Esekeeli 12 - EBBAIBBO EMBOOSI YA NASAAE

Omunabbi yeeyekesa koti omuundu okoonya obwiiruhiro

¹ Omwaami haandu yalomaloma naange n'aboola ati:

² “Ewe Omwaana w'Omuundu, wamenya mu baandu bajeemu. Bali neende emoni, nae haba sibabona. Bali neende amatwi, nae haba sibawulira;

³ olwohuba bajeemu nibo. Mani sakira ewe omwaana w'omuundu, boya omugugu kwao, weehole koti omuundu okoonya obwiiruhiro. Siingira mani owuuye esideete ng'alang'ala abaandu nibabona. Wuuya otule abuundu ao obe koti omuundu ochia mu buwaambe abaandu nibabona. Awuundi banyala ohulabuhaho, olwohuba bajeemu nibo.

⁴ Boya omugugu kwao esideete ng'alang'ala, otuleyo engoloobe abaandu nibabona, obe koti abaandu batula ewaabwe nibachia mu buwaambe.

⁵ Domola esidomo mu sida, obisiremo omugugu kwao abaandu nibabona.

⁶ Wedwiihe omugugu kwao hu mabeka abaandu nibabona; otule esiro esiirima nisididiisye, haandi niwefuuniihe mu bweeni n'otabona yooli ohuchia. Olwohuba huteereo obe ahalolero halabula Abaisiraeli.”

⁷ Ao mani nihola koti lu Omwaami yali niyandagiire ohuhola. Hu ludaalo olwo, ndatusamo ebiindu byaange, mani nimboya omugugu kwaange koti omuundu ochia mu buwaambe. Engoloobe eyo, ese mweene nindomola esidomo mu sida; mani nindusiramo ebiindu byaange esiirima nisididiisye, nimbyedwiiha hu mabeka kaange abaandu nibabona.

⁸ Nae nibwahya echuli, Omwaami yandeeba ati:

⁹ “Ewe omwaana w'omuundu, Abaisiraeli bajeemu abo haba sibahuteebereho bati, ‘Oli ohuhola siina syeenel’?

¹⁰ Baboolere oti, ‘Omwaami Nasaae aboola ati, Omulaanga kuno kw'omutuki otuka Yerusalemu neende Abaisiraeli boosi abali mu Yerusalemu.’

¹¹ Beekese oti Omwaami Nasaae aboola ati, ‘Esiindu sy'oholere esyo niho ahalolero h'ebiindu bicha ohubakwaaho. Bachia ohwiiruswa batule mu syaalo syaabwe bachie mu buwaambe.’

¹² Mani omutuki obatukamo alikiinga omugugu kwae hu mabeka mu siirima, mani atule erwaanyi. Yahadomole esidomo mu sida abitiremo. Yahefuunihe mu bweeni, ahaye ohubona engira yali ohuchiiraho.

¹³ Nae njia ohumuteka, mani muwaambye mu muteego kwaange. Ndahamuyire Bbabbilooni mu syaalo sy'Ababbabbilooni, nae alifwa n'asisiiri ohubonaho esiko esyo.

¹⁴ Njia ohusalaania mu buli nyaande abo boosi abamwebodohaanie, abo boosi abetekeehe ohumuhoonya, neende amaye kae koosi. Haandi njia ohutaao abaandu bamukiiya ohumwiita.

¹⁵ Nae nindahabayire mu byaalo biindi, mani ndabasalaania mu byaalo bikeni, ao niwo yibahamanyire bati Niise Omwaami.

¹⁶ Nae njia ohulehao abaandu badiidi abahaone ohwiitirwa mu biita, oba ohufwa enjala, oba ohufwa amalwaae. Abo nibahabe eyomu byaalo bi bahabayiremo balimanya bati ebiindu bi bahola byoosi byali eby'omusiro, haandi balimanyira ao bati, Niise Omwaami.”

Ahalolero h'omunabbi ohinaakirira

¹⁷ Omwaami haandi yalomaloma naange, n'aboola ati:

¹⁸ “Ewe omwaana w'omuundu, ebyohulya byao bilye n'ohinaakirira, haandi ng'wa amaachi niweyendehereere,

¹⁹ mani oboolere abaandu bomu syaalo sino oti: ‘Omwaami Nasaae aboolera abaandu bali mu Yerusalemu, mu syaalo sya Yisiraeli ati bahalye ebyohulya byaabwe nibahinaakiriha haandi bahang'we amaachi nibeyendehereere. Esyaalo syaabwe syahamalemwo buli siindu sisirimo syoosi, olwohuba abaandu baamwo boosi baholere ebitahoyerwa. Ao niwo yibalimanyira bati Niise Omwaami.’

²⁰ Mani ebiko birimo abaandu byahasihiriswe; esyaalo sino syaheehole ekuunda. Ao niwo yibalimanyira bati Niise Omwaami.”

Olukaado lwamanyihana neende omulaanga kutaamanyihaane

²¹ Omwaami n'alomaloma naange, n'aboola ati:

²² “Ewe omwaana w'omuundu, lukaado siina luno lu muli nalwo mu syaalo sya Yisiraeli lu mukaada muti, ‘Endaalo chiwaao, nae ebyeekeswa muhuboneherwa haba sibyoolerera.’ ”

²³ Mani sakira baboolere oti, ‘Omwaami Nasaae aboola ati, njia ohwaakamya olukaado luno. Haba sibacha ohuchiiririra ohwehoonyera olukaado luno mu Yisiraeli.’ Nae baboolere oti: “Ebiha biri aambi ohwoola, ebyeekeswa muhuboneherwa byoolerere.

²⁴ Olwohuba mu Yisiraeli haba sihwahabeemo haandi ohuboneherwa hw'obubacha oba ohulaangirira eby'obubacha.

²⁵ Nae Ese Omwaami njia ohulomaloma emboosi, haandi si nomanoome sichia ohwoolerera. Haba sisicha ohuhiinda, nae mu biha byeeng'we, eng'we abajeemu, njia ohulomaloma emboosi mani njolerese si mba nimboolere, Ese Omwaami Nasaae niise oboola.”

²⁶ Omwaami haandi yalomaloma naange, n'aboola ati:

²⁷ “Ewe omwaana w'omuundu, bona, abomu syaalo sya Yisiraeli bali ohuboola bati, ‘Eby'ohuboneherwa byaali ohubona haba sibyahoolerere mu biha bino, haandi byalaanga byomu biha bisisiiri eyale muno.’

²⁸ Mani sakira baboolere oti Ese Omwaami Nasaae mboola endi: ‘Chibulao emboosi chaange echichia ohuhiinda haandi, nae emboosi chaange chichia ohwoolerera abweene, Ese Omwaami, Niise oboolere.’ ”.