Mariko 4 - EBBAIBBO EMBOOSI YA NASAAE

Olukaado lw'omuwaanyi

¹ Yesu haandi yachia hu lwaasi lw'enyaanja ya Galilaaya yachaaka ohweekeserayo. Esidiiyiha sy'abaandu sihoongo muno syamwebodoohana, mani yeehala mu lyaato, nae esidiiyiha esyo syadoong'a nisihaale hu lwaasi lw'enyaanja.

² Yesu yabeekesa ebiindu biingi muno niyehoonyera engaado. Nae niyaba n'abeekesa, yababoolera ati,

³ “Mutekeerese bulai! Omuundu wuundi yatula yaachia ohuwaanya emwo.

⁴ Niyali ayaanya, emwo yiindi yakwa hu ngira, mani amayoni keecha kayiboocha.

⁵ Emwo yiindi yakwa hu bikina, ataali eloba liingi, mani bwaangu-bwaangu yamera, olwohuba haba siyali yisiihirwe aasi muno.

⁶ Nae omubasu nikwafwa, emwo eyo yaniaala, mani yooma olwohuba haba siyali niyayira emisi aasi muno.

⁷ Emwo yiindi yakwa mu mawa, mani amawa kaayifwiinyirira, yaahaya ohwaamaho esiindu syoosi.

⁸ Emwo yiindi yakwa mu loba lai, mani yaama ebyaamo. Yahula, yaakaliya, mani yaama ebyaamo, aandi amahumi kadatu, aandi amahumi kasaasaba, haandi aandi emia ndala.”

⁹ Yesu yaboola ati, “Oyo yeesi oli neende amatwi kawulira, leha Awuliire.”

Esifune sy'ohweekesera mu ngaado

¹⁰ Nae Yesu niyali atulire eyiri esidiiyiha, abaandu bali nibadoong'ere nae alala neende ehumi-na-babiri, bamuteeba ebidiira hu ngaado.

¹¹ Nae Yesu yababoolera ati, “Eng'we niing'we ababereswa ehabi y'ohumanya esyaama sy'Obwaami bwa Nasaae, nae abaandu b'erwaanyi, buli siindu siri sa mu ngaado;

¹² mani bachia ohwewunja bulai bweene nae bahaye ohubona; haandi bawulire bulai bweene, nae bahaye ohumanya amahuluundu keene; olwohuba banyala ohweyolobya mani baaleherwa.”

Yesu atuumbula amahuluundu k'olukero lw'omuwaanyi w'emwo

¹³ Yesu yeemao yaabateeba ati, “Eng'we mwesi simumanyire amahuluundu k'olukero luno? Nae muchia ohumanya mutye amahuluundu k'engero chiindi choosi?

¹⁴ Omuwaanyi w'emwo niye owaanya emboosi ya Nasaae.

¹⁵ Abaandu bawulira emboosi ya Nasaae, nae bwaangu-bwaangu Sitaani yeecha abamalamo emboosi yiba niyingiire mu myooyo kyaabwe, nibo abo abafwaana neende emwo yakwa hu ngira.

¹⁶ Abaandu bawulira emboosi ya Nasaae, mani bwaangu-bwaangu baayidiira neende esangaalo, nibo abo abafwaana neende emwo yakwa hu bikina.

¹⁷ Bano, sibaba bali neende emisi mileeyi, mani besimiirisaho hulw'esiha sidiidi, nae ohusaanda oba ebidinyu nibiboolaho hulw'emboosi ya Nasaae, bwaangu-bwaangu bayebwaabaanga.

¹⁸ Nae abaandi bali koti emwo yayaanywa mu mawa. Abo nibo abawulira emboosi ya Nasaae,

¹⁹ nae hulw'ohwelalihirira hw'obulamu bwomu syaalo muno, neende ohwekoomba hw'obuyiinda bwomu syaalo, alala neende obwekoombi bw'ebiindu biindi, biingira mu myooyo kyaabwe mani byafwiinyirira emboosi ya Nasaae, mani yahaya ohwaamaho esiindu syoosi.

²⁰ Nae abaandi bafwaana koti emwo yawaanywa hu loba lai, abo nibo abawulira emboosi ya Nasaae, bayifukiirira mani baama ebyaamo, aandi amahumi kadatu, aandi amahumi kasaasaba, haandi aandi emia ndala.”

