Nehemia 3 - EBBAIBBO EMBOOSI YA NASAAE

Ohwoombaha buyaaha esida sya Yerusalemu

¹ Yino niye engeri yi siko syoombahirwamo buyaaha. Omulaamisi Muhuluundu Eliasibbu alala neende abalaamisi baasye nibo aboombaha buyaaha Esiruwa silaangwa sy'Amakoondi, basiyaanayo eyiri Nasaae, mani basiikulamo ebiruwa mu bweyaango bwabyo. Haandi bayaanayo esida ohwoolera elalira hu Munara kulaangwa Emia Ndala, haandi neende hu Munara kwa Hananeeli.

² Abasaacha ba Yeriko nabo nibo aboombaha esituundu syali nisilondereraho. Sakuuri omwaana wa Yimiri niye owoombaha haandi esituundu syaloondahwo.

³ Enono ya Haseena niyo eyoombaha Esiruwa silaangwa esy'Eng'eeni. Baguula emiguulo haandi neende ohutaamo ebiruwa mu bweyaango bwabyo, haandi baamala bataamo enaati, alala neende emitaliimbo kyekalaanga esiruwa esyo.

⁴ Meremooti, omwaana wa Wuria, haandi omwiichuhulu wa Hakoosi, nibo aboombaha esituundu syaloondaho. Mesulamu, omwaana wa Bberekia neende omwiichulu wa Mesesabbeli, nibo aboombaha esituundu syaloondaho. Sadoki omwaana wa Bbaana niye owombaha esituundu syaloondaho.

⁵ Abasaacha ba Tekoa nibo aboombaha esituundu syaloondaho, nae abasaacha bahunuufu b'esiko esyo bahaya ohuhola emirimo ky'amahono ki babeereswa neende abahosesi.

⁶ Yoyada omwaana wa Paseya neende Mesulamu omwaana wa Bbesodeya nibo aboombaha buyaaha Esiruwa sya Yesaana. Baguula emiguulo, haandi baamala beekulamo ebiruwa mu bweyaango bwabyo, haandi bataamo enaati neende emitaliimbo ekinyala ohwiikalao esiruwa.

⁷ Melatia ohutula mu Gibbeoni, Yadoni ohutula mu Meronooti, haandi abasaacha ba Gibbeoni neende Misipa nibo aboombaha esituundu syaloondaho, ohwoolera elalira hu bumenyo bwa gafana wa Emuumbo wa Ewufuraate.

⁸ Wusieli omwaana wa Harihaya, omwiitaanyi w'esaabbu, nibo aboombaha esituundu syaloondaho.

⁹ Refaya omwaana wa Huuri, omwiimirisi w'esituundu sya disiturikiti ya Yerusalemu, nibo aboombaha esituundu syaloondaho.

¹⁰ Yedaya omwaana wa Harumafi omwaana wa Hatuusi niye owoombaha esituundu syaloondaho, esyali aambi neende enyuumba yae.

¹¹ Malikiya omwaana wa Harimu neende Hasibbu omwaana wa Pahati-Moabbu nibo aboombaha esituundu syaloondaho neende Omunara kwa Ofeni.

¹² Saluumu omwaana wa Haloheesi, omwiimirisi w'esituundu siindi sira esya Disiturikiti ya Yerusalemu, niye owoombaha esituundu syaloondaho. (Abaana bae bosi bahoonyaanga mu mirimo ekyo.)

¹³ Hanuni neende abamenyi bomu siko sya Sanoa nibo aboombaha buyaaha Esiruwa sy'Ehooho. Haandi beekula ebida mu bweyaango bwabyo, bataamo enaati, haandi neende emitaliimbo ekyekalaanga esiruwa esyo, haandi nibo abatereesa buyaaha esida siyera emiita emia chine neende amahumi kane (440), ohwoolera elalira hu Siruwa sy'Ebikoha.

¹⁴ Milikiya omwaana wa Rekabbu, omwiimirisi wa Disiturikiti ya Hakeremu Bbeeti, niye owoombaha buyaaha Esiruwa sy'Ebikoha. Yeekula esiruwa mu bweyaango bwasyo, haandi yataamo enaati, neende emitaliimbo ekyekalaanga esiruwa esyo.

¹⁵ Saluumu omwaana wa Kolihose, omwiimirisi wa Disiturikiti ya Misipa, niye owoombaha buyaaha Esiruwa sy'Esulo. Yaoma omulyaango, mani yeekulamo ebiruwa mu bweyaango bwabyo, haandi yataamo enaati neende emitaliimbo. Hu Sidiba sya Sela, yoombahayo esida siloonderera hu mukuunda kw'obwaami, ohwoolera elalira hu ngaasi chiihirira nichitulira mu Siko sya Daudi.

