Esabbuli 68 - EBBAIBBO EMBOOSI YA NASAAE

Olweembo lw'esyaalo olw'ohuyiingira

¹ Leha Nasaae asiingire, leha abasuku bae basalaane; leha abo abamusyuula badumuuhe!

² Koti omwoosi kudumuuha, mani leha basihirire elalira; koti ewula yisanguluha niyiri aambi neende omuliro, leha ababi bosi basihirire mu moni wa Nasaae!

³ Nae leha abaluungifu basangaale; leha bafumie mu moni wa Nasaae; leha basangaale nibehoya!

⁴ Yeembere Nasaae, yeembe nimufumia eliita lyae; mumuhuumulire olweembo, oyo okeendera hu maleesi; eliita lyae nilyo Omwaami, mumufumie nimuli mu moni wae!

⁵ Laatang'ene bamulehwa, haandi omuliindi w'abafwiirwe oyo niye Nasaae oli mu bumenyo bwae bwoolerefu.

⁶ Nasaae aberesa nambula-buchiiro edaala ly'ohumenyamo; atusa ababoye mu jeela, mani yaabata mu buyiinda; nae banaandawulira bamenya mu syaalo syoomu kuru-kuru.

⁷ Ewe Nasaae, niwali niweemerera abaandu bao, haandi niwahuumba n'ohalakania esiparara,

⁸ esyaalo syateengereha, ekulu nalyo lyabbwomoola aasi efula, mu moni wa Nasaae; olugulu lwa Sinai lwateengereha mu moni wa Nasaae, Nasaae wa Yisiraeli.

⁹ Ewe Nasaae, wakwiisa efula mu buungi engereha era; ewe weechia woombaha buyaaha obusiha bwao nibwali nibudangaalire;

¹⁰ ebyaayo byao byanyoolamo obumenyo; mu bulai bwao, Ewe Nasaae, wakabula ababula ebyohulya.

¹¹ Omwaami atusa elako; mani omukaanda muhoongo kwasalaania emboosi ndai mbwe:

¹² “Abatuki b'amaye beeruha!” Abahasi bali nibadoong'ere ango, bakabana ebiindu bipeeye,

¹³ kata neende nibali nibamenyaanga mu bidwooli by'amakoondi embaya ch'eguugu echibwiihirweho efeesa, amooya kaalyo nikamesa-mesana koti saabbu ya bunyaasi.

¹⁴ Nasaae w'Obunyala niyasalaanisirayo abatuki, amakina k'efula kwakwa hu Salimoni.

¹⁵ Eee, ewe olugulu lw'amaani, olugulu lwa Bbasaani; eee, ewe olugulu lw'emikoongo miingi, olugulu lwa Bbasaani!

¹⁶ Lwasiina, lwasiina otingaala neende embaliha, eee, ewe olugulu lw'emikoongo miingi, hu lugulu lu Nasaae yekoomba ohumenyaho, eee, yi Omwaami achia ohumenya endaalo choosi pe?

¹⁷ Naali neende ebigaari by'amaani, ebihira elifu ehumi amahabi kabiri, amalifu neende amalifu, Omwaami yatula hu Sinai mani niyeengira Abuundu Woolerefu.

¹⁸ Ewe waniina olugulu luleeyi muno, mani niwemerera ababoye mu sidiyiiha syao, haandi n'onyoola ebiyaanwa ohutula mu baandu, kata neende ohutulira elalira mu banaandawulira, hu ewe Omwaami Nasaae onyale ohumenyaanga abweene ao.

¹⁹ Omwaami afumisibwe, oyo otuliinda buli ludaalo; Nasaae wuno niye obuwonia bweefwe.

²⁰ Nasaae weefwe wuno ni Nasaae w'obuwonia; mani Nasaae, niye Omwaami, atuwonia ohufwa.

²¹ Nae Nasaae achia ohwaata emitwe ky'abasuku bae, ekofia ch'abatuki bakeendera mu bibi bwaabwe.

²² Omwaami yaboola ati, “Njia ohubakobosa mbatuse mu Bbasaani, njia ohubakobosa mbatuse mu busiba bw'enyaanja,

²³ hu munyale ohwiiniha amakulu keeng'we mu mabaanga, hu nimi ch'embwa cheeng'we chinyale ohunyoola omukabo kwaacho ohutula hu basuku abo.”

²⁴ Ohuhuumba hwao humaliirifu huli ohubonehana, ewe Nasaae, ohuhuumba hwa Nasaae, Omutuki waange, naali mu nyuumba yae njoolerefu

²⁵ abeembi nibeemerere, nae abayaasa nibali enyuma, akatikaati waabwe nao waluwo abahaana niboobba nyaangili:

²⁶ “Fumie Nasaae mu lwichuule lw'abaandu, Omwaami oyo, eee, eng'we abatula hu lwiibulo lwa Yisiraeli!”

²⁷ Yiluwo Bbenjamini, obahiramo obuyere, niye haandi obeemereremo, abachweenufu ba Yuda nibali mu mukaanda kwaabwe, abachweenufu ba Sebbuluuni, abachweenufu ba Nafutaali.

²⁸ Yekesa obunyala bwao, Ewe Nasaae; yekesa amaani kao, Ewe Nasaae, kawehoonyera hulweefwe.

²⁹ Hulw'enyuumba yao eyiri mu Yerusalemu yi batuki bahuleeteraangamo ebiyaanwa.

³⁰ Yalabira ebisolo ebyo ebyamenya mu bidutu, ehoonge naamba ey'esurusi kyoong'ene neende emoosi chaachio cheene. Seenakira mu makulu kao abo boosi abekoomba emikabo; salaania abaandu baheera ebiita.

³¹ Leha emigasa kileetwe nikitula mu Misiri; leha Etiopia yibbibbiirihane ohusiingisa amahono kasyo eyiri Nasaae.

³² Yeembere Nasaae, eng'we obwaami bwomu syaalo; yeembe nimufumia Omwaami,

³³ eyiri oyo okeendera aakulu muukulu, ekulu lyaluwo ohutula hale; eee, atuumbulaanga ekono lyae, ekono lyae ly'obunyala elyo.

³⁴ Lehere Nasaae obunyala, obwaami bwae buli hu Yisiraeli, haandi obunyala bwae buli muukulu.

³⁵ Nasaae waamatiichasi naali mu bwiihalo bwae, Nasaae wa Yisiraeli oyo, oberesaanga abaandu bae obunyala neende amaani. Nasaae afumisibwe!