Engaado 4 - EBBAIBBO EMBOOSI YA NASAAE

Engaanga yiri mu Makesi

¹ Eng'we abaana, wulireenge engeraka ya laata yeeng'we, tekeereseenge, mani munyale ohunyoolaanga ohumanya.

² Olwohuba ebiindu bi mbaberesa bilai nibyo: otalehanaanga neende ebiindu bi hweekesa.

³ Nindali nisisiiri omusyaani muraaga ni ndi neende laata yaange, ni ndi omuraaga, omuheerwa mu moni wa maama,

⁴ laata yanjekesa, mani n'aboola ati, “Yichulisaanga ebiindu bi ndi ohuhuboolera, mani otabiibiriraanga; liindaanga ebilagiro byaange, mani ochia ohuyiindira.

⁵ Nyoola amakesi; nyoola uhumanya

⁶ Otalehanaanga neende amakesi, kachia ohuhuliindaanga; kadaheenge, mani kachia ohuhuliindanga mu muleembe.

⁷ Ohunyoola amakesi nisyo esiindu sihuluundu muno, haandi buli siindu siindi syonyoola, bechaanga n'ohumanya.

⁸ Dahaanga amakesi, mani kahahuhole ow'oluyaali; n'okomiiriraho, kahahwiisemo oluyaali.

⁹ Amakesi niko akachia ohuba ekofia yao y'obutuki y'oluyaali; ekofia y'obutuki y'oluyaali yimilamilana.”

¹⁰ Mwaana waange, wulira, haandi fukiirira emboosi chaange, hu onyale ohuyiindira emyaaka miingi.

¹¹ Hwekeese engira y'amakesi; hwekeese engira ch'obuluungifu.

¹² Sibulao esiindu syahahwehiinge mu moni wao n'okeenda; haandi niwiiruha, haba siwahadandaamireenge.

¹³ Yomiiriraanga muno hu ngeraka yonyoola; yiliindeenge bulai, olwohuba eyo niyo obulamu bwao.

¹⁴ Otadiiraanga engira y'abahola-mbi, haandi otaloondaanga ebiholwa by'abaandu babi.

¹⁵ Yihaye, haandi otayibitiraangaho; yebwaabeenge, mani odiira engira yao wawaao.

¹⁶ Olwohuba abahola-mbi haba sibanyala ohweyalisa nibataaholere esibi; endoolo haba sichibayira nibataholere omuundu esibi.

¹⁷ Olwohuba ohuhola esibi nihwo ebyohulya byaabwe haandi obwaalaba nibwo ebyohung'wa byaabwe.

¹⁸ Nae engira y'omuluungifu yaaduha koti omubasu kw'esanya, okwemeeda ohwaaduha ohwoola esideete.

¹⁹ Engira y'ababi yiri koti esiirima sya titititi; haba sibabona esiindu si beegumulaho.

²⁰ Mwaana waange, tekeeresaanga emboosi chaange; wuliraanga bulai ebiindu bi huboolera.

²¹ Otalehanaanga nabyo; haandi biliindeenge mu mwooyo kwao.

²² Olwohuba obinyoola, bi muberesa obulamu, haandi biwonia obulwae bwohu mubiri kwae.

²³ Wehaliiriseenge embaasa yao; olwohuba ebibaaso byao nibyo ebituka obulamu bwao.

²⁴ Otalomalomaanga eby'obubacha, haandi webwabeenge ebiindu bidoondobania abaasyo.

²⁵ Tingalaanga neende obweesikwa ebiindu byomu moni, haandi otadokanaanga.

²⁶ Buli ludaalo, baliiriraanga bulai ebiindu bi ohola, mani buli siindu sy'ohola sinabecheenge esyadyeeri.

²⁷ Otadokaanaanga eno neende era; tulaanga hu ngira mbi.