Esabbuli 94 - EBBAIBBO EMBOOSI YA NASAAE

Nasaae niye omuheengi w'emisaango ky'abaandu boosi

¹ Ewe Omwaami, niiwe Nasaae owetuunga, yekesa etima lyao!

² Ewe niiwe oheenga emisaango ky'abaandu boosi, yiichia okabe abehuduumbasa omukabo kubahoyera!

³ Ewe Omwaami, abahola-mbi bahaakame liina ohwehuduumbasa? Bahepaahe ohwoola liina?

⁴ Abahola-mbi boosi beehuduumbasa, beepaaha, balomaloma nibeekinia.

⁵ Bafwiinyirira abaandu bao, ewe Omwaami; basaandya abaandu ba wenyoolera.

⁶ Beeta abahasi bafwiirwe neende bawamulehwa, haandi batemula bawalukeenda.

⁷ Baboola sa mbwe, “Omwaami haba s'abibona daawe. Nasaae w'Abaisiraeli haba s'abideebaho daawe.”

⁸ Baandu babi eng'we, mwabbungaala mutye? Mwahabe neende amakesi liina?

⁹ Nasaae owataao amatwi niye otaawulira? Owahola emoni niye otabona?

¹⁰ Nasaae woolobya ebyaalo niye otasaandya? Nasaae weekesa abaandu boosi ohuba neende amakesi, niye otaali neende amakesi?

¹¹ Omwaami amanyire ebibaaso byaabwe; mani amanyire ati ebibaaso byaabwe muuya sa.

¹² Ewe Omwaami, beresa ehabi oyo y'otoolobyaho daawe, neende oyo yi weekesa amalako kao!

¹³ Omuwuluusa mu biha by'ebidinyu, ohwoola lu bahola-mbi bahayabirwe obuko.

¹⁴ Omwaami haba siyajwaange abaandu bae; haandi abaandu bae haba siyahabalehe daawe.

¹⁵ Obwadyeeri mu huheenga emisaango hwahakaluheo, mani abaluungifu boosi nibabuloonda.

¹⁶ Wiina mweene olisiingira ohwaabina abahola-mbi? Wiina mweene owahangwiire yaambonie ohutula eyiri abahola-mbi?

¹⁷ Omwaami aba n'atahoonya, mba ndaachia hale haandi bwaangu muno emakoombe.

¹⁸ Nindaboolaho endi, “Teremuuhe,” ewe Omwaami, wahoonya neende ohuheera hwao hutaakama.

¹⁹ Ni mba mu bidinyu biingi, wuunemya omwooyo mani ndasangaala.

²⁰ Abakayi b'emisaango babi, ewe haba sooholera alala nabo daawe, abahola amalako ataali obwadyeeri,

²¹ abo abahola oluhobo ohwiita abaandu balai haandi abaheengera omusaango kw'ohufwa abo abataaliho omusaango daawe.

²² Nae ese Omwaami niye owuuniinda, haandi Nasaae waange niye owuunjabina.

²³ Nasaae achia ohubasaandya hulw'obubi bwaabwe haandi abasihirise hulw'obubi bwaabwe. Omwaami Nasaae weefwe yahabasihirise.