Esekeeli 32 - EBBAIBBO EMBOOSI YA NASAAE

Omutuki wa Misiri afwaananisibwa neende egweena

¹ Olwoola, hu ludaalo lutaangira, olw'omwoosi kw'ehumi neende kibiri, mu mwaaka kw'ehumi neende kibiri nihuli mu buwaambe, Omwaami yalomaloma naange n'aboola ati:

² “Ewe omwaana w'omuundu,” “chaaka ohulira omutuki wa Misiri, mani omuboolere oti: “Omweene weeyira ohuba koti edalang'i mu byaalo, nae oli koti egweena mu nyaanja. Osoohera mu myaalo kyao, odubuula amaachi kaakyo neende amakulu kao, n'onyaasa amaachi kakyo.

³ Omwaami Nasaae aboola ati: “Abaandu bomu byaalo biingi nibaheeche, njia ohuhuteka neende olweero lwaange mani huyaambye. Bahahuhwehweesemo mani bahusukune hu genya.

⁴ Njia ohuhusukuna hu loba, hulehe alafu, njia ohuhuleha amayoni kabburuha koosi kahukweeho, neende esolo chohu syaalo syoosi chihulye.

⁵ Ndahate enyama yao hu ngulu, njichuse ehooho neende amakuumba kao.

⁶ Ndahachuhe amabaanga kao hu syaalo kadebeere ohwoola hu ngulu, mani kahulukuse; keechuse emyaalo.

⁷ Nimala ohuhusihirisa, njia ohubwiiha ekulu, njia ohwaakamya eng'ining'ini ohwaaduha. Njia ohubwiiha hu lyuuba ebireesi, mani omwoosi haba kuhaye ohwaaduhaho.

⁸ Ebyaaduha byohu kulu byoosi ebihwaaduhiraho njia ohubisimya, esyaalo syao sidoong'e mu siirima. Nilwo lu Omwaami Nasaae aboola.

⁹ “Ndahakere abaandu baangi beeyendeherera, nindahoose emboosi ch'ohusihiriswa hwao mu byaalo bi otawuliraangaho.

¹⁰ Wahakere abaandu baangi besiinduha mani baateng'eng'ala, nibabona ebihukwiireho, haandi abatuki baabwe bahesiinduhe hulw'obuti, nibahabone ninjuuya olugaanga lwaange mu moni waabwe. Hu ludaalo lu wahakwiireho, abaandu boosi bahateengerehe, buli muundu naadaha ohuwonia obulamu bwae.”

¹¹ Olwohuba Omwaami Nasaae aboolera omutuki wa Misiri ati: “Olugaanga lw'omutuki wa Bbabbilooni lwahahwooleho ewe omutuki.

¹² Ndahalehe abalwaani b'amaye b'amaani, abomu byaalo bihiramo obwaalaba beete abaandu bao. Abaandu bao boosi neende ebiindu byao byoosi ebikera niwehuduumbasa byahasihiriswe.

¹³ Njia ohusihirisa esolo chao choosi echiri buli abuundu ali amaachi maangi. Hubulao ohukulu hw'omuundu, noomba ebirekeyi by'esisolo esyahakadubuule haandi.

¹⁴ Njia ohuleha amaachi kaabwe kakwalaale, haandi emyaalo kyaabwe kihulukuse koti amafuta. Nilwo lu Omwaami Nasaae aboola.

¹⁵ Nae nindahahole esyaalo sy'e Misiri ohuba ekuunda, nisisihirise buli siindu sisirimo, nindaheete abaandu boosi abasimenyamo, ao niwo yibahamanyire bati, Niise Omwaami.

¹⁶ “Luno nilwo olweembo lu baheembe nibalira. Abahasi bomu syaalo bahalweembe nibalira Misiri, neende abaandu basyo boosi. Ese Omwaami Nasaae Niise oboolere.”

Esyaalo sy'abafu

¹⁷ Hu ludaalo lw'ehumi neende chitaanu, olw'omwoosi kutaangira, mu mwaaka kw'ehumi neende kibiri, nihuli mu buwaambe, Omwaami yalomaloma naange, n'aboola ati:

¹⁸ “Ewe omwaana w'omuundu,” “lirira abaandu baangi muno. Basukune aasi alala neende ebyaalo biindi eby'amaani mani beehe emakoombe mu liina.

