Esekeeli 34 - EBBAIBBO EMBOOSI YA NASAAE

Abeemirisi ba Yisiraeli

¹ Omwaami yalomaloma naange n'aboola ati:

² “Ewe omwaana w'omuundu, laangirira ebidiira hu masira kahakwe hu beemirisi ba Yisiraeli. Baboolere oti, kata eyiri eng'we abaayi, Omwaami Nasaae aboola ati: Chibaakaanire eng'we abaayi ba Yisiraeli, abeliisa mweeng'ene, nae nimuhaya ohuliisa amakoondi. Abaayi haba sibahoyeere ohuliisa amakoondi daawe?

³ Mung'wa amabeere, haandi mwefwaala engubo chisonwa mu bwooya bwaako, mani mweeta amakoondi kahiramo obukinu; nae haba simukadeebaho daawe.

⁴ Amakoondi kabulamo amaani, haba simukadeebaho mani kakobolamo amaani; amalwaae, haba simwakalera kawone; akafuniihe, haba simukaamba keyoonga; akakotere, haba simukakoonya mwaakakobosao. Nae mukatuka neende amaani alala neende obwaalaba.

⁵ Kasalaana, hulwohuba kabula neende omwaayi, esolo chomu siino choosi chikeeta, mani chikalya.

⁶ Amakoondi kaange kasalaana, mani kaasalaanira hu ngulu choosi neende hu buli sigulu sileeyi. Amakoondi kaange kasalaanira mu syaalo syoosi, mani yaabulao okakoonya, oba oteberesaho yi kachiriire.

⁷ “Mani sakira eng'we abaayi, wulire emboosi chi Ese Omwaami mboola.

⁸ Ese Omwaami Nasaae, ndeechuba koti lu ndi omulamu, muhoyere muwulire bi mboola. Amakoondi kaange keehola akayiimwa, haandi amakoondi kaange keehola ebyohulya by'esolo ndeende, olwohuba kabula omwaayi. Olwohuba abaayi baange bandataao haba sibakakoonya daawe, nae nibo abedeebaho abeene, mani haba sibaliisa amakoondi kaange.

⁹ Mani sakira eng'we abaayi, wulire bi Omwaami aboola.

¹⁰ Omwaami Nasaae aboola ati: Bone, ndi omusuku weeng'we, eng'we abaayi. Njia ohubatusaho amakoondi kaange, mwaakame ohuba abaayi bako, mani mwaakame ohwedeebaangaho abeene. Njia ohwaabina amakoondi kaange mu minwa kyeeng'we, mani kahaye ohuba ebyohulya byeeng'we.

Omwaayi mulai

¹¹ “Olwohuba Omwaami Nasaae aboola ati: Bone, Ese omweene, njia ohukoonya amakoondi kaange, mani ngaaye.

¹² Koti lu mwaayi yahakoonyeresa mu byaayo byae amakoondi kaandi kasalaanire, nilwo lu syesi njia ohukoonyeresa amakoondi kaange. Njia ohukawaabina ngatuse buli abuundu yi kasalaanira hu ludaalo lw'ebireesi neende esiirima olwo.

¹³ Njia ohukatusa mu byaalo, kabuuse alala ohutula mu byaalo biingi, mani ngaleete mu syaalo syako syeene. Njia ohukaayira hu ngulu cha Yisiraeli, hu ndulo w'emyaalo, neende buli abuundu woosi ali abaandu mu syaalo esyo.

¹⁴ Njia ohukaayira mu bwayiro bulai, hu ngulu ndeeyi cha Yisiraeli, ohwo nihwo ohwahabe obwaayiro bwaako. Mu bwayiro bulai obwo, nimwo mukaheeyalise, mani ngaayire mu bwaayiro bulai obwo, hu ngulu ndeeyi cha Yisiraeli ohuli obunyaasi bw'omuboka.

