Esy'Abaleefi 16 - EBBAIBBO EMBOOSI YA NASAAE

Oludaalo lw'ohusaasania

¹ Omwaami haandi yalomaloma neende Musa luunyuma lw'ohufwa hw'abaana babiri b'Arooni abeetwa olwohuba bali nibabwaanire omuliro kutaali omwoolerefu eyiri Omwaami.

² Omwaami yalomaloma n'aboola ati, “Ewe, chia oboolere Arooni mwaanamaao oti, nisinabechaanga esiha syeene sihoyere, nisyo syanabodoohaniraangamo emukoongo w'epasya niyeengira Abuundu Ahiramo Obwoolerefu, olwohuba ao niwo yi ese mboneheraangamo ni ndi mu sireesi esiba humukulu w'esifuuniho esiri aakulu w'Esanduuku ly'Endagaano. Nae naatawulira, mani yesi aba achia ohwiitwa-bwiitwa.”

³ Haandi kata katyo ahoyere ohuchia yeengira Abuundu Ahiramo Obwoolerefu naaba naanyalire ohuleeta esurusi koti esiyaanwa sy'esyonoono, haandi neende ekoondi emiiku, koti esiyaanwa sy'ohusaambwa syaawa.

⁴ Niyamala ohuboola atyo, Omwaami yatusa ebilagiro biloondaho bino: Arooni n'asisiiri ohwiingira Abuundu Ahiramo Obwoolerefu, ahoyere mberi ohweyokaanga bulai, mani yefwaala ebyefwaalo by'obulaamisi biloondaho bino: Ekaanju ly'elaasi, neende esinyaasa sy'elaasi, olusibiro alala neende enjuunga.

⁵ Oluyia lwa Yisiraeli lwoosi luhoyeere ohuberesaanga Arooni embusi chibiri ehole, hulw'esiyaanwa sy'esyonoono, haandi neende ekoondi emiiku ely'esiyaanwa sisaambwa syaawa.

⁶ Omweene mani ahoyere ohuyaanaanga eng'oombe esurusi, koti esiyaanwa sy'ohumalao esyonoono syae omweene, haandi neende ebyonoono by'edaala lyae.

⁷ Mani bulaanu achia yaabukulaanga embusi chino chibiri, mani achiyireenge hu mulyaango kw'Eyeema ly'Ohubaao hw'Omwaami.

⁸ Mani niyoola eyo, niyo bulaanu yaaba naachia ohuubbiraanga eha, niyehoonyera amakina kabiri, lala nga lisaatirweho mbwe, “ey'Omwaami” nae eliindi nga lisaatirweho mbwe, “ey'Asaseeli”.

⁹ Mani bulaanu Arooni ao niwo yaaba achia ohuyaaniraanga embusi yiba niyidoolerwe neende eha, yiti ey'Omwaami, mani amala ayiyaana koti esiyaanwa sy'esyonoono.

¹⁰ Nae embusi yiba niyidoleebwe neende eha ohuba ey'Asaseeli, yiba yichia ohuyaanwaanga niyiri enamu eyiri Omwaami, nibamala bayiirusa yichia yikotera mu siparara eyiri omusaambwa kw'Asaseeli, hu yinyaleenge ohumalaangao ebyonoono by'abaandu abo.

¹¹ Mani Arooni naaba niyoolere ohuyaana eng'oombe esurusi yae ohuba esiyaanwa sy'esyonoono syae neende esy'edaala lyae,

¹² aba ahoyere ohuchia mani yaabukulaanga esifulya sy'omuliro, esiichuule amaanda kali ohwaaduha, kaaba naatusire hu alutaari, haandi neende ebyaaba bibiri ebichuule obubbaani bunyuhe, mani abileeteenge byoosi, abiingise Abuundu Ahiramo Obwoolerefu.

¹³ Mani ebweene eyo mu moni w'ohubaao hw'Omwaami, niwo yaaba achia ohuteera obubbaani obwohu muliro, mani omwoosi kw'obubbaani okwo nikwo okuba kunyale ohukisa esifuuniho sy'Esanduuku ly'Endagaano, hwaanyale ohuhaya ohulibonaho, ahaye ohufwiirao.

