Esy'Abaleefi 5 - EBBAIBBO EMBOOSI YA NASAAE

Emisaango kidahisa ebiyaanwa bimalao esyonoono

¹ Ebiyaanwa ebimalao esyonoono bidahibwa mu misaango kino kiti. Omuundu yeesi n'alaangwa mu siina ohubuula esifune, nae naahaya ohuboola emboosi yoosi yidiira hu siindu si yabona, oba siyaulira, ahoyere ohusaandisibwaanga koti lu siba nisihoyeere.

² Omuundu yeesi niyechuhana yeyakaana n'adiirire esiindu syoosi esy'omusiro kw'ohusidiiraho, koti esisolo sifwiire esyeene, aba yesi yeholere ow'omusiro, haandi embaanga yiba yichia ohumuloba, esiha syeene si amanyiramo naaba naaholere esyonoono esyo.

³ Omuundu yeesi niyechuhana yoola ohudiira hu siindu syoosi esitula mu muundu yeesi esy'omusiro, kata neende sibe esy'emera yiri yitye esy'omusiro, embaanga yiba yimalire ohumuloba, esiha syeene esyo si amanyiramo naaba naaholere esyonoono esyo.

⁴ Omuundu yeesi n'adoondobana sa mani yaahola esyeyamo, kata neende asyahaba nisidiira hu siindu siina syeene, embaanga yimuhaya sa esiha syeene syaaba niyechulisiramo ati hane s'abeere n'amaliriire ohuhola atyo.

⁵ Omuundu yeesi n'ahirwa omusaango, ahoyera ohweyolobya esyonoono esyo,

⁶ mani n'atuunga omutuungo okuchiana neende esyonoono syaaba naaholere, ahoyere ohuleeta eyiri Omwaami ekoondi edwaasi, oba embusi edwaasi koti esiyaanwa. Omulaamisi aba achia ohuba n'ayaanira esiyaanwa sy'esyonoono sy'omusaacha oyo.

⁷ Nae omuundu oyo naaba n'atanyala ohuyaana ebyo byoosi, aba anahoyera ohuleeta eyiri Omwaami amaguugu kabiri oba amabburuuku kabiri akafwa omutuungo okwo, buli lala nga lifwa esiyaanwa sy'esyonoono, nae eliindi lifwa esiyaanwa sy'ohusaambwa syaawa.

⁸ Ahoyere ohukaleeta eyiri omulaamisi, oba achia ohutaangira ohuyaanayo eyoni ly'esiyaanwa sy'esyonoono. Aba achia ohulihalaka sa eekosi, ataali ohulichomolamo omutwe

⁹ mani amale anyulaanyuse amabaanga kaandi kalyo hu lwaande lulala olw'alutaari. Amabaanga kadoong'aho kaba kachia ohudaasirwa mu bweemero bw'alutaari eyo kaweemo koosi. Esiyaanwa sino siba siri esiyaanwa sy'ohumalao esyonoono esyo.

¹⁰ Bulaanu aba achia ohuloondiaho ohuyaana eyoni lyoohubiri koti esiyaanwa sy'ohusaambwa syaawa, ohuloondakana neende amalako kachiiraho. Mani mu ngira yino, nimwo mu mulaamisi aba achia ohuyaaniramo esiyaanwa sy'esyonoono sy'omusaacha oyo, mani anyale ohuleherwamo.

¹¹ Nae omusaacha yeesi naahaywa ohunyoola amaguugu kabiri oba amabburuuku kabiri ako, aba achia ohuhoyera ohuleeta ekiloguraamu ndala ey'obusye, ohuba koti esiyaanwa sy'esyonoono esyo. Bulaanu haba saaba naachia ohudahibwa ohumeedaho kata amafuta k'emiseituuni, oba kata sa obubbaani, olwohuba sino siba esiyaanwa sy'esyonoono esyo, esitaali esiyaanwa sy'emere.

¹² Ahoyere ohubuleeta eyiri omulaamisi, ochia ohububukulaho oluyu lulala, lube koti esilolero syeekesa mbwe bwoosi bu bereeswe Omwaami, hu bulaanu yeemeo anyale ohusaambira hu alutaari koti esiyaanwa sy'esyohulya. Sino siyaanwa sy'ohumalao esyonoono esyo.

¹³ Mani mu ngira yino nimwo mu mulaamisi aba achia ohuyaaniramo esiyaanwa sy'esyonoono sy'omuundu oyo, mani anyale ohuleherwamo esyonoono esyo. Nae ebidoong'ere byoosi biba eby'omulaamisi, koti ebiyaanwa by'emere.

Ebiyaanwa by'ohutuunga ekobi

¹⁴ Haandi Omwaami yeemao yaaberesa Musa amalako kano.

¹⁵ Omuundu yeesi naahola esyonoono meechuhana, mu ngeri y'ohuhaywa ohutuunga emituungo milafu ky'Omwaami, aba bulaanu ahoyere ohuleeta esiyaanwa siba koti esy'ohutuunga ekobi eyiri Omwaami, ekoondi emiiku, oba embusi ehole, buli situla siba nisitaaliho obufwoolwa bwoosi daawe.

¹⁶ Ahoyere ohutuunga omutuungo kwaaba niyahaywa ohutuunga, haandi ahoyere ohumeedaho omutuungo kuundi okwa amahumi kabiri hu buli emia (100) ndala. Ahoyere ohubukula emituungo kino kyoombi mani yaachia yaakidiisa omulaamisi, mani omulaamisi oyo yayaanayo esisolo koti esiyaanwa sy'esyonoono sy'omuundu oyo, mani aleherwemo esyonoono esyo.

¹⁷ Nae omuundu yeesi naahola esyonoono meechuhana n'ahalaka elako lyoosi hu hulagira hw'Omwaami, embaanga yimuloba mani yaaba n'ahoyere ohutuunga esibonereso.

¹⁸ Ahoyere ohuleeta eyiri omulaamisi, esiyaanwa sy'ohutuunga ekobi, esiyaanwa sy'ekoondi emiiku, oba embusi ehole, buli situla nga haba sisiriho obufwoolwa bwoosi. Bulaanu ebbeyi y'esisolo esyo yihoyere ohuheengwao ohweema hu bbei yiba niyafukiirirwa ohukulirwaho. Omulaamisi bulaanu aba achia ohuyaana esiyaanwa sy'esyonoono si muundu oyo aba naaholere meechuhana, mani aleherwemo.

¹⁹ Sino siba esiyaanwa sy'ohutuunga ekobi, esy'esyonoono esyo syaaba naaholere eyiri Omwaami.