Hosea 10 - EBBAIBBO EMBOOSI YA NASAAE

¹ Abaandu ba Yisiraeli hale bali koti omusaala musabbiibbu okwali nikweechulaho emisabbiibbu. Lu bemeedaanga ohuba abayiinda, nilwo lu bemeedaanga ohwoombahaanga alutaari. Koti lu bukinu bw'eloba lyaabwe lyalichiingi, nilwo lu bunyirifu bw'amakutu k'amakina moolerefu kabeenamiraanga bwosi bwemeeda.

² Abaandu ba myooyo kyaabwe ky'obubacha, bulaanu bahoola ohubonereswa hulw'ebyonoono byaabwe. Nasaae achia ohukwiisa alutaari chaabwe echio haandi anyaase amakutu moolerefu kaabwe.

³ Abaandu bano mu siha esidiidi bachia ohuba nibaboola bati, “Efwe hubula omutuki olwohuba sihwesaanga oluyaali mu Omwaami. Nae siina syeene mani, si mutuki oyo yahatuholeere?”

⁴ Batuumbula sa emboosi chibulamo amahuluundu koosi, haandi beechuba ebisuubise by'obubacha, neende Endagaano chibulamo obuhoonyi bwoosi. Obwadyeeri bwamala ohweehola obubacha, obuhula koti ebimera by'obutwa mu mukuunda kulimirwe.

⁵ Abaandu bamenya mu siko sya Samaria bachia ohutichaanga haandi bachia ohuliraanga ohufwiirwa hw'esurusi y'esaabbu eyali mu Bbetafeeni. Abaandu basyo bahasirire haandi abalaamisi abahalaabanira esifwaanani bahasirire, oluyaali lwasyo nilusimalirweho.

⁶ Esiloongaloongwe syeeng'we esyo sichia ohukiingibwa siyirwe Asiria koti omutuulu eyiri omuloobera mutuki muhunuufu. Abaandu ba Yisiraeli bachia ohuchalaaswa mani bamale badiirwe esoni, hulw'omunyira kubaloondakana nakwo.

⁷ Omutuki waabwe achia ohukiingwa amalweo, koti ahawaawa h'olubbaao hu maachi.

⁸ Esiyeembeho siri aakulu hu sigulu sy'Afeeni, yi baandu ba Yisiraeli beenamiraangayo ebiloongaloongwe, yichia ohunyaaswa. Amawa neende ebimera biindi bichia ohuhulira hu alutaari chaabwe echio. Abaandu bachia ohulangaanga engulu bati, “Eng'we mwiiche mutukise!” haandi neende ebigulu bati, “Eng'we mwiiche mutufuuniheho!”

Omwaami aheengera Yisiraeli omusaango

⁹ Omwaami aboola ati, “Abaandu ba Yisiraeli haba sibaakama ohwononaanga mu moni waange daawe ohutulira elalira hu biha by'esyonoono syaabwe esyali mu Gibbeya sira.

¹⁰ Ese mweene njia ochia ohuseeta abaandu bonooni bano, mani male mbasaandie. Ebyaalo bichia ohubeehuung'aanira alala, mani bachia ohusaandisibwa hulw'ebibi byaabwe biingi ebyo.

¹¹ “Yisiraeli hale yaliho koti esurusi njere eyeekeswa bulai muno, eyeetekeha haandi eyali niyekoombaanga ohuhubbakaanga emere. Nae ese ndeecha ndaheengao ohuta ekoombo hu kosi lyayo lyeetiha elyo, neende ohumuliicha aholeenge emirimo misito. Ese ndahola Yuda yahwehwesaanga embako yitemaka, nae Yisiraeli yahwehwesaanga embako yaatula emihoosi.

¹² Mani ndeecha ndaboola endi, ‘Eng'we mwelimiire abeene obulime bukonera obwo, mani mumale mutaakemo obuluungifu, mani munyale ohukesa ehabi chi ohweyaanayo hweeng'we yiindi, huchia ohubaleetera. Esiha sino nisyo esyeeng'we ohukaluuhana yi ndi, ese Omwaami weeng'we, mani hu syeesi nyemeo nyale ohwiicha yi muli mani male mbwomoole ehabi hu eng'we.’

¹³ Nae mu bweyaango obwo, eng'we naang'we mwataaka ebyonoono, mani mwaanyala ohukesaanga ebyaamo byabwo. Eng'we mwamala ohulya ebyaamo bitula mu bubacha bweeng'we. “Olwohuba eng'we mweesikaanga ebigaari by'efaraasi byeeng'we, haandi mu naamba hoongo muno ey'abalwaani beeng'we,

¹⁴ ebiita bichia ohwiicha sa byoole hu baandu beeng'we beene, mani engoba cheeng'we choosi choole ohunyaaswa. Bichia ohuba koti ebyaliwo hu ludaalo lu Mutuki Salimani yanyaasiraho esiko sya Bbetabbeeli mu hulwaana ebiita, mani abahasi beebusi, alala neende abaana baabwe, boola ohusaasakwa baafwa.

¹⁵ Esyo nisyo sa esiindu sichia ohuholehana hu eng'we, abaandu ba Bbeteli, ohweema hu bibi by'amatiichasi bi mwahola. Mani mu meengisania bweene, ebiita nibiba hu byahania, omutuki wa Yisiraeli niye ochia ohutaangira ohufwa.”