¹⁹ Baboolere oti: “Eng'we muhira wiina mu huboneha bulai? Mwiihirire aasi mube alala neende abaandu bataali abahebe.’

²⁰ Abaandu ba Misiri bahafwiire alala neende abo abeeterwa mu biita, abaandu basyo baangi baheetwe neende olugaanga.

²¹ Abaandu b'amaani muno haandi abamanyihaane muno mu by'ohulwaana, abo abahoonyaanga Misiri mu hulwaana, bahakaanire Abamisiri emakoombe nibaboola bati: ‘Abaandu bataali abahebe, abeeterwa mu biita, mbano beehiriire aasi, bawuleerere, mani beyaliise ano.’

²² “Asiria siri eyo, neende abafu basyo boosi. Ebiriindwa byaabwe bisyebodohaanie. Boosi beetwa, baafwiira mu biita.

²³ Ebiriindwa byaabwe biri eyale muno yi makoombe yakamira. Abalwaani b'amaye basyo basiihwa ohwesyebodoohania. Boosi bafwiire, beeteerwe mu biita. Nibali nibasisiiri abalamu, batisaanga abaandu muno.

²⁴ “Elamu siri eyo neende abalwaani b'amaye basyo baangi ohwebodohonia esiriindwa syao. Boosi beeterwa mu biita mani nibafwa. Beehirira emakoombe nibataaheberwe. Nibali nibasisiiri abalamu, batisaanga abaandu muno, nae bulaanu esoni chibadiiriire alala neende abo abeehirira aasi mu liina.

²⁵ Elamu syeyaliire esitaanda alala neende abo abeeterwe, mani ebiriindwa byaabwe bisyebodohaanie. Boosi beeterwa mu biita nibasisiiri ohuhebwa. Nibali nibasisiiri abalamu, batisaanga abaandu muno. Nae bulaanu esoni chibadiiriire alala neende abo abeehirira aasi mu liina, siri alala neende abo abeeterwa mu biita.

²⁶ “Ebyaalo bya Meseki neende Tubbali biri eyo, mani ebiriindwa by'abalwaani b'amaye babyo bibebodohaanie. Boosi abataali abahebe, beeterwa mu biita. Nae nibali nibasisiiri abalamu, batisaanga abaandu muno.

²⁷ Nae haba sibasiihwa alala neende abalwaani b'amaani abamanyihana ohutula hale; abasiihwa neende oluyaali. Abo abeeha emakoombe nibali neende ebilwaaniso byaabwe, haandi engaanga chaabwe nibachiteere enamutwe waabwe, haandi engabo chaabwe nibachiteere hu makuumba kaabwe. Abalwaani b'amaye bamanyihaane abo bali ab'amaani muno, haandi nibasisiiri abalamu, batisaanga abaandu muno.

²⁸ “Ewe Misiri, wahanyoongoleerwe alala neende abo abataali abahebe, alala neende abo abeeterwa mu biita.

²⁹ “Edomu siri eyo, alala neende abatuki basyo, neende abachweenufu basyo boosi. Bali abalwaani b'amaye b'amaani muno, nae bulaanu bali emakoombe alala neende abaandu bataali abahebe, abo abeeterwa mu biita, abeeha aasi mu liina.

³⁰ “Abachweenufu b'emukulu boosi bali eyo, neende Abasidoni boosi. Beehiriireyo alala neende abo abeeterwa mu biita. Kata ayahaba mbwe batisaanga abaandu muno, hulw'amaani kaabwe, bulaanu esoni chibadiiriire haandi bafwiriire alala neende abaandu bataali abahebe. Bali alala neende abo abeeterwa mu biita. Esoni chibadiirire nasilala neende abo abeeha aasi emakoombe.

³¹ “Nae omutuki wa Misiri, omutuki wa Misiri niyahababone, yaheebirire engisa y'abaandu baangi abafwa, omutuki wa Misiri neende abalwaani b'amaye bae, abeeterwa mu biita.” Nilwo lu Omwaami Nasaae aboola.

³² “Olwohuba ndataao omutuki wa Misiri ohutiisa abaandu hu syaalo. Nae omutuki oyo alala neende abalwaani b'amaye bae baheeterwe mu biita, mani baaliswe alala neende abaandu bataali abahebe, abo abeeterwa mu biita.” Nilwo lu Omwaami Nasaae aboola.