Hosea 13 - EBBAIBBO EMBOOSI YA NASAAE

Ohuheengera Yisiraeli Omusaango Humaliiriha

¹ Hale-hale, enono ya Efuraimu nilwalomalomaanga, enjia chiindi cha Yisiraeli choosi chateengerehaanga sa n'obuti; olwohuba balingalaanga sa hu Efuraimu. Nae abaandu beecha bonoona neende ohwiinamiraanga Bbaali, mani hulwasino bachia ohufwa.

² Bachia ohwemedaanga sa nibonoona, mu hwitaanyaanga ebiloongaloongwe by'ebichuma ohwiinamiraanga ebiloongaloongwe eby'efeesa, ebibaaswa sa neende ebibaaso by'abaandu, haandi ebiholwa sa neende amahono k'abaandu. Mani beecha babolaanga mbwe bati, “Yaneenge ebiyaanwa eyiri ebyeene ebyo!” Omuundu anyala atye ohukwa mu sirifu sy'ebiloongaloongwe ebyo ebifwaanana neende esurusi!

³ Mani abaandu bano, bachia ohuhamyuuhao koti olume lw'echuli, haandi koti enang'oong'o likotaangao hale-hale mu ludaalo. Bachia ohuba koti omuhuuchi ku muyaka kuwuucha nikutusa hu luderu, haandi koti omwoosi kutulira mundekeyi.

⁴ Omwaami aboola ati, “Ese niise Omwaami Nasaae weeng'we, owabeemirira ndaabatusa mu Misiri. Mubulaho Nasaae yeesi ohutusaho ese syeeng'ene. Ese syeeng'ene niise omuwonia weeng'we.

⁵ Ese ndabalindaanga mu syaalo syoomu sy'esiparara.

⁶ Nae nimweecha mweengira mu syaalo silai, mweecha mweechula mani mweekuta, mweecha mweniinia esuunga mwaanjibirira.

⁷ Mani sakira ese njia ohubaseeta koti edalang'i. Haandi koti eengwe, ese njia ohubeebonderera hu ngira cheeng'we.

⁸ Ese njia ohubaseeta koti enani li beetere abaana balyo, mani mbataandulemo mbalehe nimwaasamiriire. Haandi koti edalang'i, ese njia ohubanyaanya-nyaanyirao abweene ao, haandi njia ohubadonya-donyamo ebituundu koti esisolo syomu siino.

⁹ “Ese njia ohubasihirisa, baandu ba Yisiraeli eng'we! Ni naanu mweene oba ananyala ohubahoonyaho?

¹⁰ Eng'we abeene mwesabira omutuki neende abeemirisi, nae abeene abo nga batanyalaho ohuwonia esyaalo?

¹¹ Mu tima lyaange, ese ndali ndamala ohubaberesa abatuki, mani mu bwaalaba bwaange haandi ndeecha ndaabamalao.

¹² “Esibi sya Yisiraeli neende esoni ch'ohuhirwa omusaango, byoombi biri mu byaandiikwa hale, mani haandi ebitabo ebyo byakiswa eyale bulai bweene.

¹³ Yisiraeli yiri neende ehabi y'ohubaao, nae yasiruwala muno byaihaya ohuyibukula koti sa omwaana oli aambi ohwiibulwa, mani haandi yaahaya ohutula mu nda.

¹⁴ Mani ese haba siinjia ohuwonia abaandu bano ohubatusa eyiri emakoombe oba ohubawonia ohutula hu maani k'ohufwa daawe. Leete ebinyaaso byeeng'we ebyo, kata neende ohufwa hweene! Leete ohusihirira hweeng'we ohwo, kata neende esyaalo sy'abafwa syeene esyo! Ese haba haandi siinjia ohukwiraanga esisa abaandu bano daawe.

¹⁵ Kata neende Yisiraeli niyikinaakina koti omuboka, ese njia ohuleeta omuyaaka kw'ebukwe omubafu muno ohutulira mu siparara, mani kuchia ohwoomeresa amadiba keeng'we koosi, neende esulo cheeng'we choosi. Kuchia ohunyala ohumalao buli siindu syoosi esy'ebbei.

¹⁶ Samaria yihoyeere ohubonereswa olw'ohuunjeemera. Abaandu bae bachia ohufwiira mu biita; abaana badoto bachia ohuubbwa aasi eminyiha hu buloba, haandi abahasi bali asito bachia ohwaatwa bahaahe.”