Esabbuli 95 - EBBAIBBO EMBOOSI YA NASAAE

Olweembo lufumia Omwaami

¹ Mwiiche, mulehe hufumie Omwaami! Mulehe hweembere Nasaae neende esangaalo, oyo otukayirira!

² Mulehe huchie yaali humwebase mani humweembere enyembo chisangaasa echifumia.

³ Olwohuba Omwaami oyo ni Nasaae muhunuufu, omutuki muhunuufu ohira banasaae boosi.

⁴ Niye otuka esyaalo syoosi, ohutula hu eng'uungu chihiramo obwolorefu ohwoolera elalira hu ngulu chihiramo obuleeyi.

⁵ Enyaanja hoongo yae yosi, olwohuba niye owayiloonga; neende eloba lyoomu, niye owalyeeholera omweene.

⁶ Mwiiche, lehe humwiinamire haandi huguuname aasi; lehe husigame mu moni w'Omwaami owatuloonga!

⁷ Olwohuba niye Nasaae weefwe; haandi efwe huli abaandu bae b'adeebaho, huli ebyaayo byae bi yaaya. Enyaanga yino muba nimuwulira ekono lyae n'aboola ati,

⁸ “Mutoomya emyooyo kyeeng'we, koti lu bakuuka yeeng'we bahola nibali Meribba, haandi koti lu bahola hu ludaalo olwo nibali mu siparara sya Maasa,

⁹ koti lu bahema haandi baateema, kata ayahaba mbwe bi hola, bali nibabibweene.”

¹⁰ Emyaaka amahumi kane, ndasinyihana abaandu abo, mani nimboola endi, “Abaandu bano nga badoondobanu mu myooyo, haandi haba sibadiira amalako kaange.”

¹¹ Sakira ndanyoolera mani ndeechuba endi: Haba sibachia ohwiingira mu buwuuluhiro bwaange.