Nahumu 2 - EBBAIBBO EMBOOSI YA NASAAE

Ohuwaambwa hwa Ninefe

¹ Ewe Ninefe, oseeterwe! Amaani kachia ohuhusakuula keechere. Tekehe obuliindi! Liinde engira! Mwetekehere ebiita!

² (Omwaami ali aambi bweene ohukobosao oluyaali lwa Yisiraeli, lube koti lu lwalichiingi hale abasuku bae ni bataamudubakira.)

³ Abanamaye basuku bakiingire engabo cha ranjaayi haandi befwaalire engubo chifwaanana echa ranjaayi. Bali ohweetekeha ohuseeta! Ebigaari byaabwe bimyeesuha koti omuliro! Efaraasi chaabwe chiyobere!

⁴ Ebigaari biri ohweyuula koti ebilaluuhe hu makira, nibyeyuula nibikobola haandi nibichia mu moni mu sipaapi sy'esiko. Biri ohumyeesuha koti etoochi nibiduumaduuma buli abuundu koti emesu.

⁵ Abahoongo balaalihwa; beegumula nibeecha nibayiindikana. Abaseeti beeyula hu bida nibateka engabo ch'ohulwaanira.

⁶ Ebiruwa byohu mwaalo byeyikula sa ebyeene; edooho lichuule oluteengo.

⁷ Omutuki muhasi apeeywa sa; abahalaabani bae balira koti amaguugu nibeehuya embeere mu sibeera.

⁸ Koti amaachi kafuduule ediba abaandu bayiindikana nibatula mu Ninefe! Amaliro keecha kati, “Lehe! Lehe!” Nae abulao oyo yeesi okaluuhana yakobolayo.

⁹ Yaaye efeesa! Yaaye esaabbu! Esiko syeechulamo obuyiinda!

¹⁰ Ninefe sisihiriiswe, sijwaang'irwe, siyuumbire! Emyooyo kifwiire obuti; amahuumbo kateengereha, amaani kaweere; obweeni bufwiiririire.

¹¹ Bulaanu esilaangwa esiko siri yeena, esyalichiingi koti esidwooli sy'edalang'i, abuundu yaliisiraangwamo edalang'i njere, abuundu yi dalang'i saacha neende ehasi byachichaanga mani abaana bachio baba mu muleembe?

¹² Edalang'i yiitire esyohulya syayo yaasidonyadonyamo mu bituundu eyaasye neende abaana bayo banyale ohulya bulai; yeechusa esidwooli syayo neende ebikusu by'enyama.

¹³ Omwaami w'Obunyala bwoosi aboola ati, “Ese bulaanu ndi omusuku wao! Ese njia ohusaamba ebigaari byao byoosi biwe. Abanamaye bao bachia ohwiitirwa mu biita, mani male mbukule buli siindu si wali ni watusa hu baandu baandi. Obwekoombi bw'abakali bao haba sibucha ohutekeereswaho haandi.”