Esy'Abaleefi 8 - EBBAIBBO EMBOOSI YA NASAAE

Ohwaawulwa hw'Arooni neende ohw'abaana bae

¹ Omwaami yaboolera Musa ati,

² “Bukula Arooni alala neende abaana bae, obaire ena mulyaango w'Eyeema ly'Ohubaao hwaange, mani oleete ebyefwaalo by'obulaamisi, neende amafuta kaawulaanga, esurusi endoto ey'esiyaanwa sy'esyonoono, amakoondi amamiiku kabiri, haandi neende esimweero siichuule emigaati kitaabbaahirwe.

³ Noomala otyo, olaange oluyia lwoosi lwiiche lu hung'aane alala.”

⁴ Musa yesi yahola sa koti lu Omwaami yali n'amulagiire, mani oluyia olwo lwoosi nilwali nilwebuusire alala,

⁵ yaababoolera ati, “Esiindu siindi aambi ohuhola, Omwaami mweene niye osilagiire.”

⁶ Musa yabukula Arooni, alala neende abaana bae yabatusa mu baandu baandi mani n'abaleeta mu moni, yabalagira bahole omuduunga kw'ohweyoka.

⁷ Musa yaabukula Arooni, yaamufwaala esaati neende ekaanju, mani yaamuboya olusibiro lwebodoohania esibuno. Yabukula esipaande syohu sirifu yasiboyera ehoba chiahwo chali chialuhwa neende esiroonyo, yachibodoohania esibuno syae.

⁸ Yabukula esipaande syohu sirifu yaamufwaala, mani yaata Wurimu neende Tumimu mu sao chiahwo.

⁹ Yabukula enjuunga yaamufwaala hu mutwe, mani mu bweeni bwayo yataaho esitaadi sy'esaabbu, ahalolero halafu h'ohweyaanayo, koti sa lu Omwaami yali n'amulagiire.

¹⁰ Haandi Musa yabukula amafuta kaawulaanga yaakata hu Yeema ly'Ohubaao hw'Omwaami, alala neende ebiindu byoosi ebyali nibiri mu bweene omwo, mani mu ngeri yino yityo, Musa yaanyala ohuba naaliyaanireyo lyoosi eyiri Omwaami.

¹¹ Yeecha yaabukulaho hu mafuta ako, mani yaakanyulaanyusa hu alutaari amahabi kataanu-na-kabiri alala neende ebiindu byoosi ebyehoonyerwaangaho, haandi neende hu bbeseeni, alala neende hu bweemero bweene, hwaanyale ohuba naanyalire ohubiyaanayo byoosi eyiri Omwaami.

¹² Yeecha bulaanu yaawula Arooni naamuchuha hu mutwe amafuta kaandi ak'ohwaawula.

¹³ Ohuloondaho, Musa bulaanu yabukula abasyaani b'Arooni mani yaabaleeta mu moni, yabafwaala amasaati, haandi naababoya esibiro mu bibuno, haandi yababoyaho enjuunga hu mitwe kyaabwe, koti sa lu Omwaami yali n'alagiire.

¹⁴ Bulaanu Musa yabukula esurusi enjere, mani naayileeta koti esiyaanwa sy'esyonoono, mani Arooni alala neende abaana bae nibata amahono kaabwe hu mutwe kwayo.

¹⁵ Nibamala batyo, Musa yayiita, mani yaabukula hu mabaanga kayo ako, niyehoonyera olwaala lwae, naabahaanga hu bituundu byooki biri hu soonda ch'alutaari, hwaanyale ohuyiyaanayo eyiri Omwaami yosi. Yabukula amabaanga kali nikadoong'ereho koosi, mani yaakachuha hu bweemero bw'alutaari. Mu ngeri yino yiti, nilwo lu yanyala ohuba naayiyaanireyo, haandi naanyalire ohuyilabya.

¹⁶ Musa yaabukula amasinya koosi akali hu bituundu biri mukati, alala neende ebituundu bihiramo obulai eby'esini, haandi neende efuko choombi neende amasinya kachibaaho koosi mani naabisaambira hu alutaari nibiwa byoosi.

¹⁷ Yabukula ebituundu bidoong'ereo byoosi eby'esurusi eyo, n'oteereho neende eseero lyeene, enyama yoosi, haandi neende amala koosi, mani naabisaambira erwaanyi w'ekaambi, koti lu Omwaami yali n'alagiire.

¹⁸ Ohuloondaho, haandi Musa yaleeta ekoondi emiiku libe esiyaanwa esisaambwa syaawa, mani Arooni alala neende abaana bae abo haandi baata amahono kaabwe hu mutwe kwalyo.

¹⁹ Lyosi Musa yaliita, mani yaanyulaanyusa amabaanga kalyo hu nyaande chine choosi ech'alutaari.

²⁰ Mani ekoondi miiku elyo nilyali nilimalire ohubaakwa lyaadonywadonywa Musa yabukula omutwe kwalyo, alala neende ebituundu bidoong'ereo byoosi, neende amasinya keene, mani yaabisaamba byaawa.

²¹ Nae eby'enda byoosi alala neende ebireenge byeene nibyamala ohwooswa bulai bweene neende amaachi, Musa yabibukula byoosi mani n'abiyira n'asaambira ekoondi miiku elyo lyoosi hu alutaari, koti esiyaanwa esisaambwa syaawa, esiri neende esaami yisangaasa, haandi esiyaanwa syehoonyera omuliro ohwoola eyiri Omwaami, koti sa lu Omwaami yali niyalagira Musa.

