Esekeeli 31 - EBBAIBBO EMBOOSI YA NASAAE

Misiri sikeraanisibwa hu museengese

¹ Hu ludaalo lwaamberi lw'omwoosi kwohudatu, mu mwaaka kw'ehumi neende mulala, nihuli mu buwaambe, Omwaami yalomaloma naange n'aboola ati:

² “Ewe omwaana w'omuundu,” “teeba omutuki wa Misiri alala neende abaandu bae boosi oti: “Ndahahukeraania hu wiina mu buhunuufu?

³ Bona, njia ohuhukeraania hu museengese kwohu Lugulu lwa Lebbanooni, okw'amasaga maangi haandi okw'esiiniha sihoongo, haandi omuleeyi muno, amasaga k'aakulu kaakwo koola hu bireesi.

⁴ Kaliwo amaachi ka kwang'wechaanga nikakuhusa, emyaalo kyomu loba ki kwang'weechaangamo. Emyaalo kyahulukusaanga nikyebodoohania abuundu yi kwataakwa, mani kyoolaanga hu misaala kiindi kyoosi ekyomu sichaha.

⁵ Hulwohuba kwanyolaanga amaachi bulai, kwaleeya kwaahira emisaala kyomu sichaha esyo kyoosi. Amasaga kakwo kaleeya haandi kaatakalala muno.

⁶ Amayoni kabburuha koosi nikoombaha ebiyu byako mu masaga kakwo; haandi esolo chomu siino choosi cheebuliraanga abaana bachio aasi w'amasaga kakwo. Ebyaalo bihunuufu byoosi, byeyikamaanga mu siiniha syakwo.

⁷ Omusaala okwo kwali omulai muno haandi okw'amaani. Kwali neende amasaga maleeyi; olwohuba emisi kyakwo kyali kyeeha aasi muno ohwoola yi maachi maangi kali.

⁸ Emiseengese kiri mu ndalo ya Nasaae haba sikyanyalaanga ohuleeya koti omuseengese okwo. Kubulao omukaratuusi kwoosi okwali neende amasaga kali koti ak'omuseengese okwo. Kubulao omusaala kuundi okwali nikwaakana neende omuseengese okwo oba kata sa amasaga kakyo ohubaaho koti akakwo. Kubulao omusaala kwoosi mu ndalo ya Nasaae okwali omulai koti omuseengese okwo.

⁹ Ndakuhola kwaaboneha bulai muno amasaga kakwo nikatakalala muno. Emisaala kiindi kyoosi ekyali mu ndalo ya Nasaae, kyakwekoombaanga.

¹⁰ “Mani sakira Omwaami Nasaae aboola ati: Olwohuba koti lu musaala okwo kwahula kwaleeya, mani kwegeeng'a hu bireesi, nilwo lu kwehuduumbasa hulw'obuleeyi bwakwo.

¹¹ Njia ohukuta mu mahono k'omuundu w'amaani akusaandye hulw'ebyonoono byakwo. Malire ohukusukuna erwaanyi.

¹² Abateende, abo abahiramo obwaalaba mu byaalo, bachia ohukutema mani bakulehe ao. Amasaga kakwo kachia ohukwa hu ngulu neende mu mahooho koosi. Amasaga kakwo kahafunihire mu madiba k'amaachi kohu syaalo. Abaandu bohu syaalo boosi abali nibeyikama mu siiniha syakwo, bahakuleheenge ao nibeweerao.

¹³ Amayoni kabburuha akomu siino koosi kaheeche kaamenya hu mutuumba okwo nikukwiire, haandi esolo chomu siino choosi chahaseenakire amasaga kakwo.

¹⁴ Sino syahabe sityo, mani kubuleo omusaala kwoosi kuhulira huundulo w'amaachi, mani kwahula kwaleeya muno oba kwaageeng'a amasaga kakwo hu bireesi. Mani kata akwahang'wa amaachi kutye, haba sikwahahule kwaleeya kwaaba koti omuseengese okwo. Nae emisaala kyoosi kinabecheenge eky'ohufwa koti abaandu, kinabecheenge alala neende abo abeeha emakoombe.”

¹⁵ Omwaami Nasaae aboola ati: “Omuseengese okwo nikwaheehirire emakoombe, ndahalehe amaachi k'ebusiba kakweebuusaho kaakulira. Ndahahamye emyaalo kyakwo, mani amaachi maangi kaakama ohuhulukusa. Olwohuba omusaala okwo kufwiire, ndahaleete esiirima hu ngulu cha Lebbanooni, mani emisaala kyomu siino choosi kyahahoohe.

¹⁶ Nindahakusukune emakoombe alala neende abo abeeha aasi mu liina, ohukwa hwakwo aasi hwahateengerese ebyaalo. Emisaala kyoosi ekyomu Edeni, neende emisaala midoolemo ekihiramo obulai mu Lebbanooni, haandi eking'wa amaachi kyoosi, ekyamirihira aasi mu loba, kyahasaangaale nikukwiire aasi.

¹⁷ Kyaheehirire alala nakwo emakoombe, eyiri abo abeeterwa mu biita. Abo abomu byaalo, abamenyaanga mu siiniha syakwo bahasihirire.

¹⁸ Musaala siina mw'ekyo okwali nikwaakana naawe mu luyaali neende mu maani? Mani ewe weesi ochia ohwiihirira emakoombe alala neende emisaala ky'Edeni, obe alala neende abo abatahebwa, alala neende abo abeeterwa mu biita. “Omusaala kuno, niye omutuki wa Misiri omutuki wa Misiri neende abaandu bae boosi” Nilwo lu Omwaami Nasaae aboola.