Ohubwiihulirwa 10 - EBBAIBBO EMBOOSI YA NASAAE

Malaika neende Olupapula Ludiidi

¹ Haandi ndabona malaika muhunuufu muno wuundi niyeeha n'atula Muukulu. Yali n'abwihiibwe mu sireesi, haandi yali neende oluyiingi nilumwebodohaanie omutwe kwae. Obweeni bwae bwali nibufwaanana neende elyuuba, haandi amakulu kae kali nikafwaanana neende amakutu k'omuliro.

² Yali naali neende olupapula lusiriingise ludiidi mu muhono kwae nilufuumbuluulwe. Yaseena ohukulu hwae huluungi, hu nyaanja, nae ohukulu hwae hukaada yaseena hu loba,

³ mani yahuumula mu kono hoongo elyafwaana koti ohuwoola hw'edalang'i. Niyamala ohuhuumula atyo, ohwaduluhana koti ohw'ehubba hweecha hwawuliiriha nihumukobolamo amahabi kataanu-na-kabiri.

⁴ Nibalomaloma sa bati, syesi ndali nindetekeehe ni ndi aambi ohuchaaka ohwandiika. Nae ndawulira ekono nililomaloma nilitula Muukulu niliboola liti, “Kisa bi hwaaduluhana amahabi kataanu-na-kabiri kano kaboolere. Otabyandiika daawe!”

⁵ Mani bulaanu, malaika oyo yi ndali nimbweene niyeemere hu nyaanja neende hu loba, yasiingisa omuhono kwae muluungi n'akulingiise Muukulu

⁶ mani niyeeyamira mu liita lya Nasaae, olibaao omulamu endaalo choosi pe, owaloonga Ekulu neende esyaalo, haandi neende enyaanja, neende buli siindu syoosi sibirimo. Malaika oyo yemao yaboola ati haba saacha hubaao ohwekoyaania haandi!

⁷ Nae malaika wa hataanu-na-habiri naahubba eturumbete yae, ao niwo yi Nasaae achia ohwoseresera endekeha yae y'engiso eyo, koti lu yekulirao abahalaabani bae, abanabbi.

⁸ Mani haandi ekono lira li ndali nimalire ohuwuliraho nililomaloma nilitulira Muukulu, lyeecha haandi lyanomanomera niliboola liti, “Ewe chia obukule olupapula lufuumbulule luli mu muhono kwa malaika yeemere hu nyaanja neende hu syaalo.”

⁹ Ndachia eyiri malaika mani ndaamusaba endi yambereese olupapula lusiriingise ludiidi olwo. Nae yamboolera ati, “Lubukule mani olulye. Luchia ohukaluuhana lube olululu mu nda yao, nae mu munwa kwao, luchia ohuba olunyunyuula koti obuuhi.”

¹⁰ Ese ndaabukula olupapula ludiidi olwo ndaalutusa mu muhono kwae ndaalulya, mani lwaaba olunyunyuula koti obuuhi mu munwa kwaange. Nae luunyuma lw'ohulumira lwaakwa mu nda, lwakaluuhana lwaaba olululu mu nda yaange.

¹¹ Mani ndaboolerwa endi, “Haandi ehabi liindi, ohoyere ohuchia haandi wayaala emboosi cha Nasaae, eyiri ebyaalo biingi, obwiibulaane buungi, enimi nyiingi, haandi neende eyiri abatuki baangi.”