Mika 6 - EBBAIBBO EMBOOSI YA NASAAE

Ohwekanyiirisa hw'Omwaami hu Abaisiraeli

¹ Wulire bi Omwaami aboola: “Siingira, wekanyiirise esidinyu syao mu moni w'engulu, mani leha ebigulu biwulire ekono lyao.

² Eng'we engulu neende emise ch'esyaalo ch'endaalo choosi, wulire ohwekanyiirisa hw'Omwaami. Olwohuba yekanyiirisa abaandu bae, haandi achia ohuchuunia Abaisiraeli.”

³ Omwaami ateeba ati: “Eng'we abaandu baange, mbaholere siina syeene? Mbajoong'iise endye? Mungobolemo!

⁴ Ndabatusa mu syaalo sy'e Misiri, haandi ndabanunula ohutula mu buboye. Ndatuma Musa, Arooni neende Miriamu ohubeemereramo.

⁵ Eng'we abaandu baange, mwiichulise bi Bbalaki omutuki wa Moabbu yali n'atekeehe ohubaholaho, neende bi Bbalamu omwaana wa Bbeori yamukobolamo. Mwiichulise ebyaliwo nimutula Akasia ohwoola Giligaali, mani munyale ohumanya bi ndahola ohubawonia.”

Ebiindu bi Omwaami adaha

⁶ “Siina syeene si ndaaleetere Omwaami, Nasaae wo muukulu, ninjicha ohwiinamira mu moni wae? Muleetere emoosi chimalire omwaaka mulala, mani chiyaaneyo chibe esiyaanwa sisaambwa?

⁷ Mani Omwaami yahasiime emiiku elifu neende elifu, neende amafuta maangi akahulukusa koti emyaalo? Omwaana waange waamberi niye yi mba nyaanayo koti esiyaanwa hulw'ebyonoono byaange? Esyaamo sy'omubiri kwaange sibe esiyaanwa sy'ebyonoono sy'omwooyo kwaange?”

⁸ Omwaami amalire ohutweekesa esiindu silai. Esiindu si Omwaami adaha huhole nisyo sino: Ohuholaanga ebihoyera, ohubeechaanga ab'obuheeri buli siha, neende ohumenyaanga nae nihuli abaloonga.

⁹ Sya makesi ohutya Omwaami. Omwaami ahuumula eyiri esiko ati: Wulire, eng'we abaandu bebuusira mu siko!

¹⁰ Mu nyuumba ch'abonooni, mulimo ebiindu by'engaanga bi banyoola mu ngira mbi. Beehoonyera ebipiimo bibi bi tadaha daawe.

¹¹ Nyala endye ohuleheramo abaandu beehoonyera elatiri neende ebipiimo biindi ebitaali ebyadyeeri?

¹² Olwohuba abayiinda bao bafwiinyirira abamanani, haandi eng'we muli ababacha. Mulomaloma eby'obubacha.

¹³ Mani sakira njaakire ohubasaandya, mbasihirise hulw'ebyonoono byeeng'we.

¹⁴ Mwahalye, nae haba simwaheekute daawe Mwahadoong'e nimulumwa enjala sa. Mwahafwiirwe ebiindu bi mwebiihira, haandi ebyahawoneo, njia ohubisihirisira mu biita.

¹⁵ Mwahataake, nae haba simwahakese daawe; Muchia ohuhunya emituli munyoole amafuta, nae haba simuchia hukebaha daawe. Muchia ohuhunya emisabbiibbu, nae haba simwahang'we amalwa kachio daawe.

¹⁶ Olwohuba muloondakana neende ebiima bibi bya Omuri, neende ebiholwa by'enyuumba y'Ahabbu; haandi muholera hu makesi kaabwe. Mani eng'we abaandu baange, njia ohubasihirisa, haandi abaandu boosi bachia ohubalekeeresa. Buli abuundu, abaandu bachia ohubanyekaanga sa.