¹⁴ Mani aba achia ohubukulaangaho amabaanga kaandi, ak'eng'oombe esurusi, mani niyehoonyera olwaala lulala, anyale ohukanyulaanyusaanga mu moni w'esifuuniho esyo, mani haandi amale atyo, achie anyulaanyuse akaandi amahabi kataanu-na-kabiri, mu moni w'Esanduuku ly'Endagaano.

¹⁵ Mani naamala atyo, hw'amale yeecheenge yeeta embusi y'esiyaanwa sy'esyonoono sy'abaandu, haandi abukuleengeho amabaanga kaandi hu kayo ako, mani akaleeta akeengisanga Abuundu Ahiramo Obwoolerefu, haandi akaanyulanyuseenge hu sifuuniho esyo, haandi hwaamale achie mu moni w'Esanduuku ly'Endagaano, koti lwaaba naaholere hu mabaanga k'eng'oombe esurusi yira.

¹⁶ Mani mu ngeri yino nimwo mu mulaamisi aba achia ohuba naali ohuholaanga omuduunga kw'ohulabyaanga Abuundu Ahiramo Obwoolerefu, ohumalaangao omusiro kw'abaandu ba Yisiraeli, haandi alala neende ebyonoono byaabwe byoosi. Ahoyere ohuholeraanga Eyeema elyo ati olwohuba lyeteengeha sa akatikaati w'ekaambi eyo, eyali niyiri yoosi ey'omusiro, ohweema hu miduunga koti lu kiri.

¹⁷ Mani ohutula esiha si Arooni yeengiriramo Abuundu Ahiramo Obwoolerefu, ohuhola omuduunga kw'ohulabiswa kuno, ohwoolera elalira hu siha syatuliramo, abulao omuundu yeesi oba n'ahoyeera ohubechaanga naali mu Yeema elyo. Mani bulaanu naaba n'amalire ohweholeraanga omweene omuduunga okwo, haandi n'amalire ohuholeraanga edaala lyae, haandi naaba n'amalire ohuholeraanga oluyia olwo lwoosi,

¹⁸ hu bulaanu aba ahoyera ohutulaanga erwaanyi mani achichaanga eyiri alutaari ohuyaana ebiyaanwa bisaambwa byaawa, hu yaaba naanyalire ohulilabya bulai koti emiduunga lu kiba nikiri. Ahoyere ohubukulaangaho hu mabaanga k'eng'oombe esurusi, haandi neende hu ak'embusi, mani akabaheenge koosi hu buli abuundu wookiya ali hu buli soonda chine ech'alutaari.

¹⁹ Mani naali ohwehoonyera olwaala lulala, ahoyere ohunyulaanyusaangaho amabaanga kaandi hu alutaari amahabi kataanu-na-kabiri. Mani mu ngeri yino nimwo mu omulaamisi wuno aba ananyalaanga ohuyoosa ohuyitusaho ebyonoono by'abaandu ba Yisiraeli, mani n'ayiholere yaaba enjoolerefu.

Embusi yohumaliraho omusaango

²⁰ Arooni naaba n'amalire ohuhola omuduunga kw'ohulabya Abuundu Ahiramo Obwoolerefu, abuundu w'Eyeema ly'Ohubaao hw'Omwaami, alala neende alutaari, bulaanu aba achia ohuyiriraanga Omwaami embusi enamu eyiba niyidoleebwe ohubechaanga ey'Asaseeli.

²¹ Bulaanu aba achia ohutechaanga amahono kae koombi hu mutwe kw'embusi eyo, mani ayebwaabireengeho ebyonoono byoosi, haandi neende obujeemu bw'abaandu ba Yisiraeli bwoosi, mani hu anyaleenge ohubidwiihaanga hu mutwe kw'embusi eyo. Naamala atyo, embusi eyo bulaanu yiba yichia ohuteebwaangaho omuundu oba naaloboolwe ohuchia ohuyiirusa yichia yikotera mu esiparara.

²² Mani embusi eyo yiba niyichia ohunyala ohukiingaanga ebyonoono by'abaandu bano byoosi, mani yinyala ohubiyiriraanga alala neende omuundu wuno, mu syaalo sitamenywa hoomo omuundu yeesi.

²³ Bulaanu Arooni aba achia ohumalaanga atyo, mani yeemeo atulaanga ao, mani achia yeengiraanga mu Yeema elyo, yefwaalule ebyefwaalo by'obulaamisi byaaba nabeere niyefwaalire nateengira Abuundu Ahiramo Obwoolerefu, mani achireheenge chiba mu bweene omwo.

²⁴ Bulaanu aba ahoyere ohuchichaanga mani yeeyokera Abuundu Woolerefu ao, mani amale yefwaale engubo chae cha buli buhya. Mani naaba n'amalire ohuholaanga atyo, aba achia ohutulaanga erwaanyi achia ayaana esiyaanwa sisaambwa syaawa, ohumalao ebyonoono byae omweene mberi, haandi neende ebyonoono by'abaandu baandi abo.

²⁵ Ahoyere ohuchia yasaambiraanga amasinya k'esisolo sy'esiyaanwa sy'esyonoono hu alutaari.

²⁶ Nae omuundu wula oba niyali niye owagooba embusi yira yaachia yaakotera mu siparara eyiri Asaseeli, ahoyere ohuba n'amalire ohuchia yoosa engubo chae choosi chi yali nachio niyeeyokere bulai omubiri kwoosi, hwaanyale ohwiicha yeengira mu kaambi eyo.

²⁷ Esurusi yira alala neende embusi yira echiba nichehoonyerwa ohuba esiyaanwa sy'esyonoono, bi mabaanga kabyo kaba niko akaleetwa Abuundu Ahiramo Obwoolerefu, ohumalao esyonoono, biba bichia ohukiingwaanga mani bituswe erwaanyi w'ekaambi mani bisaambweenge biwa. Amaseero, enyama choosi, alala neende amala koosi, bihoyere ohusaambwaanga biwa.

²⁸ Mani omuundu oba niye obisaambire ahoyere ohuchichaanga mani yoosa engubo chae choosi chaaba naalimo, mani yeeyokaanga bulai omubiri kwoosi, hwaanyale ohukobolaanga ohwiingira mu kaambi eyo haandi.

Ohuhusa oludaalo lw'ohusaasania

²⁹ Amalako kaloondaho kano, kahoyeere ohuloondwaanga endaalo choosi echiicha. Mani hu ludaalo lw'ehumi, lw'omwoosi kwa hataanu-na-habiri, Abaisiraeli, alala neende abateende ababamenyamo bahoyere boosi ohusiibaanga haandi nibataholaangaho omulimo kwoosi.

³⁰ Hu ludaalo olwo, omuduunga kuno kuhoyere ohuholwaanga ohubalabyaanga nikubatusaho ebyonoono byaabwe byoosi, hu banyale ohuba abalafu ohweema hu miduunga kino lu kiri.

³¹ Oludaalo olwo luhoyeere lube olwoolerefu muno, koti oludaalo lu baandu boosi basiiba mani baahaya ohuholaho omulimo kwoosi daawe. Amalako kano kahoyeere ohuloondwaanga, endaalo choosi echiicha.

³² Omulaamisi Muhuluundu, owaawulwa bulai koti lu bihoyere, haandi owayaanwa ohusihira laatang'ene, niye ohoyere ohuholaanga omuduunga kw'ohulabiswa kuno. Mani ahoyere ohubechaanga niyefwaalire ebyefwaalo by'obulaamisi byoosi koti lu bidahibwa

³³ mani yeemeo achie aholeenge omuduunga kuno ohulabya Abuundu Ahiramo Obwoolerefu, kata neende abuundu waandi woosi adoong'ereyo koti aw'Eyeema ly'Ohubaao hw'Omwaami, neende alutaari yeene, neende abalaamisi boosi, haandi neende abaandu baandi boosi ab'oluyia olwo.

³⁴ Amalako kano kahoyeerwe ohuloondwaanga endaalo choosi echiicha. Omuduunga kuno kuhoyere ohuholwaanga ehabi lala buli mwaaka, ohunyala ohulabyaanga abaandu ba Yisiraeli, nibamalwaho ebyonoono byaabwe byoosi. Musa yesi yaahola sa koti lu Omwaami yali n'alagiire.