¹⁶ Nehemia omwaana wa Asibbuuki, omutuki w'esituundu sya Disiturikiti ya Bbetisuuri, yoombaha esituundu siloondaho, ohwoolera elalira hu ng'ani ya Daudi, esidiba, neende ebbarakisi.

Abaleefi baholaho hu sida sino

¹⁷ Abaleefi bano nibo aboombaha buyaaha ebituundu biloondaho biingi eby'esida esyo: Rehumu omwaana wa Bbani niye owoombaha esituundu siloondaho; Hasabbia, omwiimirisi w'esituundu sya Disiturikiti ya Keila, niye owoombaha syaloondaho hu situundu sya disiturikiti yae.

¹⁸ Bbaafi omwaana wa Henadaadi, omwiimiri w'esituundu sya Disiturikiti ya Keila, niye owoombaha esituundu siloondaho;

¹⁹ Eseri omwaana wa Yesua, omwiimirisi wa Misifa, niye owoombaha esituundu syaloondaho mu moni w'esyaaki sy'ebilwaaniso, ohwoolera elalira abuundu yi sida syekoderamo;

²⁰ Bbaruku omwaana wa Sabbai niye owoombaha esituundu syaloondaho, ohwoolera elalira hu nyuumba ya Eliasibbu Omulaamisi Muhuluundu Eliasibbu;

²¹ Meremooti, omwaana wa Wuria haandi neende omwiichuhulu wa Hakoosi, nibo aboombaha esituundu syaloondaho, ohwoolera elalira hu njakamo y'enyuumba ya Eliasibbu.

Abalaamisi abaholaho hu sida esyo

²² Abalaamisi bano nibo aboombaha buyaaha ebituundu byaloondaho eby'esida esyo: Abalaamisi ohutula mu situundu sya Yerusalemu nibo aboombaha esituundu syaloondaho;

²³ Bbenjamini neende Hasibbu nibo aboombaha esituundu syaloondaho, esyali mu moni w'enyuumba chaabwe; Asaria, omwaana wa Maseya haandi omwiichuhulu wa Anania, owoombaha esituundu syaloondaho, esyali mu moni w'enyuumba yae;

²⁴ Bbinui omwaana wa Henadaadi niye owoombaha esituundu syaloondaho, ohutula hu nyuumba ya Asaria ohwoola hu soonda y'esida esyo;

²⁵ Palaali omwaana wa Wusai niye owoombaha buyaaha esoonda yali niyitingaalire, haandi neende omunara kwatuumbuha ohutulira mu nyuumba y'emukulu y'omutuki hu lwaanyi lw'abaliindi. Owamuloondaho yali Pedya omwaana wa Parosi

²⁶ neende abahalaabani bomu Nyuumba ya Nasaae abali nibamenya hu Ofeli nibo abahola buyaaha ohwoolera elalira abuundu watingaalana neende Esiruwa silaangwa sy'Amaachi esiri ebukwe, neende hu munaara kwafunduulira okwo.

Aboombahi baandi

²⁷ Abasaacha ba Tekoa nibo aboombaha esituundu syaloondaho, neende esyohubiri syaabwe, ohutulira abuundu atingalaane neende omunara mutabaafu muno okwali nikuliindire Enyuumba ya Nasaae, ohwoolera elalira hu sida siri aambi neende Ofeli.

²⁸ Omukaanda kw'abalaamisi nikwo okwoombaha esituundu syaloondaho, ni baniinira emukulu ohutulira hu Siruwa sy'Efaraasi, buli otula niyoombaha mu moni w'enyuumba yae.

²⁹ Sadoki omwaana wa Yimeeri niye owoombaha esituundu syaloondaho, esyali mu moni w'enyuumba yae. Semaya omwaana wa Sekania, omuliindi w'Esiruwa sy'Ebukwe, niye owoombaha esituundu syaloondaho.

³⁰ Hanania omwaana wa Selemia neende Hanuni, owali omwaana wa hasaasaba wa Salafi, aboombaha esituundu syaloondaho, esyohubiri syaabwe. Mesulamu omwaana wa Bberekia niye owoombaha esituundu syaloondaho, esyali mu moni w'enyuumba yae.

³¹ Milikiya, omwiitaanyi w'esaabbu, niye owoombaha esituundu syaloondaho, ohwoolera elalira hu syoombahe syehoonyerwaanga neende abahalaabani bomu Nyuumba ya Nasaae, haandi neende abachurusi, eyali aambi neende Esiruwa sya Mifikaadi aambi neende Enyuumba ya Nasaae, aambi neende esiseenge siri aakulu w'soonda y'emukulu ebukwe w'esida esyo.

³² Omwiitaanyi w'esaabbu neende abachurusi nibo aboombaha esituundu syamaliirihayo, ohutulira hu siseenge siri hu soonda eyo ohwoolera elalira hu Siruwa Sy'amakoondi.