Etaara lyafuunihwa mu simweero

²¹ Yesu yemeeda ohuboola ati, “Mani etaara lileetwaanga mu nyuumba ohufuunihwa mu simwero, oba ohuteebwa mu lwaalo w'esitaanda, kose hu siteeni syalyo?

²² Olwohuba abulao esiindu syoosi esyakiswa, esitachia ohukisulwa syaamanyihana, haandi abulao esiindu syoosi esyabwiihwa esitalibwiihulwa syaabonehana alafu.

²³ Oyo yeesi oli neende amatwi kawulira leha Awuliire.”

²⁴ Mani Yesu yababoolera ati, “Mwehaliiriseenge ebyo bi muwulira. Esikero syoberesaho owaasyo, nisyo syosi si wahabereserweho, haandi neende ohwongerwaho ebihira ao obuungi.

²⁵ Olwohuba, oyo oli nabyo achia ohwoongerwa; nae oyo otaali nabyo, kata ebidiidi byali nabyo bachia ohubimumalaho.”

Olukaado ludiira hu mwo yimera haandi yaahula

²⁶ Haandi Yesu yababoolera ati, “Obwaami bwa Nasaae bufwaanana koti omuundu yahawaanya emwo mu ndalo yae.

²⁷ Mani yakobola engo, esiro nisyoola niyekonera, obwiire nibuhya, niyesiingirira, nae emwo eyo yimera yaahula, omweene n'atamanyireho koti lu yimereeremo haandi yaahula.

²⁸ Eloba lyeene nilyo elikera emwo yaamera haandi yaahula ohwoola lu yaangala.

²⁹ Nae ebyaamo nibyaangala, omuundu oyo atulaniramo bwaangu yachaaka ohukesa olwohuba ekesa liba lyoolere.”

Olukaado ludiira hu lumwo lw'omutuumba

³⁰ Haandi Yesu yaboola ati, “Obwaami bwa Nasaae hunaabukeraanie hu siindu siina, oba hunaabukaadire lukaado siina?

³¹ Bufwaana neende olumwo lw'omutuumba, olwohuba ebiha by'ohulutaaka mu loba, nilwo oluhiramo obudiidi hu syaalo;

³² nae nilumalire ohutaakwa, lumera lwaahula, lweehola okusaala kuhiramo emisaala kiindi kyoosi, mani kwataaho amasaga mahoongo muno, ka mayoni kabburuha kanyala ohwoombaha ebiyu, mu siiniha syakwo.”

³³ Yesu, yehoonyera engaado nyiingi chifwaana chityo ohubayaalira emboosi ya Nasaae. Yabeekesaanga atyo hu banyale ohumanya bulai.

³⁴ Haba siyalomalomaanga nabo esiindu syoosi n'atehoonyere olukaado, nae niyabeechaanga yeeng'ene neende abeeki bae, yabatumbuliraanga alafu buli siindu syoosi.

³⁵ Hu ludaalo lweene olwo engoloobe, yababoolera ati, “Mulehe husyabale huchie engereha.”

³⁶ Baleha esidiiyiha sy'abaandu ao, beengira elyaato li yali yehaalemo, mani nibawaao. Amaato kaandi kosi kali ao.

³⁷ Nibali nibasyaabala nibawaao, omuyaka kw'amaani kweene kwasiingira, mani amafwiinda keeyiha kachaaka ohuubba hu lyaato li balimo lyaaba aambi ohwiichula.

³⁸ Nae Yesu yali ali mu numa naakona hu mabasi. Bamusimusa nibaboola bati, “Omweekesa, huli ohusihirira naawe haba sodeebaho haba?”

³⁹ Yesu yasiingira, yaahabuhira omuyaka okwo, haandi yaboolera enyaanja chana ati, “Yenjeera! Okwalaale!” Mani omuyaka okwo kwaakama, enyaanja yaanyita chi!

⁴⁰ Yesu yabateeba ati, “Lwasiina mutiire? Haba simuli neende efukiirira?”

⁴¹ Mani nibatya muno, nibachaaka ohuteebana abeene-na-beene bati, “Wuno nae muundu siina yi muyaka neende amafwiinda byosi biwulira?”