Esabbuli 10 - EBBAIBBO EMBOOSI YA NASAAE

Esaala y'ohusaba obwadyeeri

¹ Ewe Omwaami, lwasiina weemere eyale otyo? Lwasiina ewe weekisa mu biha by'obudinyu?

² Abahola-mbi baloonda neende esimyeeni nibeerusa abamanani; leha abeene baambisibwe mu miteego ki bateka.

³ Olwohuba abahola-mbi bebwaaba mu bwekoombi bw'emyooyo kyaabwe, haandi omuundu wokuliira kw'efuni, haba s'adeeba hu Mwaami.

⁴ Mu hwehuduumbasa hwae, omuhola-mbi, haba s'akoonya Omwaami daawe; ebibaaso byae byoosi biboola sa biti, “Nasaae haba s'achia ohunjolobya daawe.”

⁵ Ebiindu bi bahola, bibachiira bulai ebiha byoosi; eheenga ch'emisaango kyao yiri aakulu muno, haba sibanyala huyibona daawe; nae abasuku bae achia ohubadumuula.

⁶ Abaasa mu mwooyo kwae ati, “Ese haba siinja ohutulao; emiika choosi pe, haba siinja hunyoolaho ebidinyu.”

⁷ Mu munwa kwae mweechulamo ohubwaaba, neende obubacha, alala neende ohufwiinyirira abaandu baandi; olulimi lwae lweechulamo ebibaaso bibi neende obulyaanga.

⁸ Beeboonderera abaandu mu byaalo; beeta abaandu babulaho emisaango mu bweekisi. Emoni chae chilengeesa ohubona abateenyala babanaakweeho,

⁹ yeboonderera mu bweekisi koti edalang'i niyekoonyera; beeboonderera bati hu banyale ohukwa hu bamanani, bakwa hu bamanani mani bamale babahwehweese babayire mu haanda chaabwe.

¹⁰ Abali mu ngisa abo banyoonyobolwa, mani beebiswa aasi, mani bayiingirwa neende amaani kaabwe.

¹¹ Babaasa mu myooyo kyaabwe bati, “Nasaae yamala ohwiibirira hale, yeekisa, haba s'abona daawe.”

¹² Ewe Omwaami, siingira; Ewe Nasaae, siingisa omuhono kwao; oteebirira abasaanda!

¹³ Lwasiina ababi bebwaaba Nasaae, haandi baboola mu myooyo kyaabwe bati, “Ewe haba soocha ohubaheengera omusaango”?

¹⁴ Nae ewe obona, haandi otingaala etima lyaabwe neende esireka syaabwe, mani wetekeehe ohuhoonya abali mu budahano; olwohuba abali mu budahano beeruhira yooli; ewe omweene niiwe omuhoonyi w'abaana bafwiirwe.

¹⁵ Funaka amahono k'ababi, alala neende ak'abahola-mbi; koonyeresa obubi bwaabwe ohwoola lu wahabamalireyo boosi;

¹⁶ Omwaami niye omutuki w'endaalo choosi; haandi ebyaalo bichia ohusihirira ohutula mu syaalo syae.

¹⁷ Ewe Omwaami, ochia ohuwulira bi baloonga beekoomba; ochia ohubagumia emyooyo, ochia ohubatekeeresa

¹⁸ ochia ohuholera abaana bafwiirwe neende abafwiinyirirwa ab'obwadyeeri, mani omuundu ofwa sa ahaye ohuleeta amasira hu syaalo.