Matayo 21 - EBBAIBBO EMBOOSI YA NASAAE

Ohwiingira hwa Yesu hw'oluyaali mu Yerusalemu

¹ Nae Yesu neende abeeki bae nibali aambi ohwiingira mu siko sya Yerusalemu, boola Bbetifaage aambi neende olugulu lw'emiseituuni. Mani Yesu yatuma abeeki babiri,

² n'ababoolera ati, “Muchie mu siko sibali mu moni, mani muchia ohwaakaanayo esuhiri yi baboyere niyiri neende omwaana kwayo. Muchiboolole, mani muchindeetere.

³ Nae omuundu yeesi naababoolera esiindu syoosi, mumuboolera muti, ‘Omwaami niye ochidaha,’ mani achia ohuchibalehera.”

⁴ Sino syeeholeha ohwooseresa abweene bi omunabbi yalomaloma n'aboola ati;

⁵ “Muboolere omuhaana wa Siyooni muti, boneho, omutuki wao mbao yeecha yooli, Muloonga muno, haandi yehaale hu suhiri, hu mwaana kw'esuhiri, esuhiri njere.”

⁶ Mani, abeeki abo bachia baahola koti lu Yesu yali naabatumire;

⁷ baleeta esuhiri eyo, neende omwaana kwayo, bachiaalaho engubo chaabwe, mani Yesu yaachiihalaho.

⁸ Esidiiyiha sy'abaandu sihoongo nasyo syaala engubo chaabwe hu ngira, nae abaandi baakula amasaga k'emisaala nibakaala hu ngira.

⁹ Esidiiyiha sy'abaandu syali nisimwiimiriiremo, neende esyali simuloondaho, byachaaka ohuhuumaanga biti, “Hosaana! Omwaana wa Daudi! Ali neende ehabi oyo owiicha mu liita ly'Omwaami! Hosaana aakulu Muukulu eyo!”

¹⁰ Mani Yesu niyeengira mu Yerusalemu, abaandu bomu siko omwo boosi beehoya muno, edooho lyoosi lyaaduma-buduma, nibateeba bati, “Wuno niye wiina?”

¹¹ Esidiiyiha nasyo syakobolamo siti, “Wuno niye Yesu Omunabbi ohutula Nasareeti mu Galilaaya.”

Yesu yeengira mu Nyuumba ya Nasaae

¹² Yesu yeengira mu Nyuumba ya Nasaae, yachaaka ohwiiruhaniamo abali nibakuliramo neende abali nibakusiramo ebiindu. Yafuumamya emeesa ch'abafuunjisi b'eseende neende ebisaala by'abachurusi b'amabburuuku.

¹³ Yesu yababoolera ati, “Syandiikwa mu byandiiko byoolerefu siti, ‘Enyuumba yaange yinalaangwaangwa yiti Nyuumba ya Nasaae.’ Nae eng'we muyikaluuhaanie ohuba eng'uungu y'abanyaka.”

¹⁴ Mani abawofu neende abalema beemao beecha yaali mu Nyuumba ya Nasaae omwo, yaabawonia.

¹⁵ Nae abalaamisi bahuluundu, neende abeekesa b'Amalako, nibabona eby'amayia bi Yesu yali n'aholere, alala neende abaana bayere bali nibahuumuliraanga mu Nyuumba ya Nasaae omwo bati, “Hosaana! Omwaana wa Daudi,” etima lyabadiira muno.

¹⁶ Bateeba Yesu bati, “Oli ohuwulira bi baana bano baboolaanga?” Nae Yesu yabakobolamo ati, “Eee. Nae eng'we musisiiri ohusomaho esyandiiko siboola siti, ‘Ni mu minwa ky'abayere neende abaana badoto banuuna, nimwo omutula efuma ya Nasaae ndai mu bwiichufu’?”

¹⁷ Yesu yeemao yaabaleha ao, yaatula mu siko esyo yaachia mu Bbetani yi yeeyalisa.

Yesu abwaaba omusaala kw'enduli

¹⁸ Echuli nibuhyeere, Yesu yakobola mu siko esyo, yaawulira enjala niyimuluma.

¹⁹ Niyabona omutuli hu ndulo w'engira, yasuda yoola mu sisina syakwo, nae yaahaya ohunyoolahooho esyaamo syoosi, ohumalaho amasaafu mahaya nikadidya. Mani yaboolera omusaala okwo ati, “Siwahaamehooho esyaamo syoosi, ehabi liindi!” Mani omusaala okwo, nikwoomerao.

²⁰ Abeeki nibabona sino, bawuka muno baateeba bati, “Lwasiina, omusaala kw'enduli okwo kwoomere bwaangu kutyo?”

²¹ Nae Yesu yabakobolamo ati, “Mbaboolera obwadyeeri endi, nimuba neende efukiirira, mani mwaahaya ohukanakana, muba muchia ohunyala ohuhola si ese holere hu musaala kw'enduli okwo, nae kata nimuboolera olugulu luno muti, ‘Siingira ano mani weesukune mu nyaanja,’ nibiba sa koti lu muba muboolere.

²² Haandi nimuba neende efukiirira, muba muchia ohunyoolaanga byoosi-byoosi bi muba nimusabire.”

Esiteebo sidiira hu bunyala bwa Yesu

²³ Yesu yeengira mu Nyuumba ya Nasaae, nae niyaba niyeekesa, Abalaamisi bahuluundu, alala neende abahuluundu b'Abayudaaya beecha yaali baamuteeba bati, “Bunyala siina bw'oli nabwo ohuhola ebiindu bino? Nae wiina owahuberesa obunyala obwo?”

