Esabbuli 140 - EBBAIBBO EMBOOSI YA NASAAE

Esaala y'ohusaba ohukayirirwa

¹ Ewe Omwaami, monie abahola-mbi; onjabine abatemo.

² Bateesa ebiindu bibi mu myooyo kyaabwe, ebiha byoosi basiingisa obusoolo.

³ Enimi chaabwe bachisowolayo koti ech'endemo; eminwa kyaabwe kirimo obusiba koti obw'efubi.

⁴ Ewe Omwaami, monie abahola-mbi; onjabine abatemo abo abaatekere ngwe aasi.

⁵ Abaandu bahuduumbafu baatekere omuteego; baalirire ehaanda chaabwe mani nibachiteka hu ndulo w'engira maambyemo.

⁶ Ese mboolera Omwaami endi, “Ewe niiwe Nasaae waange.” Wulira amaliro kaange, wiiche wuuhoonye, Omwaami waange!

⁷ Ewe Omwaami, Omwaami waange, omuhoonyi waange w'amaani, niiwe owuuniindire mu biita.

⁸ Ewe Omwaami, abahola-mbi otababeresa bi badaha; otafukiirira ohwooseresa endekeha chaabwe.

⁹ Otakanya abasuku baange baayiingira; eby'ohutiisa-tiisa byaabwe bi balomaloma bibakobolere.

¹⁰ Leha amaanda kabalire maahanyu kabakweeho!; Leha basukunwe mu buko buleeyi, mani bibahaye ohutulamo.

¹¹ Leha abo abaabira abasyaabwe bihaya bahaye ohubaaho neende engeri yoosi mu syaalo; leha esibi syakaanane neende abatemo mani sibasihirise bwaangu muno.

¹² Manyire endi Omwaami yaabina banaambula-buchiiro, haandi alwaanira abali mu ngisa.

¹³ Mubwadyeeri bweene, abaluungifu bahahukinie, aboolerefu bahamenye mu moni wao.