Luka 16 - EBBAIBBO EMBOOSI YA NASAAE

Omuliindi mukesikesi

¹ Yesu haandi yaboolera abeeki bae ati, “Olwoola, yaliwo omusaacha muyiinda wuundi owali neende omuliindi wae, mani abaandu baandi beecha bamwekanyiirisira muno ebidiira hu musaacha wuno, nibaboola bati, yali anyaasa-nyaasa emyaandu kyae.

² Mani omusaacha munyali yalaanga omuliindi oyo, yaamuboolera ati, ‘Siina syeene sino si ndi ohuhuwuliraho? Mberese embaliirira y'obuliindi bwao, olwohuba s'ochia huba haandi omuliindi w'ebiindu byaange.’

³ Mani omuliindi oyo yaboola omweene mu mwooyo kwae ati, ‘Ndaahole siina syeene, olwohuba omwaami waange mbano achia ohumalaho omulimo kw'obuliindi? Ese mbula amaani k'ohulima, haandi ohwesabirisa hunyaambya esoni.

⁴ Heengereo esy'ohuhola, hu baandu baandi banyale ohumbukaanira mu madaala kaabwe, nibanjiruuse hu mulimo kw'obuliindi kuno.’

⁵ Yalangaanga buli muundu yeesi owali neende ekobi ly'omwaami wae sya mulala-mulala, mani yaboolera owataangira ati, ‘Omwaami waange ahubaanja siina?’

⁶ Nae n'aboola ati, ‘Ebikero emia ndala eby'amafuta k'emiseituuni.’ Nae omuliindi oyo yamuboolera ati, ‘Bukula obwandiike bw'efukiirisania yao, wiihale aasi bwaangu, wandiike ebikero amahumi kataanu.’

⁷ Haandi yaboolera owuundi ati, ‘Nae ewe obaanjwa siina?’ Nae yamuboolera ati, ‘Ebikero emia ndala by'engaano.’ Omuliindi oyo yamuboolera ati, ‘Bukula obwandiike bw'efukiirisania yao, omale wandiike amahumi kataanu-na-kadatu.’

⁸ Omwaami oyo yasiima muno omuliindi otaali neende obweesikwa wuno hulw'obukesi-kesi bwae obwo; olwohuba abaana b'esyaalo sino bakesi-kesi muno mu ngeri yi badiiraniramo neende oluse lwaabwe ohuhira abaana b'obulafu.

⁹ Mani sakira mbaboolera endi, mwehoonyere mamoni chitaali enuungifu, ohwewaambira abeecha mani ebiha nibyoola chabawaaho, banyala baabakaanira mwaaba mu bumenyo butaakama.

¹⁰ “Oyo yeesi oba omweesikwa mu biindu bidiidi muno aba anaba omweesikwa mu biingi byosi; nae oyo otaali omweesikwa mu biindu bidiidi muno, haba saaba achia ohuba omweesikwa mu biindu biingi byosi.

¹¹ Mani nikali mbwe haba soobeere omweesikwa mu mamoni chitaali enuungifu, wiina mweene ochia ohuhubiihisa obunyali bwadyeeri?

¹² Haandi nikali mbwe soobeere omweesikwa mu biindu by'owuundi, wiina ochia ohuhuberesa ebiindu byao byeene?

¹³ Abulao omuhalaabani muwaambe onyala ohuhalaabanira abaami babiri; olwohuba achia ohusyuula mulala nae aheere owuundi, oba aba achia ohwiisa oluyaali mu mulala nae alekeerese owuundi. Mani s'onyala ohuhalaabanira Nasaae neende mamoni.”

Enomanoma cha Yesu chiindi

¹⁴ Abafarisaayo abali baheera muno eseende, nibawulira bino byoosi, beecha beechusyuula muno Yesu.

