Mika 3 - EBBAIBBO EMBOOSI YA NASAAE

Miika yoolobya abeemirisi ba Yisiraeli

¹ Ao mani nimboola endi: Wulire, eng'we abeemirisi ba Yisiraeli neende eng'we abatuki ba Yisiraeli! Niing'we abahabeere nimumanyire obwadyeeri.

² Nae musyuula ebilai mani mwaaheera ebyonoono. Mubaaka abaandu baange mani mwaabamalaho esihoba, mwaatusa enyama hu makuumba kaabwe.

³ Mulya abaandu baange, haandi mwaabatusaho esihoba mani mwaafunakafunaka amakuumba kaabwe, mwaabatematema koti enyama yohudeehera mu nuungiro.

⁴ Esiha syahoole mani balirire Omwaami, nae haba saacha ohukobolamo daawe. Haba saacha ohuwulira ohusaba hweeng'we daawe, olwohuba mwahola ebiholwa bibi.

⁵ Omwaami aboola ebidiira hu banabbi abo nibakosakosa abaandu baange, abasuubisa omuleembe, eyiri abo abababeresa esyohulya, nae abalaanga ebiita eyiri abo abatababeresa ebyohulya. Abanabbi abo Omwaami aboola ati:

⁶ “Mani sakira abanabbi eng'we, esiro siri aambi ohubakwaaho, haandi esiirima ohuboolaho. Elyuuba liri aambi ohukwa nimubona, haandi ebiha by'esideete, bibeerimire. Mani mube mu siro nimutaboneherwa, haandi mube mu siirima nimutalakula.”

⁷ Abanabbi chana abo bahadiirwe esoni, abalakusi chana bosi bahadiirwe esoni. Boosi bahediire hu minwa, olwohuba Nasaae haba siyahabakobolemo daawe.

⁸ Nae ese, Omwaami yaanjichusa amaani, neende Mwooyo wae, neende obwadyeeri neende obunyala, ohweekesa ab'enyuumba ya Yakobbo obudoondobanu bwaabwe, neende Abaisiraeli ebyonoono byaabwe.

⁹ Wulire sino, eng'we abeemirisi b'enyuumba ya Yakobbo neende abatuki ba Yisiraeli, eng'we abasyuula obwadyeeri, esilai mani mwaahola esyonoono.

¹⁰ Eng'we aboombaha Siyooni hu muse kw'obutemo, neende Yerusalemu hu muse kw'esibi.

¹¹ Abahuluundu basyo baheenga emisaango olw'ohukuliirirwa. Abalaamisi basyo beekesa nibapaangiiswe, abanabbi basyo balaanga banyoole eseende. Mani boosi beesika Omwaami nibaboola bati, “Omwaami ali naafwe. Sibulao esyonoono sinaatukweeho daawe.”

¹² Mani sakira hulweeng'we, Olugulu lwa Siyooni lwahalimwe koti endalo. Esiko sya Yerusalemu syaheehole esituuli sy'ebikoha. Olugulu luliho Enyuumba ya Nasaae lwaheehole esichaha.