¹⁵ Ese omweene, Niise ochia ohwaaya amakoondi kaange, nganyoolere abuundu yi kawuluuhira. Ese Omwaami Nasaae, Niise oboola.

¹⁶ “Njia ohukoonya amakoondi kakota, njia ohukobosa ako akasalaana, maambe akafuniha, ndere akalwaala, ngobose amaani mwaako akabulamo amaani. Nae amakinu haandi ak'amaani, njia ohukaliinda. Njia ohukaayira mubwadyeeri.

¹⁷ “Nae eng'we, ebyaayo byaange, Omwaami Nasaae aboola ati, bone, njia ohuheengera buli muundu omusaango. Eng'we emiiku neende ehole.

¹⁸ Haba simwiikuta ohulya obunyaasi bulai, nae mumeedaho ohuseenakira obunyaasi bu mutaliire. Nimumala ohung'wa amaachi malai, nimudubuula akadoong'ereo.

¹⁹ Amakoondi kaange kaandi nikaaya obunyaasi bu museenakiire, haandi nikang'wa amaachi kamudubuulire.

²⁰ “Mani sakira Omwaami Nasaae ababoolera ati: Bone, Ese, Ese omweene njia ohuheenga omusaango akatikaati w'amakoondi makinu neende amang'ayu.

²¹ Olwohuba musiindiha neende embafu alala neende amabeka-beka amakoondi malwaae, haandi mutwooma akaandi neende enjika cheeng'we, ohwoola lu mukatusa mu lwaayiro mani nikasalaana.

²² Njia ohwaabina amakoondi kaange, mani kahaye ohuyiimwa; haandi njia ohuheenga omusaango akatikaati w'amakoondi neende amakoondi.

²³ Njia ohukaberesa omwaayi mulala, oli koti omuhalaabani waange Daudi. Oyo niye owahakaliise, haandi abe omwaayi wako.

²⁴ Ese Omwaami, ndahabe Nasaae waabwe, haandi omuhalaabani waange Daudi yahabe omutuki waabwe. Ese Omwaami, Niise olomaloome.

²⁵ “Haandi ndahahole nabo endagaano y'omuleembe. Ndahamale mu syaalo esolo ndeende, mani amakoondi kaange kanyale ohumenya mu saa, neende ohukona mu bichaha, niyibulao esolo yi katiisa.

²⁶ “Njia ohubaberesa ehabi, haandi bahabecheenge mu loba lyeebodohaania esigulu syaange syoolerefu. Njia ohubakwiisiraanga efula mu biha bidahihana; yicha ohubeechaanga efula y'ehabi.

²⁷ Emisaala kyomu siino, kichia ohwamaanga ebyaamo byaachio, haandi endalo chinabecheengemo ebilime biingi, haandi abaandu banabecheenge neende omuleembe mu syaalo syaabwe. Nindahamale ohufunaka-funaka eminyororo chaboya abaandu baange, mani ndaabawonia ohutula mu mahono k'abo ababawaamba, niwo yibahamanyire bati, Niise Omwaami.

²⁸ Abaandu bomu byaalo biindi haba sibahemeede ohubayiima daawe, haandi esolo ndeende chomu syaalo esyo haba sichahabalye daawe. Bahamenye mu muleembe abulao haandi owahabatiisa-tiiseho daawe.

²⁹ Njia ohuhola eloba lyomu ndalo chaabwe libe elai muno, njia ohumalao enjala mu syaalo esyo. Abaandu bomu byaalo biindi haandi haba sibahabacheheho daawe.

³⁰ Bahamanye bati, Ese Omwaami, Nasaae waabwe, ndi alala nabo, haandi abo, Abaisiraeli nibo abaandu baange. Ese Omwaami Nasaae, Niise olomaloome.

³¹ “Eng'we, amakoondi kaange, ebyaayo bi njaya, niing'we abaandu baange, haandi Niise Nasaae weeng'we.” Nilwo lu Omwaami Nasaae aboola.