²² Musa haandi yabukula emiiku lyohubiri lira, elyali elyohuba ely'ohwaawula abalaamisi, mani yaboolera Arooni alala neende abaana bae ohubukula amahono kaabwe mani baakageeng'a hu mutwe kwalyo.

²³ Nibamala batyo, Musa yalibukula mani yaachia yaliita, yaabukulaho hu mabaanga kalyo, yaachia yaakabaha hu mbuliiriro y'ohutwi hw'omuhono muluungi hw'Arooni, haandi neende hu lwaala lusaacha lw'omuhono kwae muluungi, haandi hu lwaala lusaacha olw'ohukulu ohw'olwaande lw'omuhono omuluungi.

²⁴ Musa haandi yabukula abasyaani b'Arooni, yaabatusa mu baandu baandi, yaabaleeta mu moni, yaababaha hu mbuliiriro ch'amatwi kaabwe k'enyaande ch'ohumihono miluungi, kyaabwe, haandi neende hu njala saacha ch'ohumihono miluungi kyaabwe, haandi neende hu njala saacha ch'ohumakulu k'enyaande ch'ohumihono miluungi kyaabwe. Haandi Musa yabukula amabaanga kadoong'ereho koosi, yaakanyulaanyusa koosi hu nyaande chine choosi ech'Alutaari.

²⁵ Haandi yaabukula amasinya koosi, alala neende eseembe enulu eyo, haandi neende amasinya koosi akabwiiha hu bituundu byomuukati byoosi, haandi neende ebituundu bihiramo obulai by'esini, neende efuko choombi alala neende amasinya kahwo koosi, haandi neende esinama sy'adaho sy'olwaande lw'omuhono muluungi.

²⁶ Musa haandi yaabukula omugaati mulala mani yaakutusa mu simweero sy'emigaati kitabbaahirwe ekyayaanwa eyiri Omwaami, omugaati mulala okwali nikukandiirwe amafuta, haandi neende bbisikuuti silala, mani naabita humukulu w'amasinya ako, alala neende esinama sy'adaho sy'olwaande lw'omuhono muluungi esyo.

²⁷ Haandi yabukula ebyohulya bino byoosi mani yabigeeng'a mu mahono k'Arooni neende abaana bae, mani nibamala nibabiyaanayo koti esiyaanwa sikabuhaaneho eyiri Omwaami.

²⁸ Haandi Musa yabukula ebyohulya ebyo mani yaabatusaho, yaabisaambira hu alutaari, nibyeekereehe hu siyaanwa sisaambwa syaawa, byoosi byeemao byeehola ohuba esiyaanwa silala esy'ohwaawula. Sino haandi syali nisiri esiyaanwa sy'ebyohulya, mani esaami yasyo yaaba eyisangaasa muno eyiri Omwaami.

²⁹ Haandi Musa yaabukula esigwoogwo, naasiyaanayo koti esiyaanwa sikabuhaaneho eyiri Omwaami. Sino bulaanu syali syosi syeholere esiyaanwa sy'ekoondi miiku sy'ohwaawula sya Musa. Musa yahola sa buli siindu koti lu Omwaami yali n'alagiire.

³⁰ Haandi Musa yabukulaho hu mafuta akaawulaanga, haandi neende hu mabaanga kaandi akali nikali hu alutaari, mani naakanyulaanyusa hu Arooni alala neende abaana bae boosi, neende hu ngubo chaabwe choosi. Mani mu ngeri yino yiti, nimwo mu Musa yanyalira ohubayaanayo alala neende engubo chaabwe choosi, eyiri Omwaami.

³¹ Musa yaboolera Arooni alala neende abaana bae ati, “Bukule enyama eyo yoosi muyiyire ena mulyaango kw'Eyeema ly'Ohubaao hw'Omwaami, mani mumale mu yideehe, mani mu yiriire ebweene eyo neende emigaati kiri mu simweero sy'ebiyaanwa by'ohwaawula, koti sa lu Omwaami yali n'alagiire.

³² Muchie musaambe enyama yoosi, kata neende emigaati kyoosi ebinyala ohuba nibibahaire ohulya byadoong'aho, biwe.

³³ Haba simuchia ohufukiirirwa ohutula mu mulyaango kw'Eyeema elyo ohumala embaka y'endaalo chitaanu-na-chibiri enaamba, ohwoola lu miduunga ky'ohwaawulwa kyeeng'we kichia ohumaliiriswa.

³⁴ Omwaami niye owatulagira ohuhola ebiindu bino bi huholere oludaalo nyaanga yino, hu binyale ohumalao ebyonoono byeeng'we.

³⁵ Mani muhoyere ohudoong'a sa mu mulyaango kw'Eyeema elyo esiro neende esideete, hulw'embaka y'endaalo chitaanu-na-chibiri enaamba, nimuhola ebiindu bi Omwaami yalagira. Nimutahola mutyo, muba muchia ohufwa-bufwa. Sino nisyo esiindu si Omwaami yaandagiire.”

³⁶ Mani Arooni alala neende abaana bae boosi, nibahola buli siindu si Omwaami yali n'alagiire ohubitira mu Musa.