Esabbuli 58 - EBBAIBBO EMBOOSI YA NASAAE

Esaala y'ohusaba Nasaae asaandye ababi

¹ Mani eng'we abeemirisi, mulomalomaanga ebiluungifu, kose? Mani muheengaanga emisaango ky'abaandu mu buluungifu?

² Bbe, mu myooyo kyeeng'we, eng'we mubasaanga ebidoondobanu byoong'ene; amahono keeng'we kahola eby'obutemo hu syaalo.

³ Abaandu babi bakota hale ohutulira elalira mu nda cha bang'inaabwe, badoondobana ohutula nibeebulwa, balomalomaanga obubacha bwoong'ene.

⁴ Bali neende obusiba obuli koti obusiba bw'endemo, koti efubi yitawulira, eyeekala eyeene amatwi kayo,

⁵ hu yinyale ohuhaya ohuwulira ekono ly'abadiira enjuha oba ely'omulosi muhataafu.

⁶ Ewe Nasaae, bboongola ameeno koosi akali mu minwa kyaabwe; yiya amasoongero k'edalang'i njere echio, Ewe Omwaami!

⁷ Leha bahameo koti amaachi kahulukusa; koti obunyaasi, leha baseenakirwe aasi, mani bamale baalale.

⁸ Leha babe koti eheniemu nilihamuuluhira mu muunyu, haandi koti esituluucho sitabonaho elyuuba.

⁹ Bamaleo bwaangu muno nibasisiiri ohumanya, obaake koti esiino liri mu ndalo, mu tima lyae, Nasaae achia ohubadumuula abasihirise nibabona.

¹⁰ Abaluungifu nabo bachia ohwehoyaanga nibabona ohwetuunga ohwo; achia ohudobakira amakulu kae neende amabaanga k'ababi.

¹¹ Mani abaandu beemeo baboole bati, “Mubwadyeeri bweene hane yiriyo omukabo kuliindiriire abaluungifu; mubwadyeeri bweene hane hu syaalo huno huliho Nasaae oheengaanga emisaango.”