Esekeeli 37 - EBBAIBBO EMBOOSI YA NASAAE

Ehooho ly'amakuumba moomu

¹ Ndenyoola amaani k'Omwaami nikaandiho muno, Mwooyo w'Omwaami niyaanjisa aasi akatikaati w'ehooho lichuulemo amakuumba.

² Yaambodoohania ehooho elyo, niimbita mu makuumba. Nae bone, amakuumba kali amaangi muno, nikeechula mu hooho chana elyo. Haandi bone, amakuumba ako kali nikooma kurururu.

³ Omwaami yeemao yandeeba ati, “Ewe omwaana w'omuundu, amakuumba kano mani kanyala kaakobolamo obulamu?” Nae nimukobolamo endi, “Ewe Omwaami Nasaae, niiwe omanyire.”

⁴ Omwaami haandi yamboolera ati, “Laangirira, oboolere amakuumba moomu kano kawulire bi Ese Omwaami mboola.

⁵ Kaboolere oti Omwaami Nasaae aboola ati, ‘Njia ohubataamo omuuya, mani mube abalamu.

⁶ Haandi njia ohubataaho emisi neende enyama, mbabwiiheho esihoba, mbateemo omuuya mube abalamu. Olwo nilwo lu mwahamanyire muti, Niise Omwaami.’ ”

⁷ Niindusa obunabbi koti lu Omwaami yali niyaandagiire. Nae nindali niindusa obunabbi, ndawulira ekono nilichakaalihana, mani bone, amakuumba nikachaaka ohwiicha alala, buli kuumba nilichaaka ohweediira hu lyaasye.

⁸ Nae nindehaliirisa, ndabona amakuumba nikeechereho emisi neende enyama, haandi esihoba nisibibwiihireho humukulu. Nae omuuya nikutabirimo daawe.

⁹ Omwaami yamboolera ati, “Laangirira oboolere omuuya oti, ‘Ewe omuuya, Omwaami Nasaae ahulagira otule mu buli mbeka, wiichie mani ofuute hu milaambo ky'abaandu beetwa bano, bakobolemo obulamu.’ ”

¹⁰ Ndalaangirira koti lu Omwaami yali niyandagiire. Omuuya nikubeengiramo nibalamuha, nibeema neende amakulu mani nibeehola eye hoongo muno.

¹¹ Omwaami yamboolera ati, “Ewe omwaana w'omuundu, abaandu bomu syaalo sya Yisiraeli bali koti amakuumba kano. Bona, baboola bati, ‘Amakuumba keefwe kooma. Hubula esuubi lyoosi daawe. Husihiriire luweere.’

¹² Mani sakira laangirira, obaboolere oti, ‘Omwaami Nasaae aboola ati: Eng'we abaandu baange, njia ohwiikulao eng'ani cheeng'we mani mbatusemo. Njia ohubakobosayo mu syaalo sya Yisiraeli.

¹³ Nindaheekuleo eng'ani cheeng'we mani ndabatusamo, niwo yimwahamanyire muti, Niise Omwaami.

¹⁴ Njia ohubataamo Mwooyo waange, mube abalamu, mani mbate mu syaalo syeeng'we syeene. Olwo nilwo lu mwahamanyire muti, Ese Omwaami, Niise olomaloome.’ ”

Obwaami bwa Buyudaaya neende obwa Yisiraeli ohuba bulala

¹⁵ Omwaami yalomaloma naange n'aboola ati:

¹⁶ “Ewe omwaana w'omuundu, bukula olusaala mani olwandiikeho oti, ‘Lwa Yuda, neende abaana ba Yisiraeli abaholera alala nae’; haandi obukule olusaala luundi mani olwandiikeho oti, ‘Lwa Yosefu (olusaala lwa Efuraimu) neende abomu nyuumba ya Yisiraeli abaholera alala nae’.

¹⁷ Mani ochidiirire alala, chibe koti olusaala lulala mu mahono kao.

¹⁸ Nae abaandu bao nibateeba bati, ‘Amahuluundu k'esiindu sino niko siina?’

¹⁹ Baboolere oti, Omwaami Nasaae aboola ati: Bone, ndi aambi ohudiira olusaala lwa Yosefu (oluli mu muhono kwa Efuraimu) neende enono cha Yisiraeli echiholera alala nae, mani njia ohuluwambaania alala neende olusaala lwa Yuda, choombi chihole chibe olusaala lulala mu muhono kwaange.

²⁰ Nae esaala chiwandiikireho echo nichinaba nichisisiiri alala mu muhono kwao, abaandu nibabona,

²¹ baboolere oti, Omwaami Nasaae aboola ati: Bone, njia ohutusa Abaisiraeli mu byaalo bi bachiamo, mbabuuse alala mbakobose mu syaalo syaabwe syeene.

²² Njia ohubata alala mani mbahole babe esyaalo silala mu syaalo esyo, hu ngulu chomu Yisiraeli. Bahabe neende omutuki mulala owahabatuke boosi, haandi haba sibyahabe ebyaalo bibiri daawe, haandi haba sibwahakabuhaniemo ohuba obwaami bubiri daawe.

²³ Haba haandi sibachia hwenyaasa abeene neende ohwiinamira ebiloongaloongwe daawe, oba ohuhola ebiindu bihyaamu biindi. Nae njia ohubawonia mbatuse mu hweebisa hwaabwe hu baholeramo ebyonoono, mani njia ohubalabya. Bahabecheenge abaandu baange, syesi mba Nasaae waabwe.

²⁴ “Daudi omuhalaabani waange, niye onabecheenge omutuki waabwe. Boosi banabecheenge neende omwaayi mulala. Banaaholeenge bi mbalagira, haandi banaadiireenge amalako kaange.

²⁵ Banaamenyeenge mu syaalo sya bakuuka yaabwe, esyaalo si ndaberesa omuhalaabani waange Yakobbo. Bahamenyeenge omwo, abeene, neende abaana baabwe, neende abeechuhulu baabwe endaalo choosi pe. Haandi omutuki Daudi, omuhalaabani waange niye onabatukeenge endaalo choosi pe.

²⁶ Njia ohuhola nabo endagaano y'endaalo choosi; mani lyahabe endagaano yitaakama, ely'endaalo choosi nabo. Njia ohubaberesa ehabi mani beengiye, haandi njia ohutaao enyuumba yaange yohwiinamiramo yibe akatikaati waabwe endaalo choosi pe.

²⁷ Obumenyo bwaabwe bwahababeemo. Ndaabecheenge Nasaae waabwe, haandi bosi banaabecheenge abaandu baange.

²⁸ Nindahate enyuumba yaange yohwiinamiramo akatikaati waabwe, nilwo lu byaalo byahamanyire biti, Ese Omwaami, Niise owadoola Yisiraeli ohuba abaandu baange beene.”