri

¹ Ekoondi doto nilyeecha lyaboolola ohwiikula esifuundiho sy'omuhuuri kwa hataanu-na-habiri, yeecha yaabawo ohubuleera Muukulu ohwamala embaka y'esituundu sy'esaa.

² Mani bulaanu ndeecha ndaabona bamalaika bataanu-na-babiri abamenya nibeema sa mu moni wa Nasaae, nibeecha nibabeereswa eturumbete chosi chitaanu-na-chibiri.

³ Malaika wuundi, owali ali neende esisaambiro sy'obubbaani esy'esaabbu, yeecha mani yeema hu alutaari. Malaika oyo yeecha yabeeresebwa obubbaani obubitiirifu ohumeeda hu masaayo k'abaandu ba Nasaae boosi, haandi neende ohubutaayo hu alutaari y'esaabbu eyeemeswa mu moni w'esisaala sy'obutuki.

⁴ Mani omwoosi kw'obubbaani buli ohwaaduha kweecha kwachaaka ohudumuuha nikuniina aakulu neende amasaayo k'abaandu ba Nasaae, nibitula mu mahono ka malaika oyo niyeemere mu moni wa Nasaae.

⁵ Haandi malaika oyo yabukula esisaambiro sy'obubbaani sira, mani niyeecha nasiichusamo omuliro kutula hu alutaari, mani naamala nasisukuna hu syaalo huno. Mani yeecha yabaawo ohutokoolehana alala neende ohwaduluhana hw'ekulu huloondehana, ohumesuhana hw'emesu, alala neende musisi.

Eturumbete

⁶ Bulaanu, bamalaika bataanu-na-babiri bala, beetekeha ohuhubba eturumbete chitaanu-na-chibiri chaabwe chira.

⁷ Mani malaika otaangira yeecha yoobba eturumbete yae. Amakina k'efula alala neende omuliro, nibisasaanire neende amabaanga, nibyeemao nibichaaka ohubbwomooha aasi hu syaalo. Esituundu silala hu bidatu by'esyaalo syeecha syaaya syaawa pe, esituundu silala hu bidatu by'emisaala, syosi syeecha syaaya syaawa, haandi neende buli saafu ly'obunyaasi bubisi.

⁸ Haandi bulaanu, malaika wa habiri yesi yeecha yachaaka ohuubba eturumbete yae. Mani esiindu siindi sifwaana koti olugulu luhoongo muno oluli ohwaaduha omuliro, syeecha syasukunibwa syaweera mu nyaanja. Mani silala hu bituundu bidatu by'enyaanja syakaluuhanisibwa syaaba amabaanga mahaya,

⁹ silala hu bituundu bidatu by'ebiloonge bilamu biri mu nyaanja eyo syafwa syoosi, haandi esituundu silala hu bituundu bidatu by'emeeri choosi syeecha syasihiriswa.

¹⁰ Mani haandi, malaika wa hadatu yesi yoobba eturumbete yae. Mani eng'ining'ini hoongo muno, niyaaduha koti esikeenga, niyiicha niyaakuha ohutula aakulu mu maleesi, mani niyiicha niyikwa hu situundu silala sy'ebituundu bidatu by'emyaalo haandi neende hu sulo ch'amaachi.

¹¹ (Eliita ly'eng'iniing'ini eyo lyali “Ohuhahaata”) Mani esituundu silala hu bituundu bidatu by'amaachi syalula syahahaata, mani abaandu abaangi muno beecha baafwa muno hulw'ohung'wechangaho hu ako maachi, olwohuba kali nikalulire.

¹² Bulaanu, malaika wa hane yesi yoobba eturumbete yae. Esituundu silala hu bituundu bidatu by'elyuuba syeecha syaahubbwa, haandi esituundu silala hu bituundu bidatu by'omwoosi byosi byeecha byaahubbwa, haandi neende esituundu silala hu bituundu bidatu by'eng'ining'ini byosi bityo, hu mani obulafu bwaabyo bwatusibwaho esituundu silala hu bituundu bidatu by'ohwaaduha hwaabyo. Obulafu bwaahaya ohubaao hu mbaka y'esituundu silala hu bituundu bidatu by'esideete, haandi neende hu situundu silala hu bituundu bidatu by'esiro.

¹³ Mani ndeemao ndalingaala, ndawulira eeswi yali niyibburuuhe niyibeengeraanga aakulu muno mu mboo, niyiboola mu kono hoongo yiti, “Eee amasira! Amasira! Nga chinyoolere abaandu bamenya hu syaalo boosi, nikali mbwe haandi bachia ohuwulira ekono ly'eturumbete liindi, bamalaika baandi badatu bala nibanaba niboobba eturumbete chaabwe!”