Esita 8 - EBBAIBBO EMBOOSI YA NASAAE

Abayudaaya baboolerwa ohwelwaanaho

¹ Hu ludaalo lweene olwo, Omutuki Ahasuera yaberesa omuhasi wae Esita ebiindu byoosi ebyali ebya Hamani, owali musuku ow'Abayudaaya. Esita mani n'aboolera omutuki koti lu Modekai yali omunaluyia wae, haandi ohutula olwo, Modekai n'afukiirirwa ohwiingiraanga achia mu moni w'omutuki.

² Omutuki mani niyefwaalulaho engila yae eyiriho omuhuuri (yi yali n'anyuulire Hamani) mani n'ayidiisa Modekai. Esita n'adiisa Modekai obunyala bw'ohuliindaanga emyaandu kyali ekya Hamani.

³ Esita haandi n'alomaloma neende omutuki oyo ehabi liindi, n'akwa aasi mu makulu w'omutuki oyo n'alira amasika. Yamwekweeda ohwaakamya endekeha mbi neende oluhobo, lu Hamani, omwiichuhulu wa Agagi, lu yali n'aholeere Abayudaaya.

⁴ Omutuki oyo mani n'asiingisira Esita endabuhi yae y'esaabbu. Esita yasiingira yeema mani n'aboola ati,

⁵ “Nikali mbwe sihusangaasa, ewe ow'Oluyaali, haandi nikali mbwe wunjuunirwa, haandi n'obona oti esiindu esyo sihuhoyera, n'ofukiirira, esilagiro syandiikwe esyaakamya ebbarwa cha Hamani omwaana wa Hamedaata haandi omwiichuhulu wa Agagi chi yandiika ohusihirisira elalira Abayudaaya boosi abali mu bwaami buno.

⁶ Olwohuba ese nyala endye ohwesimiirisa ohubona amasira kano kaakwa sa hu baandu baange, haandi abeeho baange beene nibeetwa?”

⁷ Omutuki Ahasuera mani n'aboolera omuhasi wae Esita neende Modekai Omuyudaaya ati: “Bone, malire ohwaniha Hamani hu simikiro ohweeme hu luhobo lwae hu Bayudaaya, haandi malire ohuberesa Esita omyaandu kyoosi ekyali ekya Hamani.

⁸ Nae esilagiro simalire ohutuswa mu liita ly'omutuki, haandi syahubbwaho omuhuuru kw'engila y'omutuki, haba si siinyala hutuswao sa sityo. Ohutusaho, munyala ohwandiikira Abayudaaya ebyo byoosi bi mudaha; mu byandiike mu liita lyaange, mani muteeho omuhuuri kw'obwaami.”

⁹ Sino syakwaao hu ludaalo lw'amahumi kabiri-na-chidatu ech'omwoosi kwohudatu, omwoosi kulaangwa kuti Sifaani. Modekai yalaanga abaandiiki b'omutuki, mani n'ababoolera eby'ohwandiika mu bbarwa chichiira Abayudaaya neende bagafana, abaami, alala neende abahoongo abali mu bituundu emia ndala neende amahumi kabiri neende bitaanu-na-bibiri (127) eby'esyaalo esyo, ohutulira Ebuyiindi, ohwoolera elalira Etiopia. Ebbarwa chino chandiikwa ohuchia mu buli situundu sy'esyaalo esyomu buli lulimi lw'esituundu esyo, neende enyandiika y'esituundu esyo, eyiri Abayudaaya mu lulimi lwaabwe neende enyandiika yaabwe.

¹⁰ Modekai niyaandiika ebbarwa chino mu liita ly'Omutuki Ahasuera, mani n'achihubbaho omuhuuri kw'obwaami.

¹¹ Mu bbarwa chino, omutuki yafukiriira Abayudaaya bali mu buli siko ohuhung'aana alala banyale ohwelwaanira. Haandi ebbarwa chino chafukiirira Abayudaaya ohwiita, ohusihiirisa, neende ohumalirao elalira amaye koosi aka buli syaalo oba esituundu, akaba kaseetere Abayudaaya, neende abahasi baabwe, neende abaana baabwe bayere. Abayudaaya banyala ohuyaaya emyaandu kibeere ekya basuku baabwe.

¹² Esilagiro sino syali esy'ohuwulirwa mu bituundu byoosi eby'obwaami bw'omutuki Ahasuera hu ludaalo lw'ehumi neende chidatu, olw'omwoosi kw'ehumi neende chibiri, nikwo omwoosi kulaangwa kuti Adaari.

¹³ Ebyali mu silagiro sino, byali obyolulaangirirwa koti elako mu buli situundu, neende ohumanyisa buli muundu, hu Abayudaaya banyale ohuba abeetekefu ohwetuunga hu basuku baabwe oludaalo olwo nilwoola.

¹⁴ Ohweema hu silagiro sy'omutuki esyo, abeerusi b'efaraasi baniina hu faraasi ch'obwaami echiiruha muno, mani nibachia. Elako elyo lyalaangirirwa neende mu siko sihoongo sya Susa.

¹⁵ Modekai mani n'atula mu dooho omwo, niyefwaalire ebyafwaalo by'obwaami ebifwaana bbulu neende rachaari, omusibiro okwa elaasi enyirifu eya papo, alala neende ekofia y'obwaami ey'esaabbu yihiramo obulai. Bulaanu abaandu abali hu ngira kyoosi echomu siko sya Susa koosi boobba engalaakasa neende ohwehuuma olw'esangaalo.

¹⁶ Ao mani Abayudaaya nabo nibaba bulai, nibasangaala, nibeehoya haandi nibaba neende oluyaali.

¹⁷ Mu buli siko, neende mu buli situundu sy'obwaami obwo, buli abuundu yi silagiro sy'omutuki syali nisisomerwaanga yoosi, Abayudaaya bahusa oludaalo lw'esangaalo neende alala neende ohweehoya. Mubwadyeeri bweene, abaandu baangi abomu byaalo biindi boola ohwelaanga Abayudaaya, olwohuba Abayudaaya bali beeholere abaandu batiisa.