Esabbuli 21 - EBBAIBBO EMBOOSI YA NASAAE

Ohufumia hulw'ohuyiingira.

¹ Ewe Omwaami, amaani kao kaleeteraanga omutuki esangaalo; haandi yehoya olwohuba obuhoonyi bwao eyiri omutuki buungi muno.

² Omubereese esiindu si mwooyo kwae kwekoomba, haandi haba somwiimire esiindu si yahusaba.

³ Olwohuba omubereese ehabi nyiingi muno; omufwaalire ekofia y'esaabbu hu mutwe kwae.

⁴ Yahusaba obulamu, mani waamuberesa, yayiindira endaalo choosi pe.

⁵ Oluyaali lwae luungi muno ohweema hu buhoonyi bwao; wamubereesa efuma neende amaani.

⁶ Eee, wakera yaaba neende ehabi nyiingi muno endaalo choosi; wakera yehoya neende esangaalo olwohuba ewe oli nae.

⁷ Olwohuba omutuki oyo yeesika Omwaami; haandi ohweema hu buheeri butaakama bw'oyo ow'Aakulu Muno, achia ohwomiira.

⁸ Omuhono kw'omutuki kuchia ohukiiya abasuku bae boosi; omuhono kwao muluungi kuchia ohuwaamba abo abatahudaha.

⁹ Wahabahole baaba koti omuliro kw'esiroombe oludaalo lu wahabonehereho. Omwaami achia ohubasihirisa abamaleo mu tima lyae; haandi omuliro kuchia ohubasihirisa.

¹⁰ Ochia ohusihirisa olwiibulo lwaabwe lutule hu syaalo, haandi abaana baabwe bosi batule hu lwiibulo lw'abaandu.

¹¹ Nibaba neende endekeha embi nibahuyiingania, nibaheenga ohuhulyamo olukwe, haba sibahanyale.

¹² Olwohuba ochia ohukera beeruhe; n'obachomiisye obusaale bwao mu moni waabwe.

¹³ Omwaami ofumisibwe hulw'amaani kao! Huchia ohweemba haandi hukinie amaani kao.