Esabbuli 39 - EBBAIBBO EMBOOSI YA NASAAE

Ohweeyama hw'omuundu oli ohusaanda.

Eyiri omweemberesi: Eyiri Jedusuuni. Esabbuli ya Daudi.

¹ Ndaboola endi, “Njia ohweliinda mu biima byaange, mani haye ohwonoona mu mboosi chi nomanoma; omunwa kwaange haba sikucha ohutuumbula emboosi yoosi, abahola-mbi nibasisiiri mu moni waange.”

² Ndadangaala mani ndaabuleera, ndateemaho ohwesimiirisa nae sindanyala; obudinyu bwaange bwemeeda-bwemeeda,

³ engisa yaangwa hu mwooyo. Koti lu ndemeeda ohusibaasaho, nilwo lu ndemeeda ohuchunisibwa; sakira ndaboola endi,

⁴ “Omwaami, njekese manye enjakamo yaange, neende ebiha bi ndahayiindire hu syaalo; leha manye obulamu bwaange koti lu bukotao!”

⁵ Bona, oheendesere endaalo ch'obulamu bwaange, ebiha by'ohuyiindira bibula obuhoonyi mu moni wao. Mubwadyeeri, obulamu bwa buli muundu buli koti omuuya sa!

⁶ Mubwadyeeri, omuundu w'ohukotao sa koti esiiniha! Buli siindu sy'ahola syebihaya byeene; abuungiha alala obuyiinda, nae haba s'amanyire ati wiina mweene ochia ohubuyira!

⁷ “Mani bulaanu, Omwaami, siina syeene si siiliindire? Esuubi li siisiiri nalyo liri mweewe.

⁸ Monie ohutula mu bibi byaange byoosi. Otakanya abasirusiru baanjeha!

⁹ Leha mbuleere-buwuleera, sibuleo si nomanoma; olwohuba niiwe owakera ndaasaanda endi.

¹⁰ Otemeeda ohuusaandya; wuuhuyire bimala, mbweeremo amaani.

¹¹ N'osaandya omuundu ohumwoolobya ebyonoono, n'osihirisa ebiindu bi yaheera muno mani byaaba koti bi mbuungi chiliire; mubwadyeeri, buli muundu ali koti omuuya sa!

¹² Ewe Omwaami, bulira esaala yaange, tekeeresa mani owulire amaliro kaange, hoonye ohweema hu masika ka ndira! Ndi omukeni wao obita-bubita, walukeenda sa, koti bakuuka yaange.

¹³ Ndehe mani sangaaleho budiidi, nisiisiiri ohutula hu syaalo obutakaluhaho haandi!”