¹⁵ Nae Yesu yababoolera ati, “Eng'we niing'we abelyooya abeene mu moni w'abaandu, nae Nasaae amanyire emyooyo kyeeng'we koti lu chiri; olwohuba esyo si baandu bafumia, siwumamo obuhoonyi mu moni wa Nasaae.

¹⁶ “Amalako ka Musa neende obwandiike bw'abanabbi byali nibyo ebiri neende obunyala ohwoola hu Yowaana; nae ohutula ao, Emboosi Ndai y'Obwaami bwa Nasaae yiri ohuyaalwa, mani buli muundu ali ohubwiingiraangamo neende esirifu.

¹⁷ Nae syaangu muno Ekulu neende esyaalo ohuwaao, ohuhira kata ahatoonyese halala hoong'ene ah'amalako ka Musa ohunyaasibwa.

¹⁸ “Omuundu yeesi owirusa omuhasi wae, mani yadeehya owuundi, aba aholere obucheke, haandi oyo yeesi odeehya omuhasi waloba, yesi aba ahola obucheke.

Omusaacha muyiinda neende Lasaaro

¹⁹ “Olwoola, waliwo omusaacha muyiinda wuundi, owefwalaanga engubo ch'oluyaali muno neende ech'elaasi ndai muno, haandi owalichaanga bulai buli ludaalo.

²⁰ Nae omusaacha mumanani, olaangwa Lasaaro, owali yeechula amakoonjo hu mubiri, yeyalisanga hu siruwa sy'omusaacha muyiinda oyo.

²¹ Lasaaro wuno, yekombanga ohulyaaho ebyohulya byali nibilakahaanga aasi ohutula hu meesa y'omusaacha munyali oyo; haandi embwa chechaanga mani nichihoomberera amakoonjo kae ako.

²² Omusaacha mumanani oyo yafwa, yaakiingwa neende bamalaika bamuyira yehala mu lubafu wa Abburahamu. Omusaacha munyali oyo yesi yafwa, yaasiihwa;

²³ mani niyali n'asaandisibwa muno mu syaalo sy'abafu, yasiingisa emoni chae, yaabona Abburahamu naali eyale muno, haandi Lasaaro niyehaale mu lubafu waye.

²⁴ Yahuumula n'alaanga ati, ‘Laata Abburahamu, ngwiire esisa, mani otume Lasaaro, yeenihe mu maachi olwala lwae mani yeeche anyiseho olulimi lwaange; olwohuba ndi mubuchuuni buungi muno mu muliro kuno.’

²⁵ Nae Abburahamu yaboola ati, ‘Musyaaniing'ene, yichulisa oti, mu bulamu bwao hu syaalo, wanyoola ebiindu bilai byao; Lasaaro nae yanyoola ebiindu bibi; nae bulaanu ali mu bulamu buyenjeefu ano, naawe oli mubuchuuni buungi muno.

²⁶ Nae notusireho bino byoosi, akatikaati weefwe naawe, bataao ehooho ndakalafu muno, ohukayira abo boosi abahabitire ohutula eno nibeecha yi muli, haandi yibuleo oyo yeesi onyala ohuhalakania ohutula eyo ohwiicha yi huli.’

²⁷ Nae yaboola ati, ‘Mani Laata hwekweeda, otume Lasaaro achie engo weefwe,

²⁸ olwohuba ndi neende bamwaanama bataanu, achie abalabule, bosi bateecha abuundu wohusaandisibwa ano.’

²⁹ Nae Abburahamu yamuboolera ati, ‘Abo bali neende Musa alala neende abanabbi; leha babawulire.’

³⁰ Nae yaboola ati, ‘Haba daawe, Laata Abburahamu; olwohuba niwiichuhana omuundu yacha yi bali n'atula mu bafu, bachia ohweyolobya.’

³¹ Nae Abburahamu yamuboolera ati, ‘Nibatawulira Musa neende abanabbi, mani haba sibachia ohuwulira omuundu yeesi kata asyuuhe ohutula mu bafu.’ ”