²⁴ Yesu yabakobolamo ati, “Mulehe syesi mbateebeho esiindu silala mberi, nae ni musiingaluhamo, syesi mba njia ohubaboolera yi ndatusa obunyala bw'ohuhola ebiindu bino.

²⁵ Obunyala bwa Yowaana bw'ohubaatiisa abaandu, bwatula yeena? Bwatula eyiri Nasaae, kose eyiri abaandu?” Nae abeene-na-beene bachaaka ohuteebana bati, “Huboole hutye? Nihuboola huti, ‘Bwatula eyiri Nasaae,’ aba achia ohututeeba ati, ‘Nae hu siina simwamufukiirira?’

²⁶ Nae nihuboola huti, ‘Bwatula mu baandu’ hutya bi baandu banyala ohutuhola, olwohuba abaandu boosi bomiisa bati, Yowaana yaba omunabbi wadyeeri.”

²⁷ Mani nibamukobolamo bati, “Hukoterwe.” Nae yesi yababoolera ati, “Mani syesi siindababoolera yi ndatusa obunyala bw'ohuhola ebiindu bino.

Olukaado lw'abaana babiri

²⁸ “Bulaanu naang'we mubaasa mutye? Omuundu wuundi yaba neende abaana bae basyaani babiri. Yaboolera omusyaani muhuluundu ati, ‘mwaana waange, chia olime mu ndalo yaange enyaanga yino.’

²⁹ Nae yamukobolamo ati, ‘Haba siinjia huchia daawe.’ Nae luunyuma, yeemao yebaasa, mani yaachia.

³⁰ Luunyuma, Saabwe yachia eyiri omusyaani wuundi oyo, yesi yaamuboolera ati achie ahole nasilala atyo. Oyo nae, yamukobolamo ati, ‘Eee, omuhuluundu njia ohuchia,’ nae yaahaya ohuchia.

³¹ Bulaanu hu babiri abo, wiina mweene owahola si saabwe yali niyeenya?” Bamukobolamo bati, “Omwaana muhuluundu oyo.” Yesu yababoolera ati, “Mbaboolera obwadyeeri endi, abatoosa b'omusolo neende abahasi bacheke, bachia ohubataangirira ohwiingira mu Bwaami bwa Nasaae.

³² Olwohuba, Yowaana yeecha yi muli ohubeekesa engira y'obwadyeeri, nae mwaahaya ohumufukiirira; nae abatoosa b'omusolo neende abahasi bacheke bamufukiirira. Haandi kata nimwabona mutyo, simweefunakaho mani mwamufukiirira kata.”

Olukaado lw'abahalaabani bomu ndalo y'emisabbiibbu

³³ Yesu yaboola ati, “Mutekeerese olukaado luundi. Yaliwo omweenengo wuundi owataaka endalo y'emisabbiibbu, mani yaayisitiraho olukaka ohuyebodoohania. Haandi yayabamo eliina ly'ohuhunyiramo efiini, mani yoombahamo omunaara. Yapaangisa endalo eyo abalimi baandi, nae omweene yeemao yaasamula mu syaalo sy'eyale.

³⁴ Endaalo ch'ohunoka emisabbiibbu nichoola, yatuma abahalaabani bae eyiri abalimi abo ati bamubeerese omukabo kwae.

³⁵ Nae abalimi nabo, bakwa hu bahalaabani bae abo baahuya mulala, beeta owuundi, haandi baalasa owuundi amakina.

³⁶ Nae haandi, omweene ndalo oyo yeemao yaatuma abahalaabani baandi baangi ohuhiraho abataangira, nae abalimi abo baabahola nasilala batyo.

³⁷ Luunyuma lwa byoosi, yeemao yaatuma Omwaana wae mweene n'aboola ati, ‘Leero hu luno bachia ohutya Omwaana waange mani bamwiisemo oluyaali.’

³⁸ Nae nibabona Omwaana wae, bafukiirisania abeene-na-beene bati, ‘Wuno niye omusiha wae; leha humwiite, mani hweebukulire omwaandu kwae.’

³⁹ Mani beemao baamukwaaho, baamusukuna erwaanyi w'endalo y'eemisabbiibbu, baamwiita.

⁴⁰ Bulaanu, omweene ndalo niyahakobole, yahaholere abalimi abo siina?”

⁴¹ Bamuboolera bati, “Syadyeeri, achia ohwiita bubi abalimi babi abo, amale apaangise abalimi baandi endalo yae, abachia ohumuberesa omukabo kwae kw'efiini, ebiha by'ohunoka emisabbiibbu nibyoolere.”

⁴² Yesu yabateeba ati, “Musisiiri ohusomaho ebyandiiko byoolerefu muti; ‘Ekina li boombahi balekeeresa nilyo elyeeholere ehuluundu mu musiingi; kuno mulimo kw'Omwaami nikwo; haandi kutubonehera bulai muno!’

⁴³ Sakira mbaboolera endi, bachia ohubang'uula obwaami bwa Nasaae babuberese abaandu baandi, abaama ebyaamo bilai.”

⁴⁴

⁴⁵ Abahuluundu b'Abalaamisi, neende Abafarisaayo nibawulira engaado chi Yesu yakaada echo, bamanya sa bati nibo ba yali naalomalomaho.

⁴⁶ Nae nibateemaho ohumudiira, batya muno esidiiyiha syali syafukiirira siti, Yesu yali omunabbi wa Nasaae.