Hosea 8 - EBBAIBBO EMBOOSI YA NASAAE

Omwaami afunaana Yisiraeli hulw'ohwiinamiraanga ebiloongaloongwe

¹ Omwaami aboola ati, “Lisa esing'ora! Abasuku mbao bali ohwiihirira ohwoola hu loba lyaange koti eeswi! Abaandu baange bamalire ohuhalaka Endagaano yi ndahola nabo, haandi bamalire ohujeemera enjekesa yaange.

² Kata neende nibaba nibali ohunaangaanga bati ese niise Nasaae waabwe, haandi nibali ohubolaanga bati, bali abaandu baange, haandi mbwe bati baamanyire,

³ bamala ohuhaya neende buli silai syoosi. Mani ohweema hu sino, abasuku baabwe bachia ohunyala ohuboongaangaho.

⁴ “Abaandu baange bano badolaanga abatuki, nae baholaanga batyo abeene koti lu baba nibadaha. Badolaanga hale abeemirisi, nae ataali ohufukiirira hwaange daawe. Babukulaanga hale efeesa yaabwe neende esaabbu yaabwe, mani nibamala nibachiholamo ebiloongaloongwe hulw'ohusihirira hwaabwe abeene.

⁵ Ese ndasyuula esurusi y'esaabbu yiinamirwaanga neende abaandu bomu siko sya Samaria. Ese etima liinjita bwiita hulwaabwe. Byahoole liina, hu abo beemao boole ohwekaana ohwiinamiraanga ebiloongaloongwe ebyo?

⁶ Omuisiraeli mubaachi ngaandi niye owahola ebiloongaloongwe ebyo, nae haba si nasaae niye kata nabudiidi! Esurusi yinamirwaanga mu Samaria yichia ohusaasakulwamo ebituundu-tuundu!

⁷ Mani nibataaka emboo, bachia ohukesa esifuusye! Omukuunda kw'emere okutaangala haba sikunyalaanga ohutulamo omugaati kwoosi daawe. Nae kata nikuba nikunyalire ohuhola kutyo, abakeni boong'ene nibo ababa nibachia ohunyala ohukulya bakumalirane.

⁸ Yisiraeli syamala ohweehola syaaba koti esyaalo siindi syosi-syoosi, haandi syamala ohweehola esitaali neende obuhoonyi koti sa endamu yamala ohwaadiha.

⁹ Ab'esyeejo koti esuhiri enjalaba, abaandu ba Yisiraeli badiraanga sa engira yaabwe boong'ene. Mani bamala hale ohukabuha ohuchia ohukoonyaanga obuhoonyi ohutula hu Asiria, haandu bamala ohutuunga ebyaalo biindi mbwe biiche bibaliindeenge.

¹⁰ Nae bulaanu, ese njia ohubabuusa alala, mani male mbasaandie. Mu siha esidiidi muno, bachia ohuba nibali ohwekonioleraanga mubuchuuni, omutuki muloobera w'Asiiria naanaba naabafwiinyirira.

¹¹ “Obuungi bw'alutaari chi baandu ba Yisiraeli bachia ohwemeeda niboombahaanga mbwe ohunyala ohumalao esyonoono, nibwo lu buungi bw'obweyaango bu bachia ohunyolaanga obwohuholeraangamo ebyonoono!

¹² Ese nyandiikaanga enjekesa chitabaliha obuungi hulw'abaandu, nae bachiekaanaanga sa koti echiri engeni, haandi ech'abaandu baandi abataali abeene bano daawe.

¹³ Bayaana ebiyaanwa eyiri ese, nae balya enyama ch'ebiyaanwa ebyo. Nae ese, Omwaami, haba siindi omusangaafu nabo daawe, mani bulaanu njia ohwiichulisa ebyonoono byaabwe, mani male mbasaandie hulw'ebyeene ebyo; Ese njia ohubakobosayo mu Misiri!

¹⁴ “Abaandu ba Yisiraeli bano, bamala ohwoombaha amadooho, nae bamala ohwiibirira Omuloongi waabwe. Abaandu ba Yuda bamala ohwoombahaanga ebiko by'engoba. Nae ese njia ohuleeta omuliro kubasaambe kukwiise aasi amadooho kaabwe ako, neende ebiko byaabwe ebyo.”