Esekeeli 17 - EBBAIBBO EMBOOSI YA NASAAE

Olukaado lw'eeswi neende omusabbiibbu

¹ Omwaami yalomaloma naange n'aboola ati:

² Ewe omwaana w'omuundu, boolera Abaisiraeli olukaado luno,

³ lehe bamanye bi Ese Omwaami Nasaae mboola: Eeswi hoongo muno, eyiri neende embaya hoongo muno, neende amooya maleeyi ak'eraangi nyiingi, yeechia hu bigulu bya Lebbanooni, mani niyakulaho esaga ly'aakulu lyeene ly'omuseengese.

⁴ Mani eeswi eyo niyikiinga esaga elyo niyiliyira mu syaalo sirimo obuchurusi, mani niyilitaaka mu siko sy'abachurusi.

⁵ Haandi eeswi eyo niyikiinga omusabbiibbu mudoto okwomu syaalo sya Yisiraeli, mani niyikutaaka mu loba lai, aambi neende amaachi maangi akakuhoonya ohuhula.

⁶ Omusabbiibbu okwo mani nikuloha bulai, nikuhulira nikulaanda mani nikutakalala. Nae amasaga kakwo nikatingaala aakulu yi eeswi eyo yiri, emisi kyakwo nichiiha aasi mu loba. Omusabbiibbu okwo nikutaaho amasaga, mani nikwiichulaho amasaafu.

⁷ “Nae niyibaao eeswi yiindi, ehoongo muno, eyiri neende embaya hoongo neende amooya maangi muno. Nae bone, omusabbiibbu okwo nikukaluuhania emisi kyakwo ohuchitusa mu ndalo yi kwali nikwataakwa, nichitingaala eyiri eeswi yiindi eyo yiri. Haandi nikukaluuhania amasaga kakwo ohutingaala eyiri eeswi yiindi eyo, mbwe yikuchuhiirisehooho amaachi.

⁸ Nae omusabbiibbu okwo kwali nikwataakwa mu loba lai, yi maachi maangi kali, kunyale ohutaaho amasaga, haandi kwaameho ebyaamo, kube omusabbiibbu mulai.

⁹ “Baboolere oti: ‘Omwaami Nasaae ateeba ati, omusabbiibbu okwo kwahabe bulai? Eeswi yakutaaka haba siyahakwiiyeyo neende emisi kyakwo, yaakunokaho ebyaamo byakwo, mani amasaafu mabisi kwakwo kaahooha? Haba sisyahadahe amaani maangi oba abaandu baangi ohukwiiyao kwoosi neende emisi kyakwo kyeene.

¹⁰ Omusabbiibbu kw'obona okwo, mani nikutaakwa abuundu waandi, kunyala kwaaloha bulai? Haba sikunyala ohuhooha omuyaka kw'ebukwe muungi nikukuwuucha? Omusabbiibbu okwo kwahahoohere mu ndalo yikutaakirwa.’ ”

Amahuluundu k'olukaado katuumbulwa

¹¹ Haandi Omwaami yalomaloma naange n'aboola ati:

¹² “Teeba abaandu bomu mu syaalo sino bajeemu abo nibamanyire amahuluundu k'olukaado luno. Baboolere oti, bone, omutuki wa Bbabbilooni yeechia Yerusalemu, mani n'awaamba omutuki wasyo neende abaandu bahunuufu bamwo, mani naachia nabo Bbabbilooni.

¹³ Mani n'ayira mulala hu b'olwiibulo lw'obutuki, naahola nae endagaano, niyamuboolera ohwechuba ati achia ohuba omweesikwa. (Abaandu b'amaani bomu mu syaalo ba yawaamba,

¹⁴ yali neende esichiiririrwa sy'ohuloongoyasa esyaalo mani sihaye ohweniinia esyeene, nae baliinde endagaano sinyale ohwomiira.)

¹⁵ Nae omutuki w'e Buyudaaya najeema, mani n'atuma bawamwaanda bae Misiri, ohunyoolayo efaraasi neende eye hoongo. Mani omtuki oyo yahabe bulai? Omuundu ohola ebiindu biri bityo anyala ohuwona? Anyala ohufunaka endagaano mani yaahaywa ohusaandisibwa.”

¹⁶ Omwaami Nasaae aboola ati: “Ndeechuba koti lu ndi Nasaae mulamu,” endi mubwadyeeri bweene, omutuki oyo yahafwiire mu Bbabbilooni, olwohuba yafunaka endagaano yi yahola neende omutuki wa Bbabbilooni owamwiihasa hu sisaala sy'obutuki.

¹⁷ Omutuki w'e Misiri neende eye lyae ly'amaani ely'abamaye bae baangi, haba sibahanyale ohumuhoonya mu biita, abaandu ba Bbabbilooni nibahabuungihe alala ebituuli by'eloba haandi bayaba obuko ohusihirisa abaandu baangi.

¹⁸ Omutuki oyo, haba siyahawone, olwohuba yalekeeresa esichubo, neende endagaano yaange yi yafunaka, mani yaahola ebiindu bino byoosi.

¹⁹ Mani sakira Omwaami Nasaae aboola ati: “Mubwadyeeri ndeechuba koti lu ndi Nasaae mulamu endi, njia ohumusaandya olwohuba esichubo syaange si yalekeeresa, neende endagaano yaange li yafunaka.

²⁰ Njia ohumuteka mani muwaambye mu lukiriikiri lwaange, mani muyire Bbabbilooni, musaandisirye eyo, olwohuba yahaya ohuba omweesikwa yi ndi.

²¹ Abasikaari bae bahiramo obulai, baheeterwe mu biita, nae abaliwonao, bahasalaanire mu nyaande choosi. Ao mani niwo yibahamanyire bati, Ese Omwaami, Niise olomaloome.”

Esisuubise sy'Omwaami sy'ohukobosamo omwooyo

²² Omwaami Nasaae aboola ati: “Njia ohubukula esaga doto, ly'aakulu muno hu museengese, mani ese omweene litaake hu lugulu luleeyi muno.

²³ Hu lugulu lwa Yisiraeli oluhiramo obuleeyi. Lyahahule liteeho amasaga haandi lyaameho ebyaamo mani lyeehole omuseengese muhoongo muno. Amayoni kabuli ngeri kahamenyeengeho nikanyoola obweyikamo mu siiniha syakwo.

²⁴ Emisaala kyomu syaalo kyoosi kyahamanyire ao kiti Niise Omwaami. Niise otema ndakwiisa aasi emisaala mileeyi haandi Niise okera emisaala miimbikiti kyaahula kyaaba emileeyi. Haandi Niise okera emisaala mibisi kyaahooha, haandi ndaakera emisaala myoomu kyaaloha. Ese Omwaami, Niise olomaloome, haandi njia ohuhola buli siindu si mboolere ohuhola.”