Engaado 6 - EBBAIBBO EMBOOSI YA NASAAE

Ohulabula huundi

¹ Mwaana waange, niweemereraanga owaasyo, oba omweene weteere mu bunyala bw'omuteende;

² niweeteka mu byoolomaloma, emboosi chomu munwa kwao nicho echihuboya.

³ Mani ewe, mwaana waange, hola sino wewonie omweene, olwohuba oli mu bunyala bw'omuundu wuundi; chia yaali, mani weloongoyase, omwekweede ahuhoonye.

⁴ Otabechaanga mu hukona endoolo sa neende ohwiihala owuluuheho.

⁵ Wewonie koti embooko yiruha omuyiimi, koti eyoni libbachuuhe mu mahono k'omuteki.

⁶ Omukata ewe, chia obonereho hu make; wehaliirise engeri chi kaholeramo emirimo, mani okeekereho amakesi.

⁷ Haba sikali neende omweemeresi yeesi, kata omulambuusi oba omutuki,

⁸ nae keebiihira ebyohulya byaako mu siminyu, mani keteekehera ebyohulya muukesa.

⁹ Omukata ewe, waheyalise ao ohwoola liina? Wahasimuhe liina ohutula mu ndoolo chao?

¹⁰ Waheengao noboola oti, “Haangoneho budiidi, hafuumbeho amahono budiidi, mbuluuheho budiidi.”

¹¹ Nae n'osisiiri muhuyiriita, obumanani bwahahuseete, koti omutemo ohuseetere neende ebilwaaniso.

¹² Omuundu mubi abula obuhoonyi, akeendaana neende enomanoma hyaamu,

¹³ atemyatemya emoni chae, ahwesahweesa amakulu kae, asyoomesa olwaala lwae.

¹⁴ Mu mbaasa yae ehyaamu, abaasa ohuhola ebibi, yemeeda ohusalaania obulekeeresi;

¹⁵ mani sakira amasira kahamwooleho nataamanyire; mu biha bidiidi, yahabe afunihe-funiihe bubi muno bi atahalerwa.

¹⁶ Biluwo ebiindu bisaasaba bi Omwaami yasyuula, bitaanu-na-bibiri, eby'omusiro eyiri Omwaami:

¹⁷ etingaala y'ohwepaaha, olulimi lubacha, neende amahono keedisa amabaanga kabula omusaango,

¹⁸ Omwooyo kubaasa ohuhola ebibi, amakulu kaanguya muno ohuhola ebibi,

¹⁹ omuloli otusa obuloli bw'obubacha, neende omuundu osalaania eby'obusoolo mu baasye.

Ohulabula hudiira hu bucheke

²⁰ Mwaana waange, liindaanga ebilagiro bya laatao, haandi otebiriraanga enjekesa ya maakoo.

²¹ Biihaanga mu mwooyo kwao emboosi chaabwe buli ludaalo; haandi ocheboyeenge muukosi mwao.

²² Chinaahwimirireengemo, n'okeenda; chinaahuliindeenge, niweyaliise; haandi chinaalomalomeenge naawe, n'osimuha.

²³ Olwohuba ebilagiro, taara nilyo haandi enjekesa, bulafu nibwo, haandi ohwoolobya hw'ohukolola, niyo engira y'obulamu.

²⁴ Ochiliindaanga hw'onyale ohuwona omuhasi mubi, neende ahalimi h'omuhasi mucheke.

²⁵ Otekoombaanga obulai bwae mu mwooyo kwao, haandi ebikye by'emoni chae bitahudiiraanga;

²⁶ olwohuba malaya anyala ohukulwa neende eseende chikula omugaati nae omuhasi mucheke aleetera obulamu bwao ohusihirira.

²⁷ Omuundu anyala ohwakata omuliro muumbafu mwae mani engubo chae chahaya ohuya?

²⁸ Oba omuundu anyala ohuseena hu maanda kabalire mani amakulu kae kahaya ohumamuha?

²⁹ Mani nasilala nilwo lu siri neende omuundu okona neende omuhasi w'owaasye; abulao omuundu omudiiraho otachia husaandisibwa.

³⁰ Abaandu haba sibalekeeresaanga omwiibi owiiba ebyohulya mbwe huyeekute, enjala niyimuluma?

³¹ Haandi nibaba nibamudiirire, atuunga amahabi kataanu-na-kabiri ohuhirao; mani atuse atuunge buli siindu syomu nyuumba yae.

³² Mani omuundu okona neende omuhasi w'owaasye abulamo amakesi; omuundu osihola omweene yesihirisa sa.

³³ Yahalekerswe haandi ahuywe, mani yahadiirwe esoni chitahawe.

³⁴ Olwohuba embaliha yidiisa omwene muhasi etima, mani achia ohwetuunga abula ohukwiira esisa.

³⁵ Haba saacha hufukiirira otuunge esiindu syoosi ohwenunula, oba ebiyaanwa byao biingi haba sibyahamaleo etima lyae.