Esabbuli 111 - EBBAIBBO EMBOOSI YA NASAAE

Ohufumia Omwaami hulw'ebilai bi ahola

¹ Fumie Omwaami! Njia ohweebasa Omwaami neende omwooyo kwaange kwoosi yi baluungifu bebuusiire.

² Omwaami ahola ebiindu biwukia muno! Ababisangaalira beekoomba muno ohubyehaliirisa.

³ Buli siindu sy'ahola syeechulamo oluyaali neende obuhunuufu; mani obuluungifu bwae bw'endaalo choosi.

⁴ Omwaami w'esisa haandi aleheramo, atwiichulisa ebiholwa byae biwukisa.

⁵ Aberesa ebyohulya abaandu bamwiisamo oluyaali; haba siyeebirira endagaano yae.

⁶ Yekesa obunyala bwae eyiri abaandu bae n'ababeresa ebyaalo by'abaandu bateende.

⁷ Buli siindu sy'ahola, mweesikwa haandi w'obwadyeeri; ebilagiro byae haba sibikaluuhana-kaluuhana daawe.

⁸ Ebilagiro byae biyiindira endaalo choosi; yabitaao mubwadyeeri neende mu buluungifu.

⁹ Yanunula abaandu bae mani n'ahola nabo endagaano y'endaalo choosi. Mwoolerefu haandi w'Obunyala!

¹⁰ Ohwiisa oluyaali mu Omwaami niyo enjaako y'amakesi. Abo abahola batyo nibo abali neende amakesi. Omwaami akinisibwe endaalo choosi pe.