Luka 4 - EBBAIBBO EMBOOSI YA NASAAE

Ohuteemwa hwa Yesu

¹ Mani Yesu, niyali yechuule Mwooyo Mwoolerefu, yakobola n'atula Yorodaani, mani yemirirwa neende Mwooyo oyo

² hulw'embaka y'endaalo amahumi kane naali mu siparara, nateemwa neende Sitaani. Mu mbaka eyo yoosi, haba siyalyaaho esiindu syoosi; mani embaka eyo niyawa, enjala yachaaka ohumuluma.

³ Sitaani yeecha yamuboolera ati, “Nooba nooli Omwaana wa Nasaae, lagira ekina lino lyeehole omugaati.”

⁴ Nae Yesu yamukobolamo ati, “Syandiikwa siti, ‘Omuundu saabao mulamu hulw'ebyoohulya byoong'ene.’ ”

⁵ Haandi Sitaani yeecha yaamuyira aakulu, mani yamweekesa obwaami bwoosi obwohu syaalo mu siha silala,

⁶ mani Sitaani yamuboolera ati, “Ese njia ohuhuberesa obunyala buno bwoosi, alala neende oluyaali lwaabwo; olwohuba bwamala ohuumbereswa, mani mbuberesa oyo yeesi yi mba nindaha.

⁷ Mani ewe niwuunyinamira, buno bwoosi bucha ohuba obwao sa.”

⁸ Nae Yesu yamukobolamo ati, “Syandiikwa siti, ‘Ohoyere ohwiinamiraanga Nasaae, Omwaami wao, haandi oyo yeeng'ene niye yonahalaabaniranga.’”

⁹ Haandi Sitaani yayira Yesu Yerusalemu, mani yamudungeeresa abuundu ahira obuleeyi hu Nyuumba ya Nasaae, mani yamuboolera ati, “Nooba nooli Omwaana wa Nasaae, yakuha otule ano okwe aasi;

¹⁰ olwohuba syandiikwa siti, ‘Achia ohutuma bamalaika bae bahwakaanire mani bahuliinde,’

¹¹ haandi ‘Bachia ohuhukiingira aakulu hu mahono kaabwe, ohaye ohwegumula ohukulu hwao hu kina.’ ”

¹² Nae Yesu yamukobolamo ati, “Siboolwaanga siti, ‘Otateemaangaho Nasaae Omwaami wao.’ ”

¹³ Mani Sitaani niyali amalireyo buli teemo lyoosi, yamutulaho yaalinda esiha siindi syoole.

Yesu achaaka Omulimo kwae mu Galilaaya

¹⁴ Mani Yesu yeecha yakaluha Galilaaya nasisiiriho amaani ka Mwooyo, mani efuma yae yasalaana yaswaania esyaalo esyo syoosi.

¹⁵ Mani yeecha yekesa mu sinagoogi chaabwe, mani buli muundu yeesi yaamufumia.

Nasareeti sihaya Yesu

¹⁶ Yesu yoola e Nasareeti, yi yali yahusirwa; mani yaacha mu sinagoogi, koti lu yali yanala ohuholaanga, hu ludaalo lwa Sabbaato. Mani yeecha yaasiingira ohusoma;

¹⁷ nae bone beecha bamuberesa esitabo sya nabbi Yisaaya. Yabwihula esitabo esyo, mani yakaana yisyandiikwa siti,

¹⁸ “Mwooyo w'Omwaami yandiho, olwohuba amalire ohuumbahaho amafuta ohuyaalira abamanani, Emboosi Ndai Yanduma ohulaangirira eyiri abadiirwa endi bachia ohulehuulwa, haandi abawofu endi bachia ohuliimbula babone, neende abeehalwaho ohulehwa babe neende omuleembe,

¹⁹ ohulaangirira endi omwaaka kwafukiirirwa ohuba okw'Omwaami kwolere.”

²⁰ Yabwihawo esitabo esyo, yaasikalusira omuliindi oyo, yeehala aasi; mani emoni ch'abaandu boosi abali mu sinagoogi, chamuweeraho.

²¹ Yachaaka ohubaboolera ati, “Hu ludaalo luno, ebyandiiko byoolerefu bino, byoolereere koti lu muwuliire mutyo.”

²² Mani boosi bamulomalomaho bulai muno, haandi bawuka muno obulai bw'emboosi chatulaanga mu munwa kwae; baboola bati, “Wuno haba siniye omwaana wa Yosefu?”

²³ Nae yababoolera ati, “Muchia ohunduumbulira ataali ohukana-kana olukaado luno mbwe, ‘Ewe omulesi, wewonie omweene; ebyo bihwaulira huti waholera Kaperanaumu, biholere ano wosi, mu syaalo syao syeene.’ ”

²⁴ Nae Yesu yaboola ati, “Mbaboolera obwadyeeri endi, abulao nabbi yeesi ofukiirirwaanga mu syaalo syae syeene.

²⁵ Nae mubwadyeeri mbaboolera endi, mu ndaalo cha Elija, ekulu nilyeekalwa ohumala embaka y'emyaaka kidatu neende emyoosi kisaasaba emilaamba, haandi esiminyu sihoongo muno nisyalya esyaalo syoosi, baliwo abahasi bafwiirwe abaangi muno mu Yisiraeli,

²⁶ nae Elija siyatumwa eyiri abo boosi ohutusaho eyiri omuhasi mufwiirwe ow'e Sarefaasi, mu syaalo sya Sidoni.

²⁷ Haandi mu biha bya nabbi Erisa, yaliwo abageenge abaangi mu syaalo sya Yisiraeli syoosi; nae abulao kata mulala hu abo owawonisibwa, ohutusaho Namani Omusiria yeeng'ene.”

²⁸ Nae nibawulira sino, abo boosi abali mu sinagoogi, etima liingi muno lyabadiira.

²⁹ Mani baasiingiriramo, bamusiindikirisa bamusukuna erwaanyi w'esiko sihoongo esyo, mani bamuniinia hu sigulu si siko sihoongo syaabwe esyo syoombahwaho, nibadaha ohumusiindiha aasi akwiire omutwe.

³⁰ Nae omweene yeyindikania yabitira mu sidiyiiha esyo yeweerawo.

Omuundu oliho esihyeeno

³¹ Yesu yeehirira yaachia Kaperanaumu, mu siko sya Galilaaya. Haandi niyali n'abeekesa hulwa Sabbaato;

³² abaandu bawuka muno enjekesa yae eyo, olwohuba emboosi yae yali yiri neende obunyala.

³³ Nae mu sinagoogi omwo, mwalimo omuundu wuundi owali neende omwooyo kw'omusaambwa mubi; mani yeecha yaalirira mu kono ly'aakulu ati,

³⁴ “Eee, Onaatuhole otye, ewe Yesu wa Nasareeti? Wichire ohutusihirisa? Ese humanyire, niiwe Omwoolerefu mweene wa Nasaae.”

³⁵ Nae Yesu yakuhabuhira n'aboola ati, “Buleera chi, mani omale omutulemo!” Mani omusaambwa okwo nikwamala ohumuubba aasi akatikaati w'abaandu, kwamutulamo, nikutaamuholereho obubi bwoosi.

³⁶ Mani abaandu boosi bawuka baboolanira abeene-na-beene bati, “Yino mboosi siina? Olwohuba yehoonyera obunyala neende amaani, alagira-bulagira ebihyeeno, mani nibibatulamo-butula.”

³⁷ Mani efuma yae niyasalaana mu mbeka choosi-choosi ech'esyaalo sisibiraane ao.

Yesu awonia abaandu baangi

³⁸ Yesu yasiingira yaatula mu sinagoogi, yacha yeengira mu nyuumba ya Simooni. Bulaanu, masaalang'ene Simooni yali omulwaae w'omusuuja, mani basaba Yesu amuhoonye.

³⁹ Mani Yesu yeecha yeema yali, yahabuhira omusuuja okwo, kwamuleha; mani abweene ao, yasiingira yabahalaabanira.

⁴⁰ Bulaanu, elyuuba nilyali nilikwa, abo boosi abali neende abalwaae balwaala obulwaae butaali nasilala beecha baabaleeta yaali; mani Yesu yesa amahono kae hu buli mulwaae, mani yabawonia boosi.

⁴¹ Mani emisaambwa kyosi kyatula mu baandu baangi nikirira kiti, “Niiwe Omwaana wa Nasaae!” Nae yakihabuhiraanga, n'atakikanya ohulomaloma, olwohuba kyali kyamanya kiti niye Kristo.

Yesu ayaalira mu sinagoogi chikabuhaane

⁴² Nae nibwahya, Yesu yasiingira yachia abuundu abula abaandu. Nae abaandu bamukoonya ohwoola lubamwolaho, bamuhayiraho nibatadaha abatuleho;

⁴³ Nae yababoolera ati, “Ese hoyeere ohuchia ohuyaala Emboosi Ndai ch'Obwaami bwa Nasaae mu biko biindi byosi; olwohuba sino nisyo esyakera ndatumwa ohwiicha.”

⁴⁴ Mani yacha yayaalira mu sinagoogi chikabuhaane mu Buyudaaya.