Esabbuli 148 - EBBAIBBO EMBOOSI YA NASAAE

Ebiloonge byoosi lehe bikinie Nasaae

¹ Kinie Omwaami! Kinie Omwaami nimuli Muukulu! Kinie Omwaami, eng'we abali aakulu eyo.

² Eng'we bamalaika bae mweesi mumukinie, eng'we eye lyae lyoosi, mumukinie!

³ Eng'we elyuuba neende omwoosi mumukinie; eng'we eng'ining'ini choosi echimesamesana, mumukinie.

⁴ Eng'we Ekulu liri aakulu muno mumukinie, neende eng'we, amaachi kali aakulu w'Ekulu, mumukinie.

⁵ Lehe byoosi bikinie eliita ly'Omwaami; olwohuba yalagira-bulagira, mani nibiloongwa.

⁶ Yabitaaho elako litakaluuhana daawe, mani n'abyomiisira elalira.

⁷ Eng'we abali hu syaalo kinie Omwaami. Eng'we ebisyuuhira-banaabi byomu nyaanja haandi neende eng'we obusiba bw'enyaanja hoongo;

⁸ omuliro neende amakina k'efula, alala neende amaleesi, eng'we emiyaka ky'amaani ekiwulira amalako kae, mumukinie.

⁹ Eng'we engulu neende ebigulu byoosi, eng'we emisaala ky'ebyaamo, neende emituumba kyoosi, mumukinie.

¹⁰ Eng'we ebisolo byoosi, ebitukwa neende ebiteende, ebyaambaaka neende amayoni kabburuha.

¹¹ Eng'we abatuki b'esyaalo neende eng'we abaandu mweesi, abahunuufu alala neende eng'we abeemirisi baandi mweesi, mumukinie.

¹² Eng'we abaraaga, abasyaani neende abahaana, abahuluundu neende abaana bayere mweesi alala, mumukinie.

¹³ Lehe boosi bakinie eliita ly'Omwaami, olwohuba eliita lyae lyoong'ene nilyo ehunuufu ohuhira akaandi koosi. Oluyaali lwae luhoongo luhira esyaalo neende ekulu.

¹⁴ Yahola esyaalo syae ohuba esy'amaani, abaandu bae boosi sakira bamukinia; olwohuba abaandu ba Yisiraeli abali aambi nae. Kinie Omwaami!