Esita 7 - EBBAIBBO EMBOOSI YA NASAAE

¹ Ao, omutuki neende Hamani mani nibaachia ohulya esidyaalo neende Esita

² ehabi lyoohubiri. Nibaali nibang'wa efiini, omutuki yateeba Esita haandi ati: “Bulaanu, ewe omuhasi w'omutuki Esita, siina syeene syoosaba? Mboolere mani ochia ohusinyoola. Haandi siina syoodaha? Ochia ohuhubereswa, kata ayahaba esituundu sy'obwaami buno.”

³ Omuhasi w'omutuki Esita nae yakobolamo ati, “Nikali mbwe ongiira esisa, ewe ow'Oluyaali, haandi nooba n'osiimire, ewe ow'Oluyaali, ohuumberesa esyo syoosi si mba nindaha, husaba nihwekweeda, endi mbereswe obulamu bwaange, haandi hwekweeda abaandu baange bahaywe ohwiitwa.

⁴ Ese neende abaandu baange bano hukusirwe ohwiitwa, ohusihiriswa neende ohumalwao. Siba nisyakaame hu hukuswa hube abakulwa, abasaacha neende abahaana, ndahesimiriise ndahahaya ohuhunyaasa kata omusuku haba siyahanyalirwe ohuliibwa daawe, nae omutuki niye owahafwiirirwe. Nae efwe huli aambi ohusihiriswa humalirweo elalira!”

⁵ Omutuki Ahasuera yateeba omuhasi wae Esita ati, “Wiina mweene onyala ohweyaanayo ohuhola esiindu sifwaana koti esyo? Omuundu ofwaana atyo ali yeena bweene?”

⁶ Esita yakobolamo ati, “Omusuku weefwe, haandi oli ohutuheengeraango omusaango kuno niye omusaacha wuno Hamani omubi.” Hamani yahang'aasira emoni chae hu mutuki oyo neende omuhasi wae neende egiili n'atiire muno.

⁷ Omutuki yasiingira niyechuule obwaalaba, mani n'atula erwaanyi, n'achia mu ndalo chomu dooho. Hamani niyabona ati omutuki amaliriire ohumusaandya, yadoong'a ao ohwekweenda omuhasi w'omutuki Esita ohuwonia obulamu bwae.

⁸ Omutuki niyakobola n'atula mu ndalo chomu dooho, yeengira abuundu yi bali nibang'weera efiini, mani n'anyoola Hamani n'akwiire hu sitaanda si Esita yaliho. Omutuki mani n'aboola ati: “Mwaache, omusaacha wuno adaha ohukwa hu muhasi waange mu nyuumba yaange ese niimbona endi?” Omutuki niyali n'asiboolaanga atyo, abasaacha balade bomu dooho nibabwiiha Hamani mu moni.

⁹ Mani Haribbona, mulala hu balade bahalaabanira omutuki n'aboola ati: “Hamani abeere yoombahe esimikiro mu ngo wae esy'ohwaanihaho Modekai, owawonia obulamu bwao, ewe ow'Oluyaali. Esimikiro esyo syoola emiita amahumi kabiri neende chibiri obuleeyi ohuchia aakulu.” Omutuki yalagirira ati, “Mwaanihe Hamani hu simikiro esyo.”

¹⁰ Ao Hamani mani niyaanihwa hu simikiro, si yali n'aholeere Modekai. Mani etima ly'omutuki niliyenjeera.