Esita 1 - EBBAIBBO EMBOOSI YA NASAAE

Fasiti, omuhasi w'omutuki anyoolesa omutuki Ahasuera

¹ Mu ndaalo cha Ahasuera, obutuki bwa Ahasuera wuno bwali nibutulira elalira Ebuyiindi ohwoolera elalira Etiopia. Obutuki buno bwalimo aambi w'ebyaalo emia ndala neende amahumi kabiri neende bitaanu-na-bibiri (127).

² Mu ndaalo echio, esiko sihuluundu sy'obutuki obwo syalichiingi Susa esya Perisia.

³ Mu mwaaka kwohudatu okw'obutuki bwae, Ahasuera yahola esidyaalo ohulweeya abahalaabani bae bahoongo boosi alala neende abatuki bae baandi boosi. Abanamaye ka Perisia neende aka Media, alala neende bagafana neende abasaacha bahunuufu boosi abali mu bituundu by'esyaalo esyo.

⁴ Omutuki yeekesa emyaandu kyae neende oluyaali lwae ohumala embaka y'emyoosi kisaasaba emilaamba.

⁵ Ebyo byoosi nibyawa, omutuki oyo mani n'akabula abaandu bae boosi, abayiinda neende abamanani, abali nibamenya mu siko sihuluundu sya Susa, esidyaalo sihoongo muno. Esidyaalo esyo syamala embaka y'endaalo chitaanu-na-chibiri. Esidyaalo esyo syakabulirwa mu lwaanyi lw'edooho lyae.

⁶ Olwaanyi olwo lwoosi lwali nilwasaatwa neende epasya ch'engubo y'epaamba cha bbulu neende rachaari, nichoongaanisibwa neende eesya ch'elaasi ch'omudoba kwa papo, nichaboywaho engila ch'efeesa echeyaanja hu takoisi.

⁷ Ebyohung'wa byakabirwaanga mu bikoombe by'esaabbu, nga buli situla sisiriho neende esiindi esisifwaanana daawe. Omutuki yali neende omwooyo mukabi n'akabula efiini yomu dooho yeene.

⁸ Sibulao esikero syoosi esidiira hu bing'weebwa; omutuki yali n'amalire ohutusa omunwa eyiri abahalaabani bomu dooho ati buli muundu yehoonyere buli siindu koti lu omweene adaha.

⁹ Esiha syeene esyo, Fasiti omuhasi w'omutuki yesi yali n'akabuule abahasi boong'ene esidyaalo mukati w'edooho ly'obutuki.

¹⁰ Hu ludaalo lwa hataanu-na-habiri olw'esidyaalo esyo, omutuki niyali n'ang'wechaanga amalwa haandi n'asangaala muno, n'alaanga abalooye bae bataanu-na-babiri abamuhalaabaniraanga: Mehumaani, Bbisita, Haribbona, Bbigita, Abagita, Setaari, neende Karikaasi.

¹¹ Yabaalagira bachie baleete Fasiti, omuhasi w'omutuki yeechie niyefwaalire ekofia y'obutuki hu mutwe. Fasiti wuno yali omuhasi w'esiiso silai muno. Omutuki yali n'adaha ohweekesa abahoongo bomu butuki bwae neende abakeni bae babone koti lu Fasiti aboneha bulai.

¹² Nae Fasiti, omuhasi w'omutuki n'ahaya ohwiicha koti lu omutuki yali n'alagiire. Sino syanyoolesa omutuki muno, mani etima lyae nilisiingira.

¹³ Bulaanu omutuki yali niyanala ohweteebangaaho hu basaacha b'amakesi abamanyirifu mu by'amalako neende abakayi. Ao mani n'alaanga abakeraki b'amakesi, olwohuba nibo abamanya esihoyeerwa ohuhola.

¹⁴ Abaandu ba yahiraanga ohweteebaho nibo bano: Karisena, Setari, Adimaata, Tarisiisi, Meresi, Marisena, neende Memukani; abaami bahoongo bataanu-na-babiri abomu Perisia neende Media abali nibali bunyala buhunuufu buhiramo mu bwaami obwo.

¹⁵ Yaboolera abasaacha abo ati, “Ese, Omutuki Ahasuera, ndumire abahalaabani baange ohuchia eyiri Fasiti Omuhasi w'Omutuki ni ndi neende esifune si mulaangira, nae ahayire ohunjisamo oluyaali! Amalako kaboola siina? Haandi siina syeene esihoyere ohumuhola?”

¹⁶ Bulaanu Memukani niyeekesa omutuki alala neende abahoongo bae abo ati: “Fasiti omuhasi w'omutuki haba s'alekereese omutuki yeeng'ene, nae alekereese kata neende abahoongo bomu bwaami bae bosi. Mubwadyeeri bweene, alekereese buli musaacha oli mu bwaami bw'omutuki Ahasuera.

¹⁷ Buli muhasi owali mu bwaami obwo achia ohuchaaka ohulekeresaanga wamwe, n'anawulireenge esiindu si Fasiti, omuhasi w'omutuki aholere. Bachia ohuboolaanga bati, ‘Omutuki Ahasuera yalagira Fasiti, omuhasi w'omutuki ohwiicha yaali, nae Fasiti n'ahaya.’

¹⁸ Mani abahasi b'abaami abomu Perisia neende Media nibawulira koti lu omuhasi w'omutuki wuno aholere, bachia ohukaniaayira abasaacha baabwe oludaalo luno nilusisiiri ohwiira. Mani abahasi bali buli abaandu woosi baba bachia ohuhaya ohwiisa oluyaali mu basaacha baabwe, haandi abasaacha bachia ohunyoolerera abahasi baabwe.

¹⁹ Mani n'osiima, ewe ow'Oluyaali, tusa omunwa kw'obwaami mani olaangirire oti, Fasiti salinyalaho ohusudaho aambi neende omutuki ehabi liindi lyoosi daawe. Hola esyo siyandiikwe mu malako aka Perisia neende aka Media, mani kahaye ohukaluuhanisibwaho daawe. Mani omale omutuseho oluyaali lw'ohuba omuhasi w'omutuki, oteeo omuhasi wuundi omulai amuhiraho.

²⁰ Esyandiiko syao esyo nisinaasalaane buli abuundu mu butuki bwao buhoongo buno, buli muhasi yeesi aba achia ohwiisaanga oluyaali mu wamwe, kata wamwe yahaba n'ali omuyiinda oba omumanani.”

²¹ Omutuki alala neende abaami bae boosi nibasiima esibaaso sino, mani omutuki n'ahola koti lu Memukani yali n'ateesere.

²² Mani esyandiiko esyo nisitumwa buli situundu siri mu bwaami bw'omutuki Ahasuera, nisyaandiikirwe mu buli lulimi neende mu buli nyaandiiko eya buli situundu, esiboola siti buli musaacha ahoyere ohuba omwaami w'edaala lyae haandi neende ohuba neende obunyala bw'ohulomaloma emboosi bumaliirihayo mu daala lyae.