Esabbuli 7 - EBBAIBBO EMBOOSI YA NASAAE

Esaala y'ohusaba obwadyeeri

¹ Ewe Omwaami Nasaae waange, niiwe obweyikamo bwaange; njabine mani wuumonie abasuku bali ohuseeta;

² ataali ao, bachia ohumbwaasulamo koti lu edalang'i yibwaasulaanga, nibaahwehweesa naabulao owunjabina.

³ Ewe Omwaami Nasaae waange, nindahola sino, n'aliwo esyonoono mu mahono kaange,

⁴ niimba nindaayirisaho omuundu yeesi, oba ndayaayaho omuundu yeesi ataali esifune,

⁵ leha omusuku yaanyongeho mani amale yandiire, aseenakire obulamu bwaange hu loba mani asiihe omubiri kwaange mu loba.

⁶ Ewe Omwaami, mu tima lyao siingira yema mani omweene olwaanie abasuku baange. Ewe Nasaae waange, simuha, olwohuba omweene odoolere omuheengi w'emisaango.

⁷ Leha abaandu boosi bebuusire yooli bahwebodoohanie; mani obatuke niwihaale hu sisaala syao Muukulu.

⁸ Omwaami niye oheengeraanga abaandu emisaango; ewe Omwaami, heengere omusaango ohuloondakana neende obuluungifu bwao haandi ohuloondakana neende obwomiifu buundimo.

⁹ Eee, leha obubi bw'omuundu mubi bwaakame, nae ewe oteeo obuluungifu, ewe oteema ebibaaso neende emyooyo niiwe Nasaae muluungifu.

¹⁰ Nasaae niye engabo yaange, oyo owonia abaluungifu mu myooyo.

¹¹ Nasaae niye omuheengi w'emisaango muluungifu, haandi niye Nasaae owoolobya abahola-mbi buli siha.

¹² Nae omuundu yeesi n'ateyoolobya, Nasaae achia ohwookiya olugaanga lwae; achia ohukodia mani ang'aade oluyiingo lwae;

¹³ amalire ohutekeha ebilwaaniso byae by'amaani, amalire ohupiima olusaale lwae.

¹⁴ Bone, omuundu mubi koti lu abaasa ohwonoona, haandi koti lu yechuule obusuku, haandi alomaloma eby'obubacha.

¹⁵ Ahola obuko n'abuyaba, mani yaakwa mu buko bu mweene yahola.

¹⁶ Obusuku bwae bumukobolera omweene, mani obwaalaba bwae bwiiha bwamukwaaho omweene.

¹⁷ Nae njia ohweebasa Omwaami hulw'obuluungifu bwae, haandi ohweemba efuma y'eliita ly'Omwaami, ow'Aakulu Muno.