Esabbuli 92 - EBBAIBBO EMBOOSI YA NASAAE

Olweembo lw'ofumia

¹ Ewe Omwaami, silai ohuhweebasaanga, neende ohweemba nihufumia, ewe Nasaae w'Aakulu Muno.

² Silai ohutuumbula esisa syao buli chuli neende obweesikwa bwao buli siro,

³ nihuhubba aduungu haandi nihuhubba obuhana.

⁴ Ewe Omwaami, bi wahola bihunuufu bikera nindeehoya; nyemba neende esangaalo hulw'ebiindu bi wahola.

⁵ Ewe Omwaami, ebiindu bi wahola bihunuufu nibyo! Ebibaaso byao bituhira ohumanya.

⁶ Sino nisyo esiindu si muundu musiru atahanyala ohumanya; omuundu musiru atanyala hutegeera,

⁷ ati abahola-mbi banyala ohusebuha koti obunyaasi, abahola-mbi banyala ohuhula-hulana; nae hu njakamo bachia ohusihirisibwa elalira endaalo choosi.

⁸ Nae ewe Omwaami, ochia ohukinisibwa endaalo choosi.

⁹ Ewe Omwaami, olwohuba bona, abasuku bao, olwohuba bona, abasuku bao bachia ohusihirisibwa; abahola-mbi bachia ohusalaanisibwa.

¹⁰ Nae ewe wuumbereesi amaani koti ak'endaawu ndeende; haandi wuumbahire amafuta mayaaha mani ng'iyire.

¹¹ Mbweene abasuku baange nibayiingirwa, abo abaseetaanga balirire nimbulira.

¹² Abaluungifu bahekolole koti amahiindu; haandi bahahule koti emiseengese cha Lebbanooni.

¹³ Bali koti emisaala kibataaka mu Nyuumba y'Omwaami, bahahulire mu lwaanyi lwa Nasaae weefwe.

¹⁴ Bahakofule mani baadoong'a nibasyaama ebyaamo, haandi nibasiiri ab'amaani, abasiiri neende amasaafu kabunyaasi.

¹⁵ Bahadoong'e nibasiiri ab'esinani, ohweekesa bati, Omwaami muluungifu, niye owuuniinda haandi abulamo ohudoondobanaho daawe.