Esabbuli 44 - EBBAIBBO EMBOOSI YA NASAAE

Esaala y'ohusaba obuliindi

¹ Ewe Nasaae, hwawulira neende amatwi keefwe, bakuuka yeefwe batukaniaayira, ebidiira hu biindu by'amaani bi wahola mu ndaalo chaabwe, mu ndaalo cha hale:

² Koti ewe mu bunyala bwao bw'amaani watusa eloba lino hu baandu baandi waalibaberesa, mani waabataamo; niiwe omweene owabasaandya, ewe omweene niiwe oweruusa mu syaalo enjia chiindi, mani wabata hu syaalo yi banaamenyeenge. Wasaandya abaandu abo, nae bano wababeresa omuleembe.

³ Bakuuka yeefwe haba sibalwaaniraho engaanga chaabwe hu banyoole esyaalo esyo, oba baayiingira ohweema hu maani kaabwe abeene; nae kali amaani kao neende obunyala bwao, alala neende ohwomiisa oti oli nabo; ebyabeekesa biti wabaheera.

⁴ Niiwe Omutuki waange haandi Nasaae waange, owahoonya Abaisiraeli mani baayiingiraanga.

⁵ Obunyala bwao nibwo obukera nihuyiingira abasuku beefwe; eliita lyao nilyo elikera hwaaseenakira abatuseeta.

⁶ Haba sindeesika olusaale lwaange oba oluyiingo lwaange haba silunyala ohuumonia.

⁷ Nae ewe omoniisye abasuku baange, mani wadoondobania abo abatusyuula.

⁸ Hunehoyeraanga mu Nasaae endaalo choosi, haandi hunahweebasaanga endaalo choosi.

⁹ Nae bulaanu, otusukuune eyale mani waleha batuyiingire, mani haba sosikeendera alala neende amaye keefwe.

¹⁰ Watuleha hweeruha abasuku beefwe; mani baayaaya emyaandu kyeefwe.

¹¹ Watuleha hwaaba koti amakoondi kabachia ohusiinja, mani watusalania-salaania mu byaalo biteende.

¹² Wakusa abaandu bao hu bbei ndiidi muno, n'otawosaanieho daawe.

¹³ Wafukiirira abasuku beefwe ohutunyeka, abaandu batwebodoohaanie batuduulira nibacheha.

¹⁴ Watuhola hwaaba esy'ohukaniaayaho mu byaalo, batunyooma nibayuuya emitwe.

¹⁵ Oludaalo lwoosi bona malwamo oluyaali, esoni chindiira muno,

¹⁶ nimbulira emboosi ch'abaandu baabwaaba neende abaanyeka, nimbona abasuku baange neende abo abataandaha.

¹⁷ Bino byoosi bitukwiireho, kata hwahaba nihutahwiibirira, oba hwahalaka endagaano yao yi wahola naafwe.

¹⁸ Sihuhutulaangaho kata nabudiidi, oba hwajeemera amalako kao.

¹⁹ Nae ewe watwibirira mani watuleha mu siparara eyiri aarara, mani watuleha mu siirima sya titititi.

²⁰ Huba nihweebirira eliita lya Nasaae weefwe, oba hweenamira banasaae bateende,

²¹ sino Nasaae haba siyahasifumbuule? Olwohuba Nasaae amanyire eby'engiso biri mu mwooyo.

²² Nae, oludaalo lwoosi huli mu masira k'ohwiitwa hulwao, haandi huyirwa koti amakoondi kachia ohusiijwa.

²³ Ewe Omwaami simuha, lwasiina okona? Siingira! Otatusukuna endaalo choosi!

²⁴ Lwasiina otweekisa mani wahaya ohutubonehera? Lwasiina wibirira obuchuuni bweefwe neende ohusaanda hweefwe?

²⁵ Olwohuba obulamu bweefwe busukuunwe aasi mu lufu; emibiri kyeefwe kiyaandire hu loba.

²⁶ Siingira mani otuhoonye! Tuwonie ohweema hu buheeri bwao butaakama!