Esabbuli 108 - EBBAIBBO EMBOOSI YA NASAAEEsaala y'ohusaba Nasaae ahoonye abali mu budinyu ( Sab 57:7-11 ; 60:5-12 ) 1 Ewe Nasaae, ese ndi neende obwomiifu bumala! Njia ohweemba nihufumia! Ewe omwooyo kwaange, simuha! 2 Simuha, ewe eduungu lyaange neende obuhana bwaange! Njia ohusimusa elyuuba. 3 Njia ohuhweebasa ewe Omwaami, ni ndi mu baandu. Njia ohuhufumia mu byaalo. 4 Obuheeri bwao buli aakulu muno ohwoola muukulu; obweesikwa bwao bwoola hu bireesi. 5 Ewe Nasaae, kinisibwa muno ohuhira ekulu, oluyaali lwao lwiichule hu syaalo syoosi. 6 Wulira ohusaba hwaange, otuwonie neende obunyala bwao, abaandu bao ba waheera muno banyale ohununulibwa. 7 Nasaae yalomaloma naali mu bwiihalo bwae bwoolerefu, n'aboola ati, “Njia ohuyiingira mani ngabulemo Sekemu mani ngabire abaandu baange Ehooho lya Sukoti. 8 Gileadi syaalo syaange, neende Manaase syosi syaange; Efuraimu nisyo ekofia yaange y'echuma Buyudaaya nisyo omukwajo kw'oluyaali kwaange. 9 Moabbu nisyo olukaraaya lwaange lw'ohweeyoseraho Edomu nisyo sinyanihaho ebiraato byaange; Mu Filisitia nimwo muhuumulira neende amaani ninyingiire.” 10 Ewe Nasaae waange, wiina mweene ochia ohunjira mu siko sy'amaani? Wiina mweene owahanjose mu Edomu? 11 Ewe Nasaae, otujwaang'iire elalira? Haba sosikeendera alala neende amaye keefwe? 12 Tuhoonye ohulwaania omusuku weefwe; olwohuba obuhoonyi bw'abaandu haba sibuhoonya daawe. 13 Nae Nasaae n'ali hu lwaande lweefwe, huchia ohuba neende amaani. Niye ochia ohuyiingira abasuku beefwe. |