Hosea 3 - EBBAIBBO EMBOOSI YA NASAAE

Hosea neende omuhasi otaali omweesikwa

¹ Omwaami yeecha yamboolera ati, “Ewe chia haandi weekese obuheeri eyiri omuhasi oyo oli ohuyiranaanga neende abasaacha baandi oyo. Ohoyere ohumuheera koti sa lu ese siiheera sa abaandu ba Yisiraeli, kata neende nibakaluuhana baachia eyiri banasaae baandi, haandi nibadahana neende ohuyiraanga ebiyaanwa byaabwe bya keeki ch'enduli nyomu eyiri ebiloongaloongwe.”

² Mani ndeecha ndatuunga ebituundu ehumi neende bitaanu eby'efeesa, haandi neende ekilograamu emia ndala neende amahumi kataanu (150) echa amabere masuungu ohumuhwa.

³ Ndaboolera omuhasi oyo endi, hulw'esiha sileeyi muno ahoyeere ohunyala ohuniinda n'atahola obudaamba oba naatayiranaangaho; endi haandi nae esiha sino syoosi syeesi mba njia ohuba niimuliindiriire sa.

⁴ Mani ni mu ngira yino yoong'ene, nimwo mu baandu ba Yisiraeli bahoyere ohumenyeramo, ohumala esiha sireeyi nibataali neende omutuki yeesi oba omwiimirisi yeesi, ataali ohuyanaangayo ebiyaanwa byoosi, oba nibataali neende amakutu k'amakina moolerefu, ataali ebiloongaloongwe oba ataali ebiloongaloongwe byoosi eby'ohwehoonyerwaanga mu bulakusi.

⁵ Nae kata katyo, esiha sichia ohwiicha, abaandu ba Yisiraeli nibachia haandi ehabi liindi ohukaluuhana eyiri Omwaami Nasaae waabwe, haandi neende eyiri omwiichuhulu wa Daudi omutuki waabwe. Mani ao niwo yibahanyalire ohutya Omwaami oyo, mani banyale ohunyolaanga ebiyaanwa byae